大邱特別旅行體驗
大邱多款特別旅行體驗，唔單可以跳笨豬跳，仲可以自己親手整炸雞？
Hello，大家好，我哋係由韓國人每日提供最新韓國旅行資訊嘅Creatrip。
每次嚟旅行都只係去首爾？開始覺得有啲悶想試吓去其他地方？小編推薦大家可以去大邱！嗰度有好多特別嘅體驗，唔單只當地人鍾意，就連遊客都會專登去嗰度玩！而家就等小編整理一下有邊啲值得大家去玩啦！
大邱特別體驗
1. 大邱83塔Sky Jump （83타워 스카이점프）
- 地址： 대구광역시 달서구 두류동 두류공원로 200
- 營業時間：週末 12:00 - 19:00
- 價格：成人 : ₩50,000、青少年₩40,000、情侶₩80,000
- 語言：韓文
- 預約方式：Naver預約（如果冇事前預約，可以現場買飛）
- 注意事項：身高需150cm以上，體重120kg以下。
可能大家都有聽過大邱嘅83塔，高202米，喺呢度大家可以玩到笨豬跳！鍾意刺激嘅你絕對唔可以錯過。
大家可以喺大邱主題公園E-world度搵到83塔，大家只要認住上圖，之後上4樓就會見到售票區。
如果冇事前預約，大家都可以直接喺現場買飛，不過如果大家冇諗住體驗笨豬跳，只係想參觀嘅朋友，都可以只買一張觀景台門票（價格：₩10,000）。
搭𨋢上到77樓之後，呢度就係觀景台同笨豬跳嘅地方，大家只要向工作人員出示門票就可以入場。
83塔觀景台高123米，包含海拔高度嘅話係高231米，喺呢度可以一覽無遺咁睇哂成個大邱嘅風景！
喺體驗笨豬跳之前，一定要換上指定服裝，有唔同size，職員會幫你揀一件最適合嘅衫。
準備好之後就可以去跳啦！喺圖入面大家會見到有一條長繩，等陣小編跳落去嘅時候佢係一部好重要嘅機器。
呢個位就係小編等陣要跳落去嘅地方。
如果只係去觀景台，只可以靠玻璃窗望到出面，但嚟到玩笨豬跳，可以望到呢個景真係好靚，喺跳之前助教仲幫小編影咗張相。
原本諗住好有自信咁跳落去，但行到喺前面真係會有幾驚。大邱83塔係全世界第三高嘅笨豬跳，喺上面真係可以感受到佢嘅高度，不過最後有可靠嘅助教支持，小編先鼓起勇氣重新再挑戰！
83塔笨豬跳總共有兩種方法俾大家揀去跳，小編兩種都試咗！第一種係好似上圖咁，用繩掛落去，跳之前可以擺出一個最有型Pose去留念！
第二種就係自己直接跳落去，加埋助跑大家會跳得再遠啲，更加刺激！
雖然平時小編都唔係太鍾意玩呢種極限運動，不過83塔真係好正，以每秒9米嘅速度降落，好似真係喺天空咁飛緊。
跳完之後喺地面着陸，助教就會幫大家解開啲繩。
之後要再搭返𨋢上77樓，喺嗰度可以收到一張挑戰成功嘅證書，真係覺得好自豪！
除咗可以挑戰極限運動，同時仲可以欣賞大邱美景，真係好推薦大家一定要嚟83塔試吓！
前往方法
地鐵2號線頭流站15號出口行去E-WORLD方向，沿著E-WORLD內嘅路線行去最高嘅83塔。
噹噹炸雞主題樂園（땅땅랜드）
- 地址： 대구광역시 동구 봉무동 팔공로 220-2
- 體驗時間：星期二至日 10:00、11:00、12:00、13:30、14:30、15:30、16:30
- 所需時間：大約1個半鐘
- 價格：炸雞體驗₩17,000、炸雞&漢堡體驗₩22,000、20名以上團體/13歲以下可享8折優惠
- 語言：韓文、中文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後開始體驗。
大家平時鍾意食開嘅炸雞，其實係喺大邱誕生！喺呢度可以體驗到其他地方都搵唔到嘅「噹噹炸雞主題樂園」。
