2023/2024 韓國百大景點 — 慶尚道篇
去慶尚道旅行點可以淨係去釜山玩！韓國觀光公社推薦23/24慶尚道景點！
Hello，大家好，我哋係由韓國人每日提供最新韓國旅行資訊嘅Creatrip。
除咗首爾，最受香港人歡迎嘅韓國城市應該就係釜山啦！大家又知唔知道其實釜山身處嘅慶尚道仲有好多值得去嘅景點呢？韓國觀光公社最近評選出2023/2024韓國百大景點，今日小編就為大家整理咗入選嘅慶尚道景點，plan緊嚟旅行嘅朋友記住要睇埋落去啦！小編亦都有另外整理好其他地區嘅官方推薦景點，想知韓國邊度好玩就要撳入去睇啦！
2023/2024 韓國百大景點（慶尚道）
1. 釜山Skyline Luge（스카이라인 루지）
- 地址：부산광역시 기장군 기장읍 기장해안로 205
- 開放時間：平日 10:00 – 19:00、週末 10:00 – 20:00
- 費用：₩25,650~
Luge（斜坡滑車）係一款利用斜坡帶嚟嘅重力行駛嘅滑板車，近年喺韓國超流行~「釜山Skyline Luge」以大海為背景，體驗人士可以一邊享受好似揸緊賽車咁嘅刺激快感，一邊欣賞海景！
2. BUSAN X the SKY（부산엑스더스카이）
- 地址：부산광역시 해운대구 달맞이길 30
- 開放時間：10:00 – 21:00（最後入場時間 20:30）
- 費用：成人₩27,000、小童₩24,000
位於全韓國第二高建築物—— 海雲臺LCT Landmark Tower 嘅「BUSAN X the SKY」係全韓最大型觀景台，可以同時睇到海景、山景同城市風景！
3. 釜山甘川洞文化村（부산 감천문화마을）
*同時為 15/16、17/18、19/20、21/22韓國百大觀光景點之一
- 地址：부산광역시 사하구 감내2로 203
相信唔洗小編多介紹，有去過或者plan住去釜山旅行嘅朋友們應該都知道「甘川洞文化村」係其中一個必去景點！「甘川洞文化村」被譽爲韓國馬丘比丘，最出名嘅係呢度嘅壁畫同小王子雕像，四周圍都係五顏六色，影相打卡一流！
4. 海雲臺釜山綠色鐵道（해운대 그린레일웨이）[尾浦~松亭路段]
- 地址：부산광역시 해운대구 중동
- 費用：綠色鐵道散步徑毋需入場費（ [海濱列車] ₩7,000/人、[天空艙] ₩50,000/2人）
부산일보
「海雲臺釜山綠色鐵道」嘅尾浦~松亭路段全長4.8km，途徑廣安大橋、迎月路、Marine City等等釜山著名景點。大家可以沿住綠色鐵道散步，亦都可以揀搭海濱列車或者天空艙，喺另一個角度欣賞鐵路、大海同天空三位一體嘅靚景。
5. 釜山樂天世界（부산롯데월드）
- 地址：부산 기장군 기장읍 동부산관광로 42
- 開放時間：10:00 - 21:00
- 費用：₩47,000（Creatrip優惠價₩40,500）
「釜山樂天世界」係釜山最大規模主題公園，喺2022年一開冇耐就已經成為釜山必去景點之一！喺呢度可以體驗到全韓國最新最刺激嘅機動遊戲，有幾款更加係只有呢度先可以玩到，更加唔少得主題公園必有嘅花車巡遊表演！
6. 廣安里SUP Zone（광안리 SUP Zone）
- 地址：부산광역시 수영구 남천동
- 開放時間：[SUP Zone] 24小時、[其他水上活動] 日落前30分鐘至日落後30分鐘
- 費用：冇入場費，SUP體驗費用為 ₩30,000（3小時）
喺2020年正式開始營業嘅「廣安里SUP Zone」係一個為水上活動發燒友而設嘅海上活動勝地，除咗有可以玩SUP，即係Stand Up Paddle board（水上直立板）嘅區域之外，仲有海灘酒吧、沙灘床同Photo Zone！大家可以一邊玩SUP，一邊欣賞廣安里嘅海景！
