首爾平價飾品店總整理
飾物控注意！韓妹熱門平價飾物指南，嚟韓國一定唔可以錯過呢幾間鋪頭！
Hello，大家好，我哋係由韓國人每日提供最新韓國旅行資訊嘅Creatrip。
韓國唔單止衫好買，林林總總嘅耳環、手鍊、頸鍊等必買飾物真係睇到人眼花繚亂！今日就等小編幫大家整理出幾間韓國必去首飾/飾品店，下次plan行程嘅時候記住參考啦！
你可能需要..
首爾平價飾品店總整理
NYUNYU（뉴뉴）
- 東大門店：서울 중구 마장로 34 1-3F
- 明洞店：서울 중구 명동4길 22 1-4F
- 江南店：서울 서초구 강남대로65길 1 B1F
講起呢排最受歡迎嘅平價飾品店，一定唔少得「NYUNYU」！呢間飾品批發店總店位於東大門，因為實在太受歡迎，所以今年一次過開多咗2間分店！
小編之前去過「NYUNYU」東大門店，呢度總共有3層，連平日夜晚都超多人，而且比較特別嘅係大部份都係日本人！
1樓係耳環、頸鏈、髮夾同手機支架區、2樓係各種飾品同服飾區，而3樓就係賣袋、鞋、太陽眼鏡同頭飾嘅地方，大家記住俾錢要上到3樓（1樓上2樓條樓梯隔離仲有個優惠區，大家如果有睇啱就記住唔好走寶啦）！
「NYUNYU」嘅飾品設計比較多樣化，由日常簡單款到超誇張嘅款式都有，而且商品數量比起接住落嚟要介紹嘅其他鋪頭多好多，梗有一款啱你！
提提大家，明洞店同江南店大概夜晚10點收鋪，但係東大門店會開到凌晨5點（你冇睇錯，真係5AM），而且每日都會開門！而且現場都有退稅機，大家俾完錢之後可以即場做埋退稅！
MIMILINE（미미라인）
- 地址：서울 중구 마장로 30 1-3F
- 營業時間：11:00 - 05:00
「MIMILINE」就開正喺「NYUNYU」東大門店隔離，同樣都係開到凌晨5點，因為兩間鋪頭風格唔太一樣，所以推薦大家可以一次過行曬兩間！
「MIMILINE」1樓同2樓都有賣飾品、各種頭飾同雜貨，比較值得一提嘅係呢度戒指款式勁多，無論係free size平價戒指定靚少少嘅款式都有，鍾意戴戒指嘅朋友們唔好錯過！
而相對嚟講，「MIMILINE」嘅服裝區就比較細，而且冇得試，所以小編覺得如果你係aim住買衫，呢度就未必啱你啦。
小編個人覺得「MIMILINE」嘅其中一個賣點係有偶像周邊商品賣~ 上到3樓大家會見到有一個都幾大嘅偶像商品區，公仔、海報、專輯、零食樣樣都有！而且仲有人生四格可以影，唔少偶像相紙都有，如果大家想同本命合照就記住要嚟啦！
另外呢層仲有一間Coffee Shop，大家行到攰可以坐低飲杯嘢抖抖，收銀處附近仲有一部換錢機，大家如果緊急需要韓幣現金嘅時候可以喺度換。
準備飛韓國嘅你換咗錢未？
OFFLINE DUTY FREE（오프라인 듀티프리）
- 地址：서울 마포구 홍익로3길 8 1-2F
- 營業時間：星期一至四 12:00 - 23:00、星期五至日 11:00 - 23:00
「OFFLINE DUTY FREE」係呢篇blog介紹嘅鋪頭之中最新開嘅一間，所以整體感覺比較新淨，而且裝修比較潮，同弘大嘅氣氛好夾。小編去嘅時候鋪頭入面韓國人多過遊客，證明連本地人都覺得呢度好行！
小編覺得「OFFLINE DUTY FREE」比起話係平價飾品店，更加似係飾品店+服飾店！呢間鋪頭總共有兩層，1樓賣嘅係耳環、頸鏈、帽等等嘅飾物，好sweet嘅係呢度有埋可以度戒指size嘅工具，就算唔知自己咩size都可以即場度，咁就唔怕買錯啦！
而2樓主要就係賣服飾同鞋、袋等等嘅配飾，款式全部都好緊貼潮流。而2樓仲有幾間Fitting Room，大家可以試啱先再買！
話明係DUTY FREE，就當然可以即場退稅啦！收銀處隔離有一部退稅機，大家俾完錢之後記住唔好即刻走啊！
時空間（시공간）
- 弘大本店：서울 마포구 홍익로3길 44
- 弘大正門店：서울 마포구 와우산로 93
- 延南店：서울 마포구 양화로21길 43
- 建大店：서울 광진구 동일로22길 119
相信好多朋友都有聽過「時空間」呢間飾物店，雖然相比以前分店數量少咗，不過喺大家嚟韓國旅行必去嘅弘大就已經有幾間分店，而且每間分店規模都好大好好行！
之前小編就去過弘大嘅「時空間」，呢度嘅飾品同衫嘅風格同裝修一樣，簡單得嚟又大方，而且夠日常！
講起「時空間」一定唔少得招牌飾物牆，每個陳列櫃大到由天花板到地下都放滿耳環同頸鏈，想睇曬都冇咁易XD 不過比起呢篇blog入面介紹嘅其他鋪頭，呢度嘅價錢相對上會貴少少，但係設計會比較精緻！
REDEYE（레드아이）
「REDEYE」相信大家都有印象，喺韓國周街都會見到佢地嘅分店，無論係路邊定地鐵站入面都有。
通常如果要去買平價+大眾款飾品嘅話，好多韓妹都會揀「REDEYE」！無論係耳環、戒指、手/頸鏈、髮飾通通都有，通常每件貨品都唔會超過₩10,000，買多幾件都唔會肉赤！
本身皮膚比較敏感嘅話，「REDEYE」都有賣純銀飾品，雖然價錢會貴啲啲，不過大家可以放心掃貨！
SALE 50（세일 50）
「SALE 50」相信大家都一定唔陌生，感覺同頭先介紹嘅「REDEYE」好似，大家喺街見到大大個50嘅時候行入去就啱啦XD
唔少商品喺埋單嘅時候，價錢會係標價再打5折，對於鐘意韓國首飾、耳環嘅女仔嚟講，簡直係天堂。
呢度除咗普通長耳環、短耳環、銀耳環、抗敏耳環，仲有耳夾，照顧埋想戴耳環但又冇耳窿嘅朋友，而且每款都好平超好入手！另外仲有頸/手鏈、手錶等等嘅飾物配件，想掃平貨嘅話推薦大家嚟「SALE 50」！
唔知道大家有冇去過以上呢幾間平價飾品店呢？有嘅話不妨喺下面留言話俾小編知，冇嘅下次嚟韓國旅行記住最少要去一間買盡佢！
喺韓國點可以唔行街掃貨！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