噹噹炸雞主題樂園入口，有噹噹（땅땅이）、咕咕（꾸꾸）等角色歡迎大家，係咪超可愛呢？
入面超闊落，呢度就好似一個遊樂園同一個展示廳，裡面擺設有講到噹噹同咕咕努力搵最好味炸雞食譜嘅故事。
由炸雞外賣電單車到嚟自世界各地嘅雞模型、再有埋大邱嘅老雞舍，所有同雞有關嘅，喺呢個噹噹炸雞主題樂園都有展示出嚟。參觀完展示廳，而家就去令人最期特嘅炸雞體驗啦！
呢度係整炸雞盒嘅地方，大家可以自己去design一個獨一無二嘅盒，之後再摺成盒形狀。
之後大家就可以用呢個盒去裝自己整完嘅炸雞。
呢度係整炸雞同漢堡嘅體驗空間，大家只需要圍住圓形檯坐，用呢度提供嘅食材整就可以。
呢度嘅老師好親切，佢哋講解好簡單，大家戴上膠手套同著上圍裙，跟着一步一步咁做就可以。
雖然食炸雞食過好多次，不過又自己親身體驗去整，呢個過程相當有趣。
將雞均勻地搽上面麵粉，之後就可以放入爐到炸，因為炸嘅過程好危險，所以會有專業人士嚟幫手，而大家就可以透過玻璃窗去睇炸雞過程。
呢個就係小編整嘅炸雞啦！除咗會有自己整嘅炸雞之外，呢度仲會提供一隻雞（500cc），俾大家盡情咁食。
炸完之後大家就可以坐喺呢個空間度食炸雞，因為即整即炸，又熱又脆嘅炸雞真係好好味！牆上仲有掛滿唔少之前嚟打過卡嘅朋友。
另外呢度仲有提供免費嘅汽水同咖啡，可能大家會覺得炸雞一定要配啤酒，唔知呢度有冇？唔需要擔心！呢度一杯啤酒只係需要₩2,500，大家不妨買番杯嚟配雞啤！
體驗完之後大家仲可以喺呢度買紀念品，有可愛嘅公仔、杯等。
韓國唯一可以體驗炸雞嘅主題樂園，有得食又有得玩，一家大細嚟一定會好開心🥳
前往方法
地鐵1號線峨洋橋站2號出口前面搭401、101-1、急行1號、東區8號、八公1號巴士，喺「不老洞古墳群前站（불로동고분군앞 정류장）」落車，行大約5分鐘就會到。
Kipping Class木質燈工藝（키핑클래스 무드등 공예）
- 地址： 대구광역시 중구 성내2동 중앙대로81길 14
- 體驗時間： 11:00、 14:00、 16:00、 19:00
- 所需時間：1-2個鐘
- 價格：₩35,000
- 語言：韓文、英文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後開始體驗。
之後第三個想同大家介紹嘅係呢一個Kipping Class工藝體驗課程，只需要用₩35,000，就可以整出一個令人心情變好嘅木質燈。而家就跟着小編一齊去大邱主街東城路睇吓啲手作工房啦！
Kipping Class開設各種一日體驗班同木質燈體驗課程，所以教室入面有各式各樣嘅材料。
坐低之後，導師會分發上面寫住「DIY ACRYLIC LAMP」木質燈套組。
盒入面總共有五件物品，有亞加力板、燈飾、木框、尺同設計書。燈係採用USB插頭，所以大家可以任意擺喺可以插電嘅位，超方便。
設計書入面有好多好靚嘅設計草圖，小編鍾意右邊嘅風格，所以決定整佢。另外如果大家有想整嘅圖案，可以喺體驗前將想整嘅相，用Online形式send設計圖俾老師，老師會先幫大家準備！
之後就要準備一支鐵筆同一個刷子就可以開始。鐵筆係用嚟刮亞加力板，之後再用刷掃走啲屑。
首先要好小心咁撕又幼又長嘅膠紙燈，然後再插入木框。
之後再小心將設計圖貼喺亞加力板後面同固定。
跟住圖案用鐵筆輕輕刮開，只要按照老師指示，任何人都可以整一個專屬自己嘅木質燈！
如果想知自己做得好唔好，可以插喺木框檢查，望住佢逐少逐少咁完成時，真係好興奮！
大家見唔見到小編幾俾心機去整呢？🤣 用鐵筆一筆一筆咁刮走，真係好神奇！
