仁川松島咖啡廳｜The Cafe Cookie
仁川松島天然食材手作曲奇體驗！嚟「The Cafe Cookie」整返一個獨一無二嘅曲奇啦！
Hello，大家好，我哋係由韓國人每日提供最新韓國旅行資訊嘅Creatrip。
唔知大家仲記唔記得小編之前介紹過，仁川新興景點「松島」呢？呢度除咗有必食壽司店之外，今次小編想介紹埋適合一家大細，或者好朋友、情侶嚟體驗嘅手作曲奇Cafe，有興趣嘅朋友，就要繼續睇落去啦！
因為韓國疫情擴散，入場人數及營業時間可能會受到限制，可能需要提供疫苗護照。
有關韓國防疫政策文章, 可以查看韓國最新防疫守則。
仁川松島咖啡廳「The Cafe Cookie」資訊
- 地址：인천 연수구 신송로 153, 6F 605, 606호
- 營業時間：10:00 - 21:00、逢星萬日休息
- 體驗時段：星期一至六10:30、13:00、15:30、18:00（請以系統顯示為主）
- 小Tips：仁川地鐵1號線大學城站（캠퍼스타운역）4號出口出嚟之後，搭6-1號、41號巴士坐大約5分鐘就會到。
仁川松島咖啡廳「The Cafe Cookie」推薦理由
- The Cafe Cookie使用有機小麥、天然麵粉、100%國產牛奶牛油進行製作，保證無添加乳化劑、防腐劑等有害身體物質，大人同細路食得好安心。
- 喺日常生活中，可以利用健康麵團，製作出獨一無二多色手作曲奇，增添生活樂趣，令親子、情侶之間感情升溫。
- 12歲以下兒童可以免費使用The Cafe Cookie遊戲室，呢度不定期會舉辦教育講座，係對幼兒、青少年、身心障礙者相當友善嘅社會企業。
仁川松島咖啡廳「The Cafe Cookie」方案
手作曲奇體驗
- A Set：4個麵團、有機果汁/美式咖啡2選1、包裝材料
- B Set：8個麵團、包裝材料
- C Set：5塊曲奇、美式咖啡/茶/提子汁/果汁中4選2
₩17,000/每人 |
糖霜曲奇體驗
- 聖誕節：8塊曲奇、6罐糖霜、食用珍珠
- 恐龍：7塊曲奇、6罐糖霜、食用珍珠
- 加油吧，大韓民國：6塊曲奇、6罐糖霜、食用珍珠
- 人物：8塊曲奇、6罐糖霜、食用珍珠
₩21,000/每人 |
仁川松島咖啡廳「The Cafe Cookie」注意事項
- 至少要提前2日預約。可以預約時間為星期一至六10:30、13:00、15:30、18:00，請以系統顯示為主。
- 預約時，請選擇體驗日期、時間以及方案，再準確輸入預約相關資訊，並完成付款，我哋會喺兩個工作天內確認你嘅訂單。
- 可以喺體驗日3日前取消及退款，如果過咗時間就冇得退，有任何疑問，請send email到help@creatrip.com。
- 體驗以人頭計算，30個月以上小童即算一位，家長帶小朋友去體驗，家長唔一定要參與（例如媽媽帶一位小朋友，體驗方案可以揀+1或+2）。
- 但如果係青少年、情侶等共同前往（冇小朋友同行），每位大人都需預約至少一項方案進行體驗。
- 行程體驗時間大約2小時（1.5小時製作、0.5小時烘焙）。
- 手作曲奇因為無添加防腐劑，喺室溫下最多保存三日，請儘快食用完，或者放入雪櫃保管。
- 體驗嘅時候唔會用到危險器具，所以先會冇年齡限制，請自行評估幼兒狀況係唔係適合參加。如果因為個人突發狀況而臨時取消，恕唔會提供保留或退款要求。
- 烘焙坊講師只可以用韓文溝通。
仁川松島咖啡廳「The Cafe Cookie」介紹
「The Cafe Cookie」喺松島運河步行街附近，係一間使用有機小麥、天然麵粉、100%國產牛奶牛油，無添加任何對人體有害物質手作曲奇Cafe。
