KTX即日來回城市&景點推薦
到底搭KTX除咗釜山仲可以去邊度玩？小編私心推薦5個必去城市！
Hello，大家好，我哋係由韓國人每日提供最新韓國旅行資訊嘅Creatrip。
每次嚟韓國旅行去親都係首爾、釜山、濟州島，覺得冇新意？今日就等小編介紹5個啱曬搭KTX即日來回旅行嘅城市俾大家啦！
買定車飛隨時出發🚅
KTX即日來回城市&景點推薦
江陵(강릉)🚩
- 由首爾出發車程約2小時
📍注文津海邊 (주문진 해변)
《鬼怪》拍攝場地其實就喺「注文津海邊」，相信大家去到就會知道係邊個場面！其實呢度本身只係一個普通防波堤，但係而家就成為咗一個朝聖景點，超多人都會嚟影相打卡！
📍安木海邊/江陵咖啡街 (안목해변/강릉커피거리)
오마이뉴스
安木海邊係江陵市內其中一個最出名嘅海灘，沿住海邊仲有一條咖啡街，每間Cafe都可以睇到海景，真係好療癒㗎！
📍江陵草堂豆腐村 (강릉 초당순두부마을)
講起江陵美食，一定唔少得嫩豆腐！呢度更加有一條草堂豆腐村，入面有好多間豆腐專賣店，間間食飯時間都會排長龍。食完飯記住一定要食返杯豆腐雪糕啊！
📍BOHEMIAN COFFEE (보헤미안 박이추 커피)
江陵另一樣特產係咖啡，BOHEMIAN COFFEE係由韓國第一代咖啡師Park Yichu（박이추）開嘅Cafe，呢度嘅咖啡豆全部都係自家烘焙而成，大家好彩嘅話仲可以飲到佢親手沖嘅咖啡！而且Cafe位於海邊，大家可以一邊嘆咖啡，一邊睇無敵海景！
📍ARTE MUSEUM（아르떼뮤지엄）
「江陵ARTE MUSEUM」係一個喺鏡浦湖附近開嘅媒體藝術展覽，以VALLEY為主題，展出12件展現出江原道同江陵地區特色嘅媒體藝術作品！現場仲會有音響效果同唔同香味，滿足參觀人士五官體驗！
全州(전주)🚩
- 由首爾出發車程約2小時
📍全州韓屋村 (전주한옥마을)
「全州韓屋村」由超過700間韓屋組成，係全韓國規模最大嘅韓屋村，亦都被韓國文化體育觀光部同韓國觀光公社選定為韓國觀光名勝之一！大家嚟到記住要租返套韓服影相打卡，做返半日古代韓國人啦！
📍殿洞聖堂 (전동성당)
殿洞聖堂係一座羅馬天主教教會，係全州教區嘅主教座堂，更加喺1981年被列入大韓民國史蹟第288號，超有歷史價值，而且真係好壯觀！
📍Gilgeoriya (길거리야)
Gilgeoriya係一間專賣法包漢堡嘅鋪頭，入面有芝士、番茄醬、豬肉、蔬菜等等，再加埋青陽辣椒，所以食落會辣辣地，外皮酥脆、內餡豐富，食完超有飽肚感！
📍PNB豐年製菓 (PNB 풍년제과)
嚟全州玩想買手信返去，大部份韓國人都會嚟PNB豐年製菓買朱古力批！佢係一間有70幾年歷史嘅老字號，呢度嘅朱古力批比起平時見到嘅更加大，入面有忌廉同果醬，口感同層次都好豐富！
📍全州南部市場 (전주남부시장)
전북관광
전북도민일보
韓國每個城市嘅傳統市場都各有魅力，而全州南部市場而家每逢禮拜五、六都會搞夜市，成個市場都係小食攤位，大家可以大吃大喝，體驗韓國美食文化同全州充滿活力嘅一面！
大邱(대구)🚩
- 由首爾出發車程約3.5小時
📍E-WORLD&83塔 (이월드&83타워)
E-WORLD樂園係韓國數一數二嘅主題公園之一，唔單止有機動遊戲玩，仲有動物、精彩表演同煙花匯演可以睇。而隔離就係大邱著名地標之一 —— 83塔，上到去可以俯瞰大邱城市景色，日頭同夜晚各有魅力！
📍BTS壁畫
영남일보
如果你係KPOP Fans / A.R.M.Y，嚟大邱玩嘅時候就一定要去V同Suga嘅壁畫影相打卡！特別係V幅壁畫係喺佢母校附近，大家仲可以順便去睇吓呢個國際巨星細個返學嘅地方！
📍西門市場 (서문시장)