7. 釜山松島海水浴場（부산 송도해수욕장）
*同時為21/22韓國百大觀光景點之一
- 地址：부산광역시 서구 송도해변로 100
- 開放時間：06:00 - 23:00
「松島海水浴場」長約800m，寬約50m，係繼海雲台同廣安里之後釜山市第三大最受歡迎嘅海水浴場。附近亦都有好多嚟到釜山必食餐廳同必做活動，大家睇完海景影完靚相記住要喺附近行吓啦！
8. 松島龍宮吊橋（송도용궁구름다리）
*同時為21/22韓國百大觀光景點之一
- 地址：부산광역시 서구 암남동 620-53
- 開放時間：
3~9月 | 09:00~18:00（最後入場時間 17:30） |
10~2月 | 09:00~17:00（最後入場時間 16:30） |
*每月第一、三個星期一，年初一、中秋節當日休息。
- 費用：₩1,000（7歲以下小童免費）
去得上面介紹嘅釜山松島海水浴場，就當然要去埋附近嘅「松島龍宮吊橋」啦！呢條吊橋全長127米，腳底就係勁藍嘅海，刺激得嚟仲可以睇到好靚嘅風景~
9. 松亭海水浴場（송정해수욕장）
*同時為21/22韓國百大觀光景點之一
- 地址：부산광역시 해운대구 송정해변로 62
- 開放時間：09:00 ~ 18:00
位於海雲臺區嘅「松亭海水浴場」總面積達54,000平方米，大約可以容納10萬人，係釜山熱門海灘之一，亦都係冲浪發燒友聖地。除咗可以喺沙灘玩，呢度每年都會舉辦慶典，有好多大學都會嚟呢度搞MT，亦都有唔少準新郎新娘會嚟影婚紗相，可想而知呢度真係又靚又寫意！
10. 龍頭山札嘎其觀光特區（용두산 자갈치 관광특구）
*同時為21/22韓國百大觀光景點之一
- 地址：부산광역시 중구 자갈치해안로 52
「龍頭山札嘎其觀光特區」蘊含釜山歷史同文化，想充分體驗釜山魅力就一定唔可以唔嚟呢度玩！超出名嘅「國際市場」、「富平罐頭市場」、「札嘎其市場」全部都位於呢個觀光特區，無論係吃、喝、玩、樂都可以滿足到你！
11. 太宗臺（태종대）
*同時為21/22韓國百大觀光景點之一
- 地址：부산광역시 영도구 전망로 24
- 開放時間：04:00 - 24:00（根據天氣可能有變，去之前請先確認）
- 費用：免費
「太宗臺」位於釜山影島最南端，係釜山最有代表性嘅海岸景觀景點，亦都被指定為釜山國家地質公園，大家可以欣賞到各種由海水同岩石打造嘅自然地質現象。呢度亦都有觀景台同生態徑，大家有機會記住要去埋啊！
12. 海雲台海水浴場（해운대해수욕장）
*同時為15/16、19/20、21/22韓國百大觀光景點之一
- 地址：부산광역시 해운대구 해운대해변로 264
- 開放時間：09:00 - 18:00
講起釜山必去景點，點可以少得海雲台！「海雲台海水浴場」沙灘全長1.5公里，佔地58,400平方米。呢度嘅靚景同每年都會舉辦嘅慶典吸引到大量韓國人同遊客慕名而來，特別夏天嘅時候真係超熱鬧！周邊亦都有好多酒店同高樓大廈，現代建築配上一望無際嘅海景，真係冇得輸！
13. 廣安里海邊主題街（광안리해변 테마거리）
- 地址：부산광역시 수영구 민락동
한국관광공사
釜山最有代表性嘅海水浴場除咗上面介紹嘅海雲台海水浴場，仲有「廣安里海水浴場」！呢度一年四季都會舉辦各種慶典，吸引非常多來自世界各地嘅觀光客到訪，而附近嘅「廣安里海邊主題街」更加可以話係年輕人嘅聖地！呢條街係一條行人專用街道，分成幾個主題，充滿異國風情，大家喺海水浴場睇完海景影完相記住要去埋啦~
14. Space Walk（스페이스워크）
- 地址：경상북도 포항시 북구 환호공원길 30
- 開放時間：