店內空間大，而且採光好，老闆不定時仲會喺度舉辦同曲奇有關嘅職場講座、幼兒創意力訓練、身心障礙者職場培養，目的係為咗打造友善社區、為社會作出貢獻。
店入面仲設有12歲或以下小兒童免費使用遊樂空間，等小孩子除咗可以體驗手作曲奇樂趣之外，仲可以喺遊樂空間度過歡樂時光。
如果唔想自己做曲奇，單純想飲杯咖啡休息嘅話，呢度都有好多健康手作曲奇俾大家揀。
脆片一共有12個口味，當中包括朱古力、芝士、抹茶、紫薯、紅菜頭、芒果、甜南瓜、彩虹、抹茶朱古力、蔓越梅、堅果朱古力到純朱古力等等，每款都好嚟引，令人十五十六揀邊款好。
除咗可以單買曲奇之外，The Cafe Cookie仲有提供一組12個₩18,000禮盒，五顏顏色配上多種豐富口味，無論係自用定係送禮都好唔錯。
呢度糖霜曲奇，老闊會事先準備好曲奇原型，大家只要喺上面畫鍾意嘅顏色同表情就可以，非常簡單。
thecafecookie
呢度有恐龍組合、聖誕節組合，以及以韓國為主題嘅糖霜曲奇等等，多樣又有趣嘅製作過程，可以透過Youtube Chennel，跟住一齊學同整。
櫃台上仲會擺The Cafe Cookie老闆呢幾年嚟得到嘅獎狀同證書，可以睇得出，老闆真係好致力於社會教育、打造愛心事業。
小編今次揀咗「手作曲奇體驗B Set」，一共有8個麵團（7種顏色），綠色係抹茶、咖啡色係朱古力、紫色係紫薯、白色係無農藥韓國小麥、紅色係紅菜頭、橙色係芝士、黃色就係甜南瓜（會有2個），同時附上教材、模具、三張烘焙紙、畫畫筆、朱古力粒、五彩朱古力等材料。
準備好哂之後，老闆就會嚟講解製作流程，雖然老闆只係識韓文，但製作方式好簡單，所以唔識會韓文都唔使擔心。
製作之前，需要先洗乾淨手再抺乾，烘焙紙唔需要打開，直接喺上面製作就可以；如果想要做大圖案，一張可以做三個，如果係細嘅，記得喺作品之間留返少少空間。
製作方法有三種：依照教材製作、使用模型製作、自由創作。大家可以隨心所以做自己鍾意嘅曲奇，唯一要留意嘅就係麵團唔可以太厚，大約0.5cm厚度，係烘烤時最佳比例。
小編跟住教材整咗一個麵包超人，望落雖然簡單，但都唔太容易……事實證明想整一個可愛又靚嘅曲奇，都需要一啲天份 。
跟住小編仲自由創作整多個比卡超，用模型、英文字曲奇整咗一隻龍，如果想降低失敗率嘅話，建議大家可以直接用模具製作。
完成之後，大家記得用畫畫筆喺烘焙紙上做記號或寫名，咁樣烤完之後唔會拎錯。
體驗時間總共2小時，其中1.5小時為製作，最後0.5小時為烘烤。
喺The Cafe Cookie烤出嚟嘅成品望落好可愛，因為係自己親手整嘅曲奇，所以更有成就感，老闆會用透明膠袋同盒，幫大家裝好。
想整返一個獨一無二嘅曲奇，之後不妨就嚟The Cafe Cookie體驗吓啦！
仁川「The Cafe Cookie」前往方法
大學城站4號出口出嚟之後，一直直行去到斑馬線。
過馬路之後轉左（往GS25方向）。
直行2分鐘會見到巴士站，搭6-1或41。
落車之後直行轉左。
過兩個馬路後會見到「Ceragem Well Cafe」。
直行見到CU，隔離就係入口。
搭Lift上6樓。
一出嚟就會見到「The Cafe Cookie」喺左手邊。
仁川「The Cafe Cookie」
以上係仁川松島咖啡廳「The Cafe Cookie」嘅介紹，有任何問題請先詳讀呢篇文章。
如果睇完之後有任何疑問，或者我哋語言、標示唔清嘅話，麻煩請send email告知，以方便我哋改進。
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