西門市場比首爾大部分傳統市場大，係大邱人經常都會去嘅傳統市場。而且難得嚟到大邱，點可以唔試吓呢度嘅經典嘢食呢？喺西門市場你可以搵到各式各樣嘅大邱美食，仲可以買啲手信翻去同家人朋友開心share𠻹！
📍新羅食堂(신라식당)
신라식당
新羅食堂係一間喺1985年開始營業嘅餐廳，雖然有賣好多韓式料理，但係最出名嘅係石板辣炒章魚，甜甜辣辣勁惹味，撈飯+紫菜一流！如果大家想食記住要早少少去排隊，如果唔係可能要等好耐㗎！
📍Starbucks鐘路古宅店 (스타벅스 종로고택점)
서울경제
서울경제
Starbucks鐘路古宅店係一間韓屋Starbucks，由超過100年歷史嘅古老韓屋改建而成，氣氛好之餘每個角落都好啱打卡！
麗水(여수)🚩
- 由首爾出發車程約3小時
📍突山公園 (돌산공원)
한국관광공사
突山公園係麗水地標之一，佔地接近29萬平方米，因為有唔少電視劇突山公園度取過景，所以每年都吸引一班遊客嚟參觀！推薦大家一定要搭海上觀光纜車，喺高空俯瞰麗水超靚海景同突山大橋日落&夜景！
📍梧桐島 (오동도)
한국관광공사
오마이뉴스
韓國人提起麗水就會諗起梧桐島，講起梧桐島就會聯想到呢度嘅山茶花。梧桐島總面積超過125,000平方米，有大約200種樹木同70種野生花草， 淨係山茶花樹都已經有超過3,000棵，可想而知有幾壯觀！建議大家3月中嚟，咁就可以睇到山茶花開到最大最靚嘅景色啦！
📍EXPO海洋公園（엑스포해양공원）
한국관광공사 - 여수시청
한국관광공사
麗水EXPO博覽會場係麗水最有代表性嘅地標，除咗可以喺海邊公園散步，仲可以欣賞到多媒體表演「BIG O Show」，重視亦都有Sky Tower同Aqua Planet等等嘅設施，令所有訪客都可以享受到刺激好玩嘅海洋休閒活動。推薦大家夜晚嚟睇鼎鼎大名嘅麗水夜晚海景！
📍向日庵 (향일암)
한국일보
연합뉴스
講起韓國日出名勝，好多人第一個會答嘅係江陵嘅正東津，不過其實麗水向日庵都勁出名！因為呢度係一座寺廟，喺呢度睇日出氣氛零舍好，景色更加詩情畫意！
📍石章魚商會 (돌문어상회)
因為麗水係沿海城市，嚟到當然要食海鮮啦！呢間餐廳喺IG勁出名，招牌菜係石章魚三合（돌문어삼합），將章魚、五花肉、芥菜泡菜一齊放入口，鮮甜海鮮同香口嘅五花肉，配上可以幫手解膩嘅泡菜，呢個組合比想像中夾！之前唱《麗水夜晚的海邊（여수밤바다）》嘅歌手都有去過食（當時老闆仲因為咁請曬全餐廳客人食飯XD）！
慶州(경주)🚩
- 由首爾出發車程約2小時
📍佛國寺 (불국사)
「佛國寺」喺新羅時代建成，亦被指定為聯合國世界文化遺產。而上面呢個「釋迦塔」都係統一新羅時代最有代表性嘅石塔！
📍瞻星臺 (첨성대)
被指定為韓國第31號國寶嘅「瞻星臺」係慶州嘅地標之一，係全世界現存天文台之中歷史最悠久嘅建築。呢度春天可以睇櫻花，夏天可以睇紫薇花同向日葵，秋天可以睇粉紅芒草，而冬天就可以睇到被白雪覆蓋嘅瞻星臺，一年四季景色都各有魅力！附近仲有大陵苑石牆路、東宮與月池等名勝，大家可以順便去埋參觀~
📍大陵苑 (대릉원)
「大陵苑」係新羅時代嘅皇帝、皇妃同貴族嘅古墳群，亦係慶州最有代表性嘅文化遺蹟之一。推薦大家春天同秋天嚟，呢度櫻花同楓葉真係勁靚！
📍普門觀光園區 (보문관광단지)
普門觀光園區係一個以普門湖為中心發展而成嘅觀光區，因為風景靚，所以平時都會吸引到好多慶州市民嚟散步。而上面嘅普門亭更加被CNN選定為韓國必去景點之一！
📍皇理團路 (황리단길)
皇理團路可以話係慶州最旺嘅地方，呢度嘅建築物全部都比較古典，亦都有好多改良式韓屋。大家可以喺呢個充滿韓國傳統氣氛嘅地方食到慶州傳統美食之餘，仲可以去勁多靚靚Cafe同紀念品鋪頭買手信！
想喺韓國四圍玩？🗺️
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