平日 | 週末及公眾假期 | |
3~11月 | 10:00 ~ 20:00 | 10:00 ~ 21:00 |
12~2月 | 10:00 ~ 17:00 | 10:00 ~ 18:00 |
*落雨、強風、酷熱或嚴寒天氣、颱風時將不開放。
- 費用：免費
位於浦項嘅「Space Walk」高25m，可以一邊行超刺激天空步道，一邊欣賞海景。而且呢度安全設備齊全，所以就算有海風吹緊，大家都可以放心行。
15. 壽城池遊園區（수성못 유원지）
*同時為21/22韓國百大觀光景點之一
- 地址：대구광역시 수성구 용학로 35-5
「壽城池」係去大邱旅行必去景點之一，呢度一年四季無論咩時候都有超多人喺度散步！遊園區入面除咗壽城池之外，仲有一個叫壽城樂園嘅地方，裏面有各種簡單遊樂設施可以玩。大家仲可以搭遊覽船、踩鴨仔船，同欣賞音樂噴泉表演，超啱一家大細或者情侶們嚟！（小編私心推薦，呢度睇櫻花好靚㗎！）
16. 大邱西門市場 & 夜市場（대구 서문시장 & 서문시장 야시장）
*同時為21/22韓國百大觀光景點之一
- 地址：대구광역시 중구 큰장로26길 45
- 開放時間：09:00 - 19:00（每個月第一、三個星期日休息）
有去過大邱嘅朋友們都知道，「西門市場」係大邱最出名同最大嘅傳統市場。 同平時大家認知嘅韓國傳統市場一樣，入面有買新鮮蔬果、乾貨、生活用品等等，大家可以買啲返去做手信！除此之外，當然唔少得街頭小食啦~ 呢度好多攤位都有賣大邱特有嘅美食，一場嚟到大邱就當然要去試啦！
17. 大邱東城路（대구 동성로거리）
- 地址：대구광역시 중구 동성로2길 27
「東城路」係全大邱最旺嘅地區，可以話係大邱嘅市中心，百貨公司、購物商場、餐廳、學院等等應有盡有，而且交通勁方便！去大邱玩，想體驗年輕活力嘅氣氛，建議大家一定要去東城路行返轉~
18. 大邱前山公園（대구앞산공원）
- 地址：대구광역시 남구 앞산순환로 574-87
- 費用（纜車）：
單程 | 成人 | ₩7,500 |
小童 | ₩5,500 | |
來回 | 成人 | ₩10,500 |
小童 | ₩7,500 |
한국관광공사
前山係大邱最出名嘅一座山，而「大邱前山公園」更加係大邱市內最大嘅城市自然公園，佔地超過1,600萬平方米。韓劇《金秘書為何那樣》亦都有嚟過拍攝，一場嚟到就梗係要搭埋纜車，喺高空度欣賞吓前山同埋成個大邱嘅靚景啦！
19. 鬱陵島（울릉도）
*同時為21/22韓國百大觀光景點之一
- 地址：경상북도 울릉군 도동2길 66 울릉군청
한국관광공사
「鬱陵島」係韓國第7大島嶼，因火山活動而形成，總共有44座附屬島。呢度亦被譽爲攀石聖地，上到山頂就可以睇到一覽無遺嘅風景！呢度嘅居民為咗方便生活，到目前為止重新鋪咗9條路，大家可以跟住呢幾條路散步，間接體驗以前鬱陵島居民嘅生活，同時欣賞壯觀嘅大自然景色。
20. 獨島（독도）
*同時為21/22韓國百大觀光景點之一
- 地址：경상북도 울릉군 울릉읍 독도이사부길 55
「獨島」係位於韓國最東邊嘅火山島，由兩個大島（東島、西島）同36個細石島組成，海蝕階地同海蝕崖地形發達，被韓國政府指定為自然紀念物。不過因為每日可以登上獨島嘅人數有限，所以要去獨島唔係一件簡單嘅事。
21. 慶州佛國寺（경주 불국사）
*同時為19/20、21/22韓國百大觀光景點之一
- 地址：경상북도 경주시 불국로 385
- 開放時間：平日 09:00 – 17:30、 週末及公眾假期 08:00 ~ 17:30（最後離場時間 19:00）
- 費用：成人 ₩6,000、青少年 ₩4,000、小童 ₩3,000、7歲以下幼童 ₩2,000
