2024韓國必食炸雞推薦
雞全部都係雞！韓國人最鍾意食邊間炸雞店？
Hello，大家好，我哋係由韓國人每日提供最新韓國旅行資訊嘅Creatrip。
韓國炸雞可以話舉世聞名，係韓國最有代表性嘅食物之一！不過炸雞品牌越出越多，到底邊間係韓國人最鍾意又係最好食㗎呢？今日小編幫大家整理咗最近韓國最hit嘅炸雞brand，大家記住save低篇blog，下次嚟韓國嘅時候plan定去呢幾間試最正宗嘅韓國炸雞啦！
韓國炸雞店推薦
橋村炸雞（교촌치킨）
喺香港人心目中，相信「橋村炸雞」會係最出名嘅炸雞店，唔知大家又食過未呢？呢度嘅蜂蜜炸雞同原味醬油炸雞係經典口味，而鍾意食辣嘅朋友們記住要試吓Red香辣炸雞！
BHC炸雞（BHC치킨）
當年全智賢喺《來自星星的你》飲啤酒、食炸雞嘅場景令炸雞+啤酒呢個食法紅遍全球，亦都係BHC炸雞喺韓國同全世界迅速變出名嘅關鍵，小編個人最鍾意食芝士味炸雞，唔知道你又最鍾意食邊款呢？
BBQ炸雞（BBQ치킨）
韓劇《鬼怪》同《愛的迫降》入面都有勁多BBQ炸雞植入廣告XD 如果大家打算去食BBQ，記住一定要食佢哋嘅招牌黃金橄欖炸雞，炸雞皮又香又脆，入面更加係超juicy，每次食都會好驚艷！
Puradak炸雞（푸라닭）
「Puradak炸雞」以打造炸雞界嘅Prada為目標（所以個名讀音都差唔多XD），呢幾年突然變得勁受歡迎，最多人叫嘅口味係辣椒沙律醬味同黑蒜味炸雞，食落唔太辣，不過就好香！佢哋嘅代言人係丁海寅，相信佢都為「Puradak炸雞」加唔少分！
NENE炸雞（네네치킨）
「NENE炸雞」分店開到連香港都有，相信唔需要小編多介紹啦！不過如果要小編推薦一款炸雞，比起大家平時會叫嘅芝士味，小編更加推薦食香蔥炸雞，酸甜醬汁配上超多蔥絲，口感非常特別，而且唔會太膩！
Goobne炸雞（굽네치킨）
Goobne炸雞喺韓劇《社內相親》出場率超高，最近更加搵咗人氣女團LE SSERAFIM擔任代言人，係呢幾年最熱門嘅炸雞品牌之一。其實比起話係炸雞，應該叫做烤雞，因為係用焗爐烤製而成，所以佢冇平時啲炸雞咁油，有好多人想食炸雞嘅時候都會叫呢Goobne炸雞，罪惡感冇咁重啊嘛！
60雞（60계）
近期「60雞」炸雞人氣超高，呢間炸雞店堅持每18公升油只會炸60隻雞，之後就會換新油，保證夠新鮮冇油膉味！之前BTS Jung Kook開live嘅時候食過佢哋嘅「ㅋㅋㅋ炸雞」，超多人都跟風叫嚟食，如果你係ARMY嘅話就千祈唔好錯過啦！
正直的炸雞（바른치킨）
比較少遊客會聽過「正直的炸雞」呢個brand，不過因為係朱智勳代言，而且喺韓綜《玩什麼好呢》都出現過好幾次，所以喺韓國都幾紅吓。呢度嘅炸雞嘅特色係有好多配料，無論係薯片、年糕定最出名嘅大蝦炸雞都超足料！
起家雞（처갓집양념치킨）
「起家雞」亦都係比較受韓國本地人歡迎嘅炸雞品牌，勝在分店數量多！韓國人通常都會叫Supreme調味炸雞嚟食，小編個人推薦大家食無骨炸雞，就算攤凍咗都唔會有油膉味！
黃色炸雞（노랑통닭）
講起韓國當地人最鍾意嘅炸雞，一定唔少得「黃色炸雞」，佢亦都係小編最鍾意嘅韓國炸雞之一！呢個brand喺釜山起家，而家開到全韓國都有分店，口味唔似而家嘅炸雞店咁多花巧，不過反而因為夠經典所以先夠“韓國”！
以上就係小編今日幫大家整理嘅10大韓國炸雞店，大家下次嚟韓國記住要去其中一間食炸雞飲啤酒，或者喺住宿舒舒服服咁叫外賣食啦！
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
