大邱傳統知性之旅
大邱市區歷史之旅，帶你體驗不一樣嘅大邱！
Hello，大家好，我哋係由韓國人話你知每日最新韓國資訊嘅Creatrip。
＃大邱旅行＃大邱旅遊
＃大邱傳統＃歷史遺跡
大邱係一個保有傳統遺跡以及文化嘅城市，而小編整理咗大邱市區嘅歷史、文化景點，兼顧知性嘅同時，仲可以享用美食、Cafe以及打卡。
大家如果之後有計劃去大邱，咁就要快啲save底呢篇文啦！
✨馬上Follow我哋IG
instagram.com/creatrip.hk
大邱知性傳統景點
1. 大邱藥令市（대구 약령시）
仲未去到大邱藥令市，喺遠處已經可以聞到濃厚嘅藥草味。
冇錯！呢到係主要賣傳統韓藥藥材，除咗藥材之外，韓國茶葉或者傳統糕點都可以喺度搵到。
放喺店門口嘅一籃一籃藥材同茶葉，都有清楚標示產地，如果有興趣想買嘅朋友，記得先了解一下呢啲地名同國家嘅韓文。
韓藥其實同中藥好似，邊行嘅時候，小編都有留意到唔少熟悉嘅藥材，例如枸杞、紅棗、薏仁等等。
其中，小編睇中一款藥草叫做「山茱萸」，佢好似蔓越莓咁細細粒。
不過一包份量都幾多，大家要考慮清楚先再買。
一包係300克（₩10,000），小編覺得CP值都幾高。
老闆仲話呢個對於治療頭痛、耳鳴、發燒、痛經等非常有幫助，對於成日頭痛嘅小編嚟講，真係超適合。
如果大家會去大邱藥令市，一定會發現好多從未見過嘅新事物！
2. 藥令市場韓醫藥博物館（약령시 한의약 박물관）
- 地址：대구 중구 달구벌대로415길 49
- 時間：09:00至18:00；逢星期一、元旦、中秋節休息
- 費用：免費入場
如果行完藥令市場，仲對韓醫有其他疑惑、或者想再深入了解呢啲文化嘅話，咁就一定要去埋呢個韓醫藥博物館。
展覽區域分咗兩層，2樓可以體驗東方醫學，3樓可以暸解東方醫學歷史。
裡面展示各種朝鮮時代藥草商人嘅蠟像，可以簡單了解當時藥學嘅進步同模式。
除咗參觀之外，可以親自體驗嘅項目都唔少，例如藥草浸腳、製作藥草番梘及天然空氣清淨劑。
不過，體驗活動目前係需要預提前約，因為疫情影響，時間亦都唔太固定，大家可以去韓醫藥博物館官方網站了解更多詳情。
參觀完室內設施之後，戶外亦都有提供小水道畀大家浸腳。
大家行到攰想搵個地方坐下放鬆下，呢度都係一個唔錯嘅選擇。
小編去嘅時候因為天氣開始變凍，所以戶外浸腳暫時冇開放。
如果係夏天去，就可以享受沁涼嘅戶外足浴；夏季開放時間為11:00至17:00。
而喺博物館另一邊，古色古香嘅「藥令門」，大家唔好唔記得喺度打卡啊！
3. 第一教會基督教歷史館（제일 교회 기독교 역사관）
- 地址：대구 중구 남성로 50
- 時間：無固定
- 費用：免費入場
「第一教會」就係喺韓醫藥博物館隔離，而呢度亦都係慶尚北道嘅第一座教堂，具有歷史悠久意義。
裡面有展示各種聖經、舊相、文件物品，以及紀錄韓國基督教嘅發展同起源。
目前嚟講，第一教會已經冇提供聖徒膜拜、聚會，主要係用嚟展覽。
4. 韓方醫療體驗中心（한방의료체험타운）
- 地址：대구 중구 중앙대로77길 45
- 時間：10:00至17:30；最後入場時間為17:30；逢星期一、大年初一、中秋節休息；如果星期一遇公眾假期，第二日會補休
- 費用：免費入場；韓醫美容₩5,000（兩小時）；足浴₩5,000
呢度係2020年8月新開幕嘅大邱「韓方醫療體驗中心」，係將傳統韓醫文化，結合現代技術嘅體驗中心，係唔係好特別呢？