「佛國寺」位於千年古都慶州，係韓國人講起慶州一定會諗起嘅景點之一。呢度被稱為佛教烏托邦，亦都被指定為聯合國世界文化遺產。寺廟、石塔、石橋，加上四周圍大自然風景，就好似一幅畫咁靚！
22. 慶州石窟庵（경주 석굴암）
*同時為 19/20、21/22韓國百大觀光景點之一
- 地址：경상북도 경주시 불국로 873-243
- 開放時間：平日 09:00 ~ 17:30、 週末及公眾假期 08:00 ~ 17:30（最後離場時間 18:30）
- 費用： 成人 ₩6,000、青少年 ₩4,000、小童 ₩3,000
被指定為聯合國世界文化遺產嘅「石窟庵」喺韓國新羅時期751年開始施工，用咗23年興建而成。最特別嘅地方在於圓形構造嘅主室使用咗超過360嚿石頭堆砌而成，係當時全世界第一個使用呢種技術嘅建築。
23. 慶州大陵苑（경주 대릉원 일원）
*同時為19/20韓國百大觀光景點之一
- 地址：경상북도 경주시 계림로 9
- 開放時間：09:00 - 22:00
- 費用：[天馬塚入場費] 成人 ₩3,000、青少年 ₩2,000、小童 ₩1,000
如果有關注過韓國旅行熱點，大家可能都會聽過「大陵苑」呢個地方。韓國皇帝嘅墳墓全部都係好似上面張相咁，淨係睇外觀會覺得係一個小山丘，完全唔似墳墓，好多韓國人嚟慶州玩都會專程嚟呢度影相打卡。大陵苑古墳群之中，「天馬塚」係唯一一個開放俾公眾參觀嘅墳墓，而且有好多歷史文物都係喺呢度發掘出嚟。想知道韓國皇室墳墓入面會有啲咩，就記住要嚟參觀啦！
24. DPIRANG（디피랑）
- 地址：경상남도 통영시 남망공원길 29
- 開放時間：
3~4月、9月 | 19:30 - 24:00 |
5~8月 | 20:00 - 24:00 |
10~2月 | 19:00 - 24:00 |
*逢星期一、1月1號、年初一及中秋當日、公眾假期翌日關閉。
- 費用：成人 ₩15,000、青少年 ₩12,000、小童 ₩10,000
한국관광공사
「DPIRANG」係一個位於南望山公園嘅夜間數碼主題公園，園區入面總共有15條唔同主題嘅散步徑，融合燈光同夜景，吸引好多當地市民夜晚嚟參觀同散步。
25. 長生浦鯨魚文化村（장생포 고래문화마을）
- 地址：울산광역시 남구 장생포고래로 271-1
- 開放時間：09:00 – 18:00（最後售票時間 17:30），逢星期一、年初一、中秋節當日休息
- 費用：文化村入場費 2,000（其他博物館、體驗館等設施需要另外買飛）
한국관광공사
「長生浦鯨魚文化村」喺2015年興建而成，還原咗以前長生浦漁村嘅樣貌。文化村主要設施有長生浦懷舊村、鯨魚雕像公園、鯨魚故事路、觀鯨路同史前時代鯨魚區，推薦一家大細嚟蔚山玩嘅時候可以plan埋呢個文化村落行程入面~
26. 大王岩公園（대왕암공원）
*同時為21/22韓國百大觀光景點之一
- 地址：울산광역시 동구 등대로 95
- 開放時間：每個設施開放時間不一
要數到韓國太陽最早升起嘅地方，一定唔可以唔提到蔚山「大王岩公園」！呢個公園位於韓國東南端，佔地超過900,000平方米。大王岩公園有4條散步徑，包括海邊散步徑、松林散步徑、四季散步徑同傳説岩石散步徑，無論行邊條路都可以睇到翠綠嘅樹林、蔚藍嘅大海同奇特嘅岩石，真係超壯觀！
27. 太和江國家庭園（태화강 국가정원）
*同時為21/22韓國百大觀光景點之一
- 地址：울산광역시 중구 태화강국가정원길 154
太和江係一條橫穿蔚山市中心嘅江水，而「太和江國家庭園」係一個將長期被忽視嘅平原重新規劃之後建成嘅公園，佔地53.1平方公里，係汝矣島公園嘅2.3倍！
