喺「仁川連喜自然公園」野餐
韓國野餐勝地唔再只係得漢江同首爾林！仁川青羅連喜自然公園一樣都係打卡超靚！
Hello，大家好，我哋係由韓國人每日提供最新韓國旅行資訊嘅Creatrip。
唔知大家有冇聽過青羅連喜自然公園呢？呢個地方位於仁川亞運主體育場對面，呢度環境清幽、裡面有好多各式各樣生態空間，可以俾市民享受好好放鬆，如果特突去可能會覺得好遠，所以順便野餐咁就Very Good啦！
仁川「青羅連喜自然公園」野餐介紹
1. CAFE MFT（카페엠에프티）
- 地址：인천 서구 청라라임로122번길 13
- 營業時間：11:00 - 21:00（ Last Order 20:30）、麵包出爐時間12:00 - 13:00
- 野餐組合租借時間：12:00 - 20:00、超過每1小時須額外支付₩5000
- 預約方式：官方Instagram
價格 | 包含內容 |
野餐墊組合（메트세트） ₩20,000（兩人） | 野餐墊、竹籃、親環境保溫杯、塑膠紅酒杯、英文書、鏡、花束 加購：籐製檯₩3,000、籐製檯（小）₩2,000 |
迷你摺檯組合（미니테이블세트） ₩24,000（兩人） | 迷你摺檯、櫈（有椅背）、竹籃、親環境保溫杯、塑膠紅酒杯、英文書、鏡、花束 1人份加購₩10,000：櫈（有椅背）、塑膠紅酒杯、英文書、鏡、花束 |
檯櫈組合（테이블세트） ₩25,000（兩人） | 摺檯櫈、竹籃、親環境保溫杯、塑膠紅酒杯、英文書、鏡、花束 1人份加購₩10,000：摺檯櫈、塑膠紅酒杯、英文書、鏡、花束 |
備註：租借野餐組合會附凍/熱美式咖啡，會用包溫杯裝，如果想換其他飲品需補差額，另外係會用杯裝提供。 唔需要俾訂金，但建議提前會比較好，等老闆有準備時間。 | |
CAFE MFT係喺安靜住宅區入面，店名係英文「My Favorite Thing」縮寫，暖黃色大門相當引人注目，令人經過時都忍唔住望多兩眼。
入到去會發現呢度係用咗純白簡潔風格去裝修，內部好闊落，俾人一種好舒服嘅感覺，令人好想留喺度唔走...
呢度每一個角落都有唔同配色、裝飾，好有格調同氣氛。
櫃檯一邊會擺咗唔同大細竹籃同裝飾品，大家可以揀鍾意嘅款式，或者由老闆隨機分配。
每個竹籃內基本會附上花、鏡、英文書等增添野餐氛份嘅小道具，用咗影出嚟嘅效果真係差好遠，想影靚相呃Like，你知點做啦！
櫃上有一排保溫杯，如果租借野餐套組嘅話，會用嚟裝美式咖啡，但如果想轉其他飲品，裡面會變成水。
門口位置放咗唔同顏色木製檯櫈，唔好睇佢細細張，拎起嘅時候原來都幾重。
布甸係呢度最出名嘅甜品，不過小編當日晏晝去到，似乎仲未準備好，所以選擇唔算多。
最後小編揀咗檯櫈組合，飲品係即叫即做，所以需要等一陣。
準備好哂就可以去連喜公園，如果係行路大約行15分鐘，不過如果大家手上拎太多嘢，可以叫的士，10分鐘內就到，價錢同起標價差唔多。
2. 青羅連喜自然公園（청라 연희자연마당）
- 地址：인천 서구 용두산로 156
連喜公園就係喺仁川亞運主體育場對面，可能大家都係第一次聽，但其實呢度係非常有教育意義嘅生態公園。
上圖係連喜公園地圖，藍色路線係比較適合遊客去，唔少人會喺「自然庭園」野餐，如果有帶小朋友去玩，可以去「小朋友遊樂區」。
呢度面積有一百萬平方公米大，裡面有自然學習中心、小朋友遊樂區、蓮花池、觀景台等。
以前仁川連喜洞係一個廢棄材料冇人理嘅地方，但經過環境部重建後，呢度變為一個生態公園。
一直行會發現小朋友遊樂區，呢度有瀡滑梯同戲沙區，一邊仲有韓式小涼亭，玩到攰都可以坐底休息。
自然庭園係水草植物天堂，湖面上可以見到綠油油樹嘅倒映，超治癒。
連喜公園有蓮花池，不過小編去嘅當日只係得一片綠油油草地，不過咁樣睇仲有種似返鄉下嘅田野。
蓮花池再行前少少就會見到稻田。
沿住龍頭山路行，會有大樹遮蔭，行到攰仲可以坐喺長櫈休息。
呢個方向仲可以遠望到仁川亞運主體育場，同純樸自然景觀相映成趣、做咗一個對比。
最後小編喺自然庭園搵到一個幾唔錯嘅位，將啱啱喺Cafe租嘅野餐組合佈置好，之後就可以影靚相啦！ 加上可能係平日去，唔算多人，坐喺度安安靜靜睇書好舒服。
無花果忍廉芝士金磚蛋糕（무화과크림치즈 휘낭시에）₩3,000
無花果忌廉芝士金磚蛋糕口感好軟熟，除咗好香濃忌廉香之外，上面仲放咗無花果果粒，食落口感豐富。
青檸梳打（청귤에이드）₩6,000
青檸酸酸甜甜，好適合炎炎夏日飲嚟消暑，而且大大杯，飲完超滿足。
西柚梳打（자몽에이드）₩6,000
西柚梳打漸層外觀真係好靚，西柚味香甜，完全唔會酸，每一啖都會飲到果粒，可以話係物超所值。
連禧公園係一個好適合想親近大自然、同親子互動好地方，但唯一要提提大家係公園會貼有「小心蛇出沒」招牌，所以去嘅時候一定要注意安全。
之後去野餐，除咗漢江同首爾林之外，大家又會唔會考慮去埋仁川連喜公園呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