最後小編做好嘅木質大功告成啦！大家又覺得靚唔靚呢？因為係自己親手製作，所以特別有意義。大家會唔會都有興趣嚟大邱Kipping Class體驗呢？
前往方法
1號線中央路站1號出口出嚟之後，行大約1分鐘就會見到。
自由潛水（프리다이빙 체험 클래스）
- 地址： 대구광역시 달서구 성당동 공원순환로 237
- 營業時間：星期二、四、五 10:00、 18:00；星期三： 10:00、14:00、18:00；星期六、日 10:00、13:00
- 所需時間：大約兩個鐘
- 價格：1人₩60,000원、3人以上申請時1人₩50,000
- 語言： 韓文、中文、英文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後開始體驗。
- 注意事項：6歲以上可以體驗，入場費另付₩12,000（現場支付），毛巾、洗面用具、泳衣同泳帽需自備（泳衣租借時，現場支付₩20,000）
炎炎夏日最好係進行水上活動，呢次小編要介紹嘅體驗係喺大邱最大公園「頭流公園」嘅頭流游泳池，喺嗰度可以體驗一日自由潛水！
頭流公園游泳池係一個面積超過35000尺、水深3至5米嘅超大型游泳池，喺呢度學潛水就最適合不過。
跟住教練行入泳池之後，跟住教練指示喺更衣室換上泳衣就可以，呢度仲有Locker俾大家放行李。
換上泳衣之後，教練會為自由潛水學生準備裝備，著上蛙鞋就好似美人魚咁游緊水、呼吸管可以幫助大家喺水中呼吸同睜開眼睛。
一開始大家都要熟悉一下水嘅深度，教練會由基礎開始慢慢教，大家千祈唔好急住去深水區。大家要先熱身同學點喺水入面呼吸，之後先有時間習慣自由潛水。
只要跟住教練指示一步一步慢慢嚟，之後就可以喺深水中自由咁游嚟游去。由於小編冇太多游深水嘅經驗，所以一開始都會有啲驚，但意外地慢慢發現自己都潛到好底。
經過教練親切同專業嘅教學之後，就可以自己試吓慢慢潛水，同時教練仲會喺水下幫大家影相，留底美好回憶！
前往方法
1號線西部巴士站（서부정류장역）1號出口出嚟之後，直行大約20分鐘，入頭流公園行到盡頭，就可以搵到潛水池。
YOOHOO BIKE （유후바이크）
- 地址：대구광역시 동구 검사동 1022-14 유후 101호
- 營業時間：12月至1月 09:00 - 18:00、3月至11月 09:00 - 21:00
- 價格：1個鐘 ₩10,000
- 語言：韓文，英文、日文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後開始體驗。
如果想以唔同方式享受大邱嘅大自然，小編推薦大家可以嚟借YOOHOO嘅電動單車。
店入而有一般單車、電動單車同相關安全設備，老闆會根據唔同人嘅體格再推薦俾大家。
雖然只睇外觀會覺得只係似一般單車，但其實完全唔同level。
左手把上安裝咗一個咁儀器。撳完開關制之後，再撳「+」、「-」，級別越高速度就越快。大家可以邊踩邊睇機器屏幕去再調整速度。
如果調整機器時遇到問題，可以用右手把，將左手把上機器設置為0，再將右手把轉向可加快速度！ 旋轉得越多、速度就越快。小編喺老闆幫手稍作調整後，就準備出發去琴湖江！
而家望到嘅係琴湖江河大橋，過咗呢條橋就係東村遊樂園，呢度有非常完善嘅單車路，不過大家都要記住小心同慢慢過橋。
琴湖江同天空好似連成一線，前一天咁啱落完雨，所以雲顯得特別靚😍
過橋後，小編以大約20公里/小時速度喺度踩，實在又刺激又好玩！ 因為係電動單車，所以踩得耐都唔會覺得攰。
如果大家俾心機踩，甚至可以搵到Ayang瀑布（아양 폭포），一邊睇瀑布一邊休息都幾唔錯。