小編喺韓方醫療體驗中心4樓開始參觀，呢度主要分成兩個區，包括增強現實（AR）同虛擬現實（VR）完成遊戲同測試，可以用相當直觀、有趣方式體驗韓國傳統藥學。
上到5樓，呢度係韓國醫學美容體驗室，體驗時間係兩小時（₩5,000），價錢都唔貴，可以喺度試唔同體驗，例如上面呢張相嘅加熱按摩床，真係超級舒服！
或者大家亦可以量完血壓後，詢問韓醫醫生進行針灸。
另外，美容部分亦有美甲服務，不過部分體驗需要另外支付，大家之後嚟到大邱韓方醫療體驗中心，一定要問清楚收費模式。
如果想要體驗針灸嘅話，需要出示護照或者登錄證等證件（留學生）。
喺韓方醫療體驗中心6樓，呢度係足浴體驗室，需要提前預約，有需要嘅話可以留言請小編提供相關網站。
5. 李相和古宅（이상화 고택）
- 地址：대구 중구 계산동2가 84
- 時間：10:00至17:30
- 費用：免費入場
「李相和古宅」亦都係喺大邱市中心，不過一入到去古宅，就會發現呢度特別寧靜，令人不自不覺會放鬆。
呢棟古宅係抗日文學家詩人李相和（1901-1943），喺1939年至1943年過世前居住過嘅地方。
6. 徐相敦古宅（서상돈 고택）
- 地址：대구 중구 서성로 6-1
- 時間：10:00至17:30
- 費用：免費入場
喺李相和故居對面就係徐相敦古宅。
徐相敦（1851-1913）係朝鮮末期企業家兼官員，亦係民族獨立運動家，大家可以嚟呢度參觀徐相敦當時居住環境，感受一下古早歷史氣氛圍。
同時呢度亦都係好多韓劇會去拍攝同取景嘅地方。
7. 3.1萬歲運動路（3.1운동계단）
- 地址：대구 중구 동산동 881-3
大邱嘅「3.1運動路」應該係大家都知嘅打卡點，呢度係韓國獨立運動期間，相當具有指標性嘅地點，好多喺獨立運動時留下嘅歷史遺跡，都可以喺呢條路搵到。
望住一整排嘅太極旗，小編彷彿感受到當時佢哋參與獨立運動嘅亢奮心情。
8. 藥田蔘雞湯（약전한방삼계탕）
- 地址：대구 중구 달구벌대로415길 56
- 時間：09:00至21:00
- 交通：中央路站1號出口；半月堂站15至18號出口
- 費用：₩14,000起
大邱咁多美食之中，小編想特別介紹呢間「藥田人蔘雞」畀大家，同一般人蔘雞唔同嘅係，呢間鋪頭更注重養生部分，所以放咗好多藥材。
每叫一碗都會附上一杯免費人蔘酒，可以加入湯入面增添風味，或者大家亦可以直接飲。
「藥田韓方蔘雞湯」遠近馳名，運用多種韓方藥材熬成，配上裡面塞滿糯米，已經燉到好軟嘅人蔘雞，一份只需₩14,000。
秋冬去大邱，不妨飲一杯人蔘酒，配上人蔘雞驅走寒意啦！
9. LAMIA EMILY（라미아 에밀리）
- 地址：대구 중구 달구벌대로 2061-2
- 時間：11:00至22:30
- 交通：半月堂站18號出口
- 費用：₩4,000起
喺大邱傳統文化之旅中，點都需要甜品同咖啡嘅～所以小編去咗呢間深受大邱人喜愛嘅韓屋咖啡廳「LAMIA EMILY」。
「LAMIA EMILY」有多個以唔同主題裝飾嘅房間，大家唔想坐室內都可以揀坐室外吸新鮮空氣。
以上係小編整理出大邱之旅中，具有知性嘅傳統景點、美食同Cafe，唔知大家又滿唔滿意呢？
希望大家會鍾意啦～我哋下次再見：）
✨馬上Follow我哋IG
instagram.com/creatrip.hk
| 其他延伸閱讀 | |
 大邱炸雞起源 |  2萬韓幣玩盡大邱 |
