韓國汗蒸幕總整理
坦誠相對最自在！凌晨機旅客救星「韓國汗蒸幕」文化、推薦店鋪整理
Hello，大家好，我哋係由韓國人每日提供最新韓國旅行資訊嘅Creatrip。
去韓國汗蒸幕係唔係總係比人一種好怕醜嘅感覺呢？同唔識嘅人一齊沖涼或者俾大媽幫你搓身，呢啲都係難以想像嘅文化。小編今日會介紹韓國汗蒸幕，以及推薦釜山、首爾等地方嘅汗蒸幕，一齊繼續睇落去啦。
韓國汗蒸幕介紹
TVN
韓國汗蒸幕使用流程
- 入場（入場前請除鞋）
- 拎汗蒸幕衫+手環 (唔可以整唔見)
- 按照性別去唔同區域
- 入澡堂前除哂所有衫褲
- 直接入澡堂沖涼
- 沖完涼換汗蒸幕衫
- 先再去公共桑拿區域
大家所常見嘅韓國汗蒸幕分成三個部分，分別係澡堂、桑拿房（蒸房）同休息區域。澡堂顧名思義，就係要先喺呢度沖完涼先可以入韓國汗蒸幕，保持基本衛生。喺澡堂沖完涼之後，就可以去浸湯(溫泉)，由冷湯到熱湯都有。而且好多韓國汗蒸幕嘅澡堂裏面都有小型蒸氣室。
韓國汗蒸幕嘅桑拿有分兩種，包括可以逼汗嘅熱桑拿同有冷卻作用嘅冰桑拿。大家亦都可以去大堂休息空間，喺個度可以邊食雞蛋，邊飲米水。規模比較大嘅汗蒸幕甚至仲會有按摩椅同網吧！當然嚟到韓國汗蒸幕，最唔可避免嘅就係澡堂同所有人赤身裸體、坦誠相對，如果唔想嘅話，都可以直接換汗蒸幕嘅衫，去公共空間享受桑拿。
韓國汗蒸幕常見問題
Q. 沖涼嘅地方有冇分男女？
A: 一定有，只有桑拿公共空間先冇分男女。
Q. 一定要全赤裸去沖涼同落水？
A: 係，咁做係為咗保持衛生。
Q. 需要準備啲咩入澡堂？
A: 通常要自行準備護膚品、洗髮水、沐浴露，亦可以喺小賣部直接購買。
Q. 通常汗蒸幕會免費提供啲咩？
A: 一套汗蒸幕衫、毛巾，仲有公用番梘。
Q. 有紋身嘅話唔可以入汗蒸幕？
A: 每間汗蒸幕規則唔同，不過小編去過嘅汗蒸幕都冇呢種規定。
小編自己去韓國汗蒸幕嘅時候，通常都會喺現場直接買，只要用手環就可以最後一次過俾錢！不過都建議唔慣同人共用物品嘅朋友們自備個人物品~
韓國汗蒸幕搓身疑問
其實呢個服務基本上就係拎一塊擦澡布（每個韓國家庭都會有），大媽幫你大力搓平時可能洗唔乾淨嘅部位，捽走曬啲老泥。洗完之後記得要搽Cream，如果唔係會好乾。至於每間汗蒸幕嘅價位都唔一樣，都係要現場詢問，然後決定要唔要就可以啦。
韓國汗蒸幕 | 首爾
머니투데이
首爾地區嘅汗蒸幕鋪頭非常多，幾乎每隔幾個地鐵站附近，都一定會有大大小小嘅汗蒸幕。由此可見韓國人有幾咁鍾意汗蒸幕，佢哋都認為呢種係可以同朋友或者家人增進感情嘅方式，同香港唔太一樣。
接住落嚟小編會為大家介紹一啲係首爾地區好出名嘅汗蒸幕，大家下次嚟嘅時候不妨參考一吓。
1. 東大門SPAREX（스파렉스 굿모닝시티점）
- 地址：서울 중구 장충단로 247 B3
- 營業時間：24小時
- 小Tips：東大門歷史文化公園站（동대문역사문화공원역）14號出口行1分鐘
東大門SPAREX
「東大門SPAREX」係一間已經經營超過10年嘅汗蒸幕，一直都深受本地人同遊客歡迎。而且因為呢間分店位於Good Morning City，地理位置超方便，好容易就可以去到！呢度採用傳統韓屋裝修風格，非常闊落，職員亦都夠親切，住東大門或者喺東大門行街行到攰都可以隨時嚟休息吓~
2. 免疫工房（면역공방）
- 地址：서울 중구 퇴계로20길 2 B2
- 營業時間：07:00 - 21:00（農曆新年、中秋節休息）
- 小Tips：明洞站（명동역）3號出口行1分鐘
「免疫工房」利用日本最古老天然礦石所產生嘅波動，幫助排出人體體內毒素同大量汗水，試過嘅朋友都話精神爽利！透過我哋仲可以用優惠價預約，有興趣就唔好錯過啦！