踩住電動單車圍住琴湖江踩一個鐘，真係好療癒，如果大家想搵個地方放鬆，呢度係一個唔錯嘅選擇！
前往方法
1號線東村站1號出口出嚟之後，直行三個街口之後，轉右行小巷，就會見到YOOHOO BIKE。
Nature Park（네이처파크 동물원）
- 地址：대구광역시 달성군 가창면 가창로 891
- 營業時間：星期二至五11:00 - 18:00、週末 11:00 - 19:00
- 價格：全日門票₩9900、寵物餵食籃₩5000（現場支付）
- 語言：韓文、英文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後入場。
Nature Park係大邱最大嘅動物園，大家除咗可以喺度同動物互動之外，仲可以享受大自然。
大家入到嚟之後去右邊售票處，向工作人員出示手機或Email憑證後入場。
售票處右邊會見到隔離放咗呢啲一個籃同頭飾，裡面裝住可以餵動物嘅飼料同工具，一Set只係₩5000。
呢度面積有400萬尺， 順住路咁行，室內動物園同放射狀室外動物園會交替出現，同其他動物園相比，呢度可以有唔同體驗。
Nature Park 擁有多達50多種、共300隻動物，由大型野獸到可愛小動物，呢度都可以揾得到。
甚至可以見到好多罕有嘅生物，超神奇！
呢度最大亮點係可以直接餵動物，只要見到有餵食標誌，就表示可以餵佢哋。
因為佢哋都被人餵過好多次，大家都好聰明，可以同動物咁近距離接觸真係好開心同幸福。
如果大家都鍾意小動物，不如就嚟Nature Park啦！
前往方法
搭240號、304號、449號、嘉昌2號（丹山）、嘉昌2號（牛鹿）、急行2號巴士喺「Spavalley1」站落車，次後沿住小巷行五分鐘就會見到Nature Park㗎啦！
草綠郵遞部 （초록우체부）
- 地址：대구광역시 중구 동덕로 8길 52
- 營業時間：星期二至日 10:00 - 20:00
- 價格：基本尺寸 5x7 最少2張（1張₩15,000，未包含原圖）；原圖₩40,000；家庭照套餐（8x10相框一個+哂兩張相+原圖）₩130,000；情侶照套餐（哂兩張相+原圖+明信片）₩70,000
- 語言： 韓文、英文、中文
- 預約方式：喺體驗！大邱官網事前預約，喺預約時間內到現場，向工作人員出示手機或Email憑證後開始體驗。
想喺第一留低一個美好回憶？小編推薦大家嚟草綠郵遞部影返一輯靚相，最近呢度好流行影「黑白相」。
鋪頭內部雖然好細，但就好整齊，俾人一種舒服同溫馨嘅感覺。
牆上掛咗好多黑白相，每個人睇落都笑得好開心，所以小編都好期待！
背景係用黑暗遮光窗簾，可以揀坐櫈，或者用道具亦都得。如果有想要擺嘅pose，可以提前同老闆講，老闆會幫手俾意見。
拍攝過程大約需要10-15分鐘，一開始都會覺得好怕羞或者緊張，但老闆好識搞氣氛，大家都可以影得好自然同得意嘅相。
影完之後就到揀相嘅時候，大家可以慢慢揀，最後小編揀咗一張自己鍾意，同一張老闆推薦嘅。
揀完之後大約再等15分鐘，老闆就會幫大家P好圖同曬出嚟！小編覺得好滿意 推薦大家之後可以同朋友、另一半或屋企人嚟影相。
前往方法
由2號線京大醫院站3號出口出嚟之後，經過一個街口，行入右邊小巷，再行多三個街口直行之後，左邊第一個街口直行就到。
大邱真係好多地方都值得大家去體驗，好多都又新奇又有趣！下次不如就嚟大邱渡過愉快嘅旅程啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