28. 竹邊海岸Skyrail（죽변해안스카이레일）
- 地址：경상북도 울진군 죽변면 죽변중앙로 235-8
- 開放時間：
平日 | 09:30 - 18:00（最後售票時間 17:30） |
週末及公眾假期 | 09:00 - 18:30（最後售票時間 18:00） |
- 費用：[1-2人] ₩21,000、[3人] ₩28,000、[4人] ₩35,000
한국관광공사
由竹邊港出發嘅「竹邊海岸Skyrail」無人駕駛單軌列車會沿著東海海岸行駛，全程需時大約1個鐘頭（2.4km）。望出窗外面就可以睇到寶藍色嘅大海，加埋附近嘅自然景觀，天氣好嘅時候嚟相信一定會係一個難忘經驗。
29. 居昌抗老化Healing Land（거창 항노화힐링랜드）
- 地址：경상남도 거창군 가조면 의상봉길 830
- 開放時間：09:00 - 18:00（逢星期一休息）
- 費用：[入場費] 3,000 [山林浴] 成人 5,000、青少年及小童 3,000
「居昌抗老化Healing Land」位於牛頭山海拔1,046米位置，係一個可以療癒身心靈嘅地方。大家可以遠離塵囂，喺森林入面散步同進行體驗活動，享受森林浴 。呢度更加有全韓國第一座三岔吊橋，橋下面完全冇任何支撐物，大家有機會一定要嚟體驗吓！
30. 聞慶丹山單軌列車（문경단산 모노레일）
- 地址：경상북도 문경시 문경읍 활공장길 106
- 開放時間：[4~10月] 09:00 - 18:00、[11~3月] 09:30 - 17:00
- 費用：
單程 | 來回 | |
成人 | ₩8,000 | ₩14,000 |
青少年、老人家 | ₩7,000 | ₩12,000 |
小童 | ₩6,000 | ₩10,000 |
「聞慶丹山單軌列車」路線來回總長3.6公里（大約需時1個鐘），大家可以欣賞到白頭大幹山脈嘅震撼景色。山頂更加有露營場、雪橇場等等嘅設施，仲可以玩滑翔傘！
31. 嶺南阿爾卑斯（영남 알프스）
- 地址：울산광역시 울주군 상북면 알프스온천5길 103-8
- 開放時間：[登山徑] 24小時、[複合迎賓中心] 星期二至日 09:00 - 22:00
- 費用：[登山徑] 免費、[複合迎賓中心] 各設施費用不一
한국관광공사 - @다님 5기 서인호
「嶺南阿爾卑斯」橫跨蔚山、密陽、梁山、清道同青州，總共有九座海拔1,000米以上嘅山脈，總面積為255平方公里。呢度一年四季風景都超靚，不過最吸引人嘅相信會係秋天，因為呢度周圍都會生滿芒草，勁夢幻！嚟到可以行山，去溪谷玩之餘，仲可以去玩滑翔傘，俯瞰超壯觀山景！
32. 唐項浦旅遊區（당항포관광지）
- 地址：경상남도 고성군 회화면 당항만로 1116
- 開放時間：[3~10月] 09:00 - 18:00、 [11~2月] 10:00 - 17:00（逢星期一休息）
- 費用：成人 ₩7,000、青少年 ₩5,000、小童 ₩4,000
「唐項浦旅遊區」位於固城郡唐項灣，呢度係以前唐項浦海戰嘅時候李舜臣將軍率領大軍贏得勝利嘅地方。為咗紀念李舜臣呢個咁重要嘅人物，呢度有佢嘅祠堂、紀念館同大捷塔，旅遊區入面亦都有冒險遊樂場同海洋休閒運動設施，仲有一條海岸步道，相信一家大細嚟都會玩得開心。
33. 金海加耶主題公園（김해가야테마파크）
- 地址：경상남도 김해시 가야테마길 161
- 開放時間：09:30-18:00（最後售票時間為關閉前1小時）
- 費用：[門票] 成人 ₩5,000、青少年 ₩4,000、小童 ₩3,000（可以額外加購其他體驗活動）
