春川「江村鐵路單車」介紹
春川必玩「江村鐵路單車」！到底有咩咁吸引？
Hello，大家好，我哋係由韓國人每日提供最新韓國旅行資訊嘅Creatrip。
講到春川必做活動，一定唔少得去踩鐵路單車！小編最近去春川玩咗轉，都有去金裕貞站踩鐵路單車，本來以為會好攰又好悶，點知原來又真係幾好玩喎~ 無論係同屋企人、朋友定另一半嚟都非常值得，一齊跟住小編去睇吓啦！
春川「江村鐵路單車（강촌레일바이크）」
- 地址：강원 춘천시 신동면 김유정로 1383
- 營業時間：3至11月 09:00 - 17:30、12至2月 09:00 - 16:00（Break Time 12:10 - 13:00）
- 小Tips：京春線金裕貞站（김유정역）1號出口
鐵路單車目前淨係得一條路線單向行駛，所以要去玩嘅話就要去京春線金裕貞站（김유정역）行過去。落車之後喺1號出口出，望去右手邊就會見到「Rail Park」入口。
因爲鐵路單車有固定出發時間，所以建議大家去到金裕貞站之後可以去買定下個時段嘅飛，然後去附近嘅餐廳同Cafe邊休息邊等，或者可以去Rail Park散步都得。
提提大家，江村鐵路單車售票處有Break Time（12:10 - 13:00）㗎！如果咁啱撞正休息時間都唔緊要，隔離都有一部無人售票機~ 鐵路單車有分2人座位（₩35,000）同4人座位（₩48,000），出發時間有9:00、10:00、12:00、13:00、13:30、14:30、15:30、16:30、17:30。
無人售票機有提供韓文、中文、英文、日文服務，操作亦都簡單，而且仲可以用海外信用卡俾錢！拎到飛之後記住要保管好，入場嘅時候出示俾工作人員睇就得啦！
大家要注意就算落雨，踩鐵路單車嘅時候都唔可以擔遮！同時大家亦都要喺出發前10分鐘到上車地點，如果遲到嘅話唔單止會唔俾上車，亦都唔可以換時段或者退款。
如果仲未夠鐘玩，又唔知道去邊好，大家都可以去Rail Park入面散步同影相。售票處隔離就有一個Cafe Book Station，大家可以叫杯咖啡坐低休息吓。
特別係天氣凍嘅冬天唔想留喺室外咁耐，可以入嚟暖吓身，喺Cafe望出去其實都幾靚㗎！
Rail Park入面有好多巨型擺設，包括呢個超出名嘅書牆同上面嘅沉思者模型，大家記住嚟打卡啦！
大家記住要睇清楚自己預約嘅時段，喺10分鐘前到達上車地點。嚟到之後就會見到有唔少人喺度排隊等，左邊係2人座位單車隊，右邊係4人座位單車隊，如果大家想前面無人，咁就要早少少嚟排隊啦！同時現場亦都會有韓文廣播，提醒大家需要同前面車輛保持適當距離，亦都千祈唔可以停車或者隨便落車。
另外提提大家，呢度同金裕貞站都冇得現場寄存行李，如果大家攞住大型行李，可能就要夾硬塞件行李落單車上面，如果塞唔落可能就無辦法出發。
兩個人一齊踩鐵路單車其實冇想像中咁攰，亦都冇上斜嘅斜路，唔需要擔心踩唔郁。
沿途大家可以欣賞到春川市嘅農村景色，天氣涼爽嘅春天或者秋天去嘅話啱啱好！
第一條會經過嘅係以風車裝飾嘅隧道，現場仲會播音樂添。
而第二條會經過嘅係泡泡隧道，五顔六色嘅燈光加上泡泡，成個感覺勁夢幻~ 而且隧道其實都幾長，大家可以有好多時間影相。
經過泡泡隧道之後，前面嘅風景會更加開揚，亦都可以睇到八味川（팔미천）。如果大家唔想同前面車輛太近，記住要慢慢騎，不過千祈唔可以停低，如果唔係有可能會發生追尾意外㗎！
下一條隧道係用綠色激光做照明，睇落就好似俾星星包圍住，身處宇宙咁！
出到嚟就會見到八味川匯合其他河流，形成北漢江嘅景色，小編都影咗唔少相！不過無論點影都好，都係用肉眼睇最壯觀最好睇~
最後一條隧道俾人一種落咗Club嘅感覺，華麗嘅燈光效果加上韓國復古流行音樂都真係幾highXD （不過可能會有少少嘈）
最後大家會見到超靚嘅北漢江景色，呢度就係首爾漢江嘅上游啦！
最後踩到終點嘅時候要放慢速度，然後工作人員就會指示大家落車。小編當時13:00左右開始踩，踩到14:10，都用咗一個鐘頭左右，不過感覺上好快就踩完，證明呢個course都幾令人投入其中！沿途可以欣賞春川風景之餘仲有4條截然不同嘅隧道，整體嚟講都幾有趣~
落車地點隔離有類似紀念品鋪頭咁嘅地方，大家可以睇返頭先踩單車嘅時候影嘅相！曬相加墊底紙都只係需要₩7,000，都幾值得曬返張留念！
因為鐵路單車得一個方向，所以大家需要去搭「浪漫列車」去到江村站（舊站）離開。車程大約需要15分鐘，列車亦都有分一般同露天位，如果天氣好嘅話，小編推薦大家可以去坐最前面嘅露天位，欣賞一望無際嘅春川風景！
如果想返去一開頭出發嘅地方，大家落車之後跟住人群去搭免費接駁車就可以啦！不過小編就選擇由舊江村站行到新江村站，大約需要20分鐘，散吓步都真係幾寫意舒服！
參加呢幾個一日遊都可以去到踩「江村鐵路單車」：
- 草泥馬樂園 + 南怡島 + 鐵路單車一日遊
- 草泥馬樂園 + 南怡島 + 鐵路單車一日遊（包春川辣炒雞午餐）
- 草泥馬樂園 + 春川辣炒雞 + 鐵路單車 + 士多啤梨農場一日遊
- 南怡島+ 小法國村 + 意大利村 + 鐵路單車一日遊
- 南怡島 + 小法國村 + 意大利村 + 鐵路單車 + 晨靜樹木園一日遊
- 韓國LEGO LAND + 江村鐵路單車一日遊
- 南怡島 + 江村鐵路單車 + 小瑞士村一日遊
以上就係春川「江村鐵路單車」嘅介紹啦，希望可以幫到最近plan住嚟韓國玩嘅朋友們啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