3. 黃金桑拿（황금사우나）
- 地址：서울 중구 명동8가길 27 B2F
- 營業時間：24小時
- 小Tips：明洞站（명동역）8號出口行3分鐘
「黃金桑拿」係一間女性專用汗蒸幕，雖然有男士浴池，不過汗蒸幕就淨係得女士可以入場，仲可以加購埋捽老泥服務！
4. 弘大娘家樹林汗蒸幕（친정숲 불한증막）
- 地址：서울 마포구 서강로97 B1
- 營業時間：24小時
- 小Tips：新村站（신촌역）7號出口行8分鐘
친정숲
「娘家樹林汗蒸幕」嘅特別之處在於呢度係一間女性專用汗蒸幕，啱曬唔想同異性共用汗蒸幕嘅朋友們！喺新村站或者西江大站徒步就可以去到，附近更加有唔少餐廳同Cafe，嘆完汗蒸幕可以順便四周圍參觀~
5. 森林韓方樂園（숲속한방랜드）
- 地址：서울 서대문구 봉원사길 75-7
- 營業時間：06:30 - 22:00
「森林韓方樂園」係韓國最出名嘅特色汗蒸幕，雖然睇落好似喺山入面，不過其實喺新村站搭巴士就到，交通比想像中方便！呢度唔係普通汗蒸幕咁簡單，仲有K房、健身室同其他娛樂設施，喺呢度玩全日都得！而且仲可以食到碳烤五花肉、年糕同蕃薯，其他地方一定搵唔到！
6. 弘大24小時火爐桑拿（홍대24시불가마사우나）
- 地址：서울 서대문구 신촌로 1 쓰리알유시티 상가 B2F
- 營業時間：24小時
呢間汗蒸幕位於弘大入口站附近，而且24小時開放，如果未夠鐘check-in住宿都可以暫時喺度休息！入面最特別嘅係有一間可以促進血液循環、改善手腳冰冷同達至排毒效果嘅量子治癒房，有助增強免疫力！
5. 江邊SPA Land（강변스파랜드）
- 地址：서울 광진구 구의강변로 45 B2
- 營業時間：24小時
- 小Tips：江邊站（강변역）4號出口行7分鐘
강변스파랜드
「江邊SPA Land」出名夠曬大，有超多設施同區域，例如兒童遊樂區、視頻遊戲室、運動娛樂區、家庭區等等，相信一定可以玩得開心！而且呢度亦都有提供超多款小食，大家可以盡情休息之餘仲可以大飽口福~
韓國汗蒸幕 | 釜山
중앙일보
相信好多嚟韓國旅行嘅朋友們都會選擇去釜山玩，所以趁呢個機會，小編亦都幫大家整理咗幾間釜山汗蒸幕，有時候唔知要去邊到玩，都可以去體驗一下汗蒸幕！
1. Centum SPA LAND（센텀 스파랜드）
- 地址：부산 해운대구 센텀남대로 35
- 營業時間：09:00 - 22:00
- 小Tips：2號線Centum City站（센텀시티역）12號出口行2分鐘
센텀 스파랜드
比起其他汗蒸幕同Spa，「Centum SPA LAND」個價位偏高，不過無論係裝修定設施都相對上高級同新淨，而且都光猛過普通汗蒸幕，就好似去咗度假村咁！而且因為呢間Spa位於海雲台新世界百貨公司入面，大家享受完汗蒸幕，充滿電之後就可以再去Shopping啦！
2. Hotel Aqua Palace水上樂園及汗蒸幕（호텔아쿠아펠리스 워터파크 앤 찜질방）
- 地址：부산 수영구 광안해변로 225
- 營業時間：24小時
- 小Tips：2號線廣安站（광안역）5號出口行11分鐘
호텔아쿠아펠리스
「Hotel Aqua Palace」位於廣安大橋對面，除咗有桑拿同汗蒸幕，仲有埋水上樂園，就算係一家大細去都一定可以玩得盡興！大家可以一邊享受呢度嘅設施，一邊欣賞廣安大橋同無敵釜山海景，真係超嘆！
以上就係小編幫大家整理嘅韓國汗蒸幕文化，以及首爾同釜山比較大型同出名嘅汗蒸幕，希望可以幫到大家plan行程啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
