大邱賞紅葉景點推介
韓國人最常去嘅大邱賞紅葉地方大公開！保證一定可以影到靚相！
Hello，大家好，我哋係由韓國人每日提供最新韓國旅行資訊嘅Creatrip。
唔知大家最鍾意邊一個季節去韓國旅行呢？小編認為秋天係最適合，因為天氣好，唔會太熱或者太凍，而且喺呢個時候嚟，仲可以望到最靚嘅紅葉景色，今日小編想同大家介紹大邱賞紅葉嘅好地方，有計劃之後去大邱旅行嘅朋友都可以參考吓。
1. 桐華寺（동화사）
- 地址：대구 동구 동화사1길 1
- 開放時間：10:00 - 18:00
- 入場費：成人₩2,500、青少年₩1,500、兒童₩1,000（泊車費用₩2,500）
第一個賞紅葉嘅好地方係桐華寺，佢係大邱代表性寺廟之一。 只要一到秋天，唔少市民就會專程嚟睇紅葉同打卡。
一入到去就會感受到秋天氣息，呢度嘅紅葉真係好靚，配合埋藍天白雲一齊影相，完全係冇輸。
呢度真係每一個位都超好影，左邊係紅葉水庫，右邊就係八公山。
入到去會見到一個寺廟，喺度大家會覺得心好平靜好舒服。寺廟被紅葉圍住，係唔係好靚呢？
另外呢度仲有一棵許願樹，小編寫咗希望可以健康同幸福，唔知大家又會有咩願望呢？
除咗紅葉之外，喺秋天菊花都會開得好靚，呢度樓梯都有擺咗菊花盤，相當靚同可愛。
如果想搵一個好靜嘅環境，可以邊散步邊睇紅葉嘅朋友，桐華寺絕對係大家嘅首選。
2. 漆谷村（옻골마을）
- 地址：대구광역시 동구 해안동 옻골로
- 開放時間：00:00 - 24:00 （因為嗰度仲有人居住，建議唔好太遲先去！）
- 入場費：免費
第二個賞紅葉嘅好地方就係漆谷村，呢個係朝鮮時代慶州崔氏居住嘅村莊，有20幾個韓屋。
慶州崔氏身於慶尚道，係著名學者世家，佢哋專係幫助生活有困難嘅人，佢哋喺蔚山、慶州、大邱等唔同地區都有村落喺度定居，其中今次小編想帶大家去到大邱嘅漆谷村。
由入口入去，已經可以見到一棵有400年歷史嘅櫸樹歡迎大家，一直沿着路入去，聽講可以幫大家消除晒所有負能量。
大家覺唔覺得好似彷彿置身於朝鮮時代，好似拍劇會出現嘅地方呢？呢度大家可以同居民一樣自由自在咁行嚟行去，不過因為有人住緊，大家千祈唔好行入屋到。
漆谷村以土牆、石牆保存得好而聞名，亦係呢度嘅特色，展現朝鮮時代生活過嘅痕跡，所以被登記爲韓國文化遺產！
聽講呢度四季都有唔同景色，無論咩時候去都好靚，另外大家仲可以感受到以前韓國人係點生活。（當中小編最推薦秋天去。）
3. 八公山噴水廣場（팔공산 분수광장）
- 地址： 대구광역시 동구 용수동 27-5
- 開放時間：00:00 - 24:00
- 入場費：免費
大邱最具代表欣賞美景嘅地方又點可以唔睇八公山？就算唔使行都想去，都可以欣賞最靚嘅風景。
尤其只要一到春天天同秋天，就會變成影櫻花同紅葉嘅盛地，好多人都會專程嚟打卡。
好多人為咗可以睇到最靚嘅紅葉，都會用幾個鐘行上八公山。不過今日小編想介紹嘅地方係唔需要行得咁辛苦，但又可以睇到最靚嘅紅葉！
當時小編親自去到嘅時候，見到有唔少情侶或者家庭都會鋪席喺紅葉樹下休息，大家之後會唔會都想試吓呢？