「金海加耶主題公園」旨在為市民提供一個休憩空間，亦都係一個寓教學於娛樂嘅複合文化空間，令所有入場人士可以通過各種體驗同展覽瞭解韓國歷史。前幾年更加新增咗在一個極限運動區，大家可以體驗72種高空活動，包括高空踩單車同玩高空滑索等， 啱曬鍾意刺激嘅你。
34. 黃梅山郡立公園（황매산군립공원）
*同時為21/22韓國百大觀光景點之一
- 地址：경상남도 합천군 가회면 황매산공원길 4
- 開放時間：根據天氣及季節可能會有變，詳情請參考公園網頁
「黃梅山」係太白山脈最後一座險峰，同加耶山一齊被列為陜川郡兩大名山。呢度一年四季景色都各有特色，深受行山人士歡迎，亦都有好多家庭會weekend嚟呢度呼吸新鮮空氣。而且呢度更加有3個文化遺跡，大家有機會嚟到記住要去睇吓啦~
35. 周王山國立公園（주왕산국립공원）
- 地址：경상북도 청송군 주왕산면 공원길 169-7
- 開放時間：日落之後至日出前2小時嚴禁進入
한국관광공사
「周王山」係韓國三大岩山之一，喺1976年被指定為韓國第12個國立公園，總佔地超過105平方公里。呢度有4個瀑布、山洞、大典寺同佛庵，鍾意大自然或者係行山發燒友嘅你一定要嚟參觀！
36. 注山池（주산지）
- 地址：경상북도 청송군 주왕산면 주산지리
한국관광공사
「注山池」係一個位於「周王山國立公園」入面嘅蓄水池，呢度亦都被被指定為青松國家地質公園。水池加上附近嘅岩石同樹林，形成獨特靚景，每個季節嚟都可以見到唔同嘅景色，獲得青龍電影獎最佳電影嘅 《春去春又來》仲曾經喺呢度取過景添！
37. 紹修書院（소수서원）
- 地址：경상북도 영주시 순흥면 소백로 2740
- 開放時間：
3~5月、9~10月 | 09:00 - 18:00（最後入場時間 17:00） |
6~8月 | 09:00 - 19:00（最後入場時間 18:00） |
11~2月 | 09:00 - 17:00（最後入場時間 16:00） |
- 費用：成人 ₩3,000、青少年 ₩2,000、小童 ₩1,000
位於榮州嘅「紹修書院」係韓國第一間賜額書院（由皇帝親自賜贈牌匾嘅書院），呢度每棵樹平均都有300~500年歷史，加上環繞書院嘅溪水同涼亭，幽靜嘅環境真係令人非常放鬆。紹修書院更加被指定為聯合國世界文化遺產，想遠離塵囂，呼吸新鮮空氣，大家可以選擇嚟呢度~
38. 晉州城（진주성）
*同時為19/20韓國百大觀光景點之一
- 地址：경상남도 진주시 남강로 626
- 開放時間：
3~10月 | 05:00 - 23:00 |
11~2月 | 05:00 - 22:00 |
售票處 | 09:00 - 18:00 |
- 費用：成人 ₩2,000、青少年 ₩1,000、小童 ₩600
한국관광공사
晉州喺韓國歷史入面扮演著非常重要嘅角色，有好多歷史大事都係喺呢個地方發生。當時為咗抵禦倭寇，皇帝決定要將「晉州城」嘅城牆轉成用石頭堆砌，最後亦都真係成功保護到呢個地方。城入面有彰烈祠、國立晉州博物館、護國寺、戶外表演場等等嘅地方，鍾意韓國歷史嘅你真係要嚟一次！
39. 余佐川（여좌천）
- 地址：경상남도 창원시 진해구 여좌천로 16
한국관광공사
位於鎮海嘅「余佐川」可以話係全韓國最出名睇櫻花嘅景點！自從韓劇《羅曼史》 喺呢度取過景，呢度就成為韓國人心目中睇櫻花TOP1嘅地方，每年4月呢度就會變身成為一條櫻花隧道，真係勁靚勁浪漫！
以上就係韓國觀光公社評選出嘅2023/2024韓國百大景點入面位於慶尚道嘅地方，下次嚟韓國旅行就唔單止可以去首爾啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