呢度係八公山噴泉廣場，靜得嚟又夠浪漫，同小編啱啱介紹嘅桐華寺好近。
4. 八公山循環道路（팔공산 순환도로）
- 地址：파계사 삼거리~팔공cc 삼거리
- 開放時間：00:00 - 24:00
- 過路費：免費
- 交通：搭漆谷3號巴士（칠곡3번）、101號巴士、急行1號巴士（급행1번）、八公1號、2號、3號巴士（팔공1,2,3번）
除咗可以揀行路上山，揸車或者搭巴士或的士都一樣可以沿路睇到美景。
呢一條道路係想介紹俾想舒舒服服睇到紅葉嘅朋友，只要坐住交通工具就睇到，而且呢條路仲會經過桐華寺同八公山噴水廣場。
由把溪寺三岔路口到八公cc三岔路口長約8-9km，被國土交通省選定為韓國風景道路，聽到呢度會唔會心郁郁之後想去一轉呢？
小編決定今次開車去睇，沿途可以望到好多紅葉同銀杏樹。
如果大家有時間，好像推薦大家嚟揸轉影靚相。
5. 啟明大學 城西校區（계명대학교 성서캠퍼스）
- 地址：대구광역시 달서구 신당동 달구벌대로 1095
- 開放時間：00:00 - 24:00
大家可能會覺得點解要去學校影？不過呢度係一個好特別影紅葉嘅地方。
因為呢度有唔少韓劇、廣告、MV都鍾意嚟呢度取景，而早前韓劇《意外發現的一天》都嚟過！
只要嚟到都會感受到電影或者韓劇入面嘅氣氛，真係好羨慕喺度讀書嘅學生。
當年《花樣男子》嘅神話學院就係喺呢度拍，大家又有冇印象呢？
當時韓劇《陽光先生》，高愛信（金泰梨飾）為咗學英文，仲搵咗一間學堂，嗰度其實就係啟明大學嘅韓學村。
唔單只係韓劇鍾意嚟取景，喺度散步都係一個唔錯嘅地方。
之前SEVENTEEN拍《MANSAE》 Part Switch Ver. 都係喺啟明大學拍，成員仲著住校服，好青春啊！
啟明大學校區好大，而且仲有好多好靚嘅紅葉，可以喺度邊散步邊影靚相。
6. 虎山公園（호산공원）
- 地址：대구 달서구 달서대로109길 70
- 開放時間：00:00 - 24:00
- 入場費：免費
如果行完啟明大學，可以順便去埋虎山公園，由正門行過去只係需要7至8分鐘左右。
呢度周圍都比紅葉圍住，聽住紅葉跌落地嘅聲音，感覺好療癒。
呢度除咗係一個公園，唔單止係大邱市民，仲係好多韓國人都會嚟睇紅葉嘅聖地。
大家可以匿喺樹嘅後面，只係伸個頭出嚟影返幅，相當可愛！
沿路一直行會睇到唔同嘅風景，大家都嚟感受一下被紅葉圍住嘅感覺啦！
7. 大邱樹木園（대구 수목원）
- 地址：대구 달서구 화암로 342
- 開放時間：09:00 - 18:00
- 入場費：免費
最後一個地方嚟到樹木園，呢度係大邱市中心可以享受大自然嘅地方。
因為可以免費入場，同時泊車夠方便，所以唔單止係大邱市民，就連遊客都會喺去打卡，特別係有櫻花或紅葉嘅時候！
只要一到秋天，呢度就會有盛大嘅菊花節，可以睇到超靚紅葉之如，仲可以欣賞埋菊花。
利用菊花會整成唔同嘅圖案，相當可愛！
之後如果係秋天去大邱，上欣賞到最靚嘅紅葉，不妨可以參考以上嘅地方。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
