logo

喺韓國節目成日出現嘅公仔麵

韓國人鍾意食邊款公仔麵?搜羅TV, Youtube出現過嘅,快啲買返屋企試吓啦~!

Yujin Kim
4 months ago


有睇開韓國綜藝電視節目或者韓國 YouTuber嘅影片,絕對唔可以錯過嘅!必定係拉麵(又稱公仔麵)吃播 🍜

ASMR 好治癒,食到雪雪聲,尤其深夜睇嘅時候流晒口水😋

所以今日要為大家介紹一啲喺熱門話題出現過嘅公仔麵,

當中可能有你睇過嘅、喺節目中出現過嘅、或者一路睇一路心諗“我都想食呀!”嘅場景,

事不宜遲即刻碌落去睇睇!



偶然成為社長 1



第一季趙寅成出演嘅偶然成為社長入面研發咗雪蟹拉麵! 

拉麵入面放咗勁多雪蟹,都係賣3500韓圜咋🤩

麵底就係用由 Pulmuone 推出嘅紅色包裝牛肉口味。



以此為契機,趙寅成仲為呢款公仔麵拍咗廣告,《偶然成為社長》中嘅場景亦都被用作電視CF!

多得呢個節目,Pulmuone因此一炮而紅,紅色包裝呢款公仔麵亦好受歡迎👏🏻



帶鮮味嘅雪蟹湯+牛肉湯+彈牙麵條,單單想像都覺得非常舔脷。

呢款紅麵原本喺用牛肉、蘑菇為主材料,濃郁帶辣嘅牛肉湯底,

加上趙寅成研發嘅雪蟹味道,創造出最夾嘅味道👍🏻


Pulmuone
紅色牛肉口味(1袋4包)




Running Man



最近Running Man池錫鎮特輯中,佢哋一齊行超級市場嘅時候,

當時哈哈拎起咗第款公仔麵,劉在錫即刻憤怒鳥:“乜你唔知道我係農心冷拌麵嘅代言人咩?!”

最後佢哋買咗呢款冷拌麵,成班成員一齊食嘅情景大家仲記得嗎?



相信大家應該知道 PALDO 推出嘅經典辣拌麵?

農心唔輸蝕,食住個勢,廣告代言都搵嚟重量級人物,

廣告夠晒新奇特別,有無令你想試吓嘅衝動呢?🤪



Running Man 成員最後都食得好滋味,

佢哋仲搞笑地創作咗首歌"拌麵入面到底有啲咩成分呢?"

 

農心
冷拌麵(1袋4包)




拉面豆



拉面豆係喺 YouTube 頻道上發布嘅網絡娛樂節目。

節目名其實係“一齊煮拉麵嘅偶像”縮寫,

YG新男子組合Treasure嘅成員玹碩同志焄演出!



第1集中,兩人玩水玩得好開心,仲煮埋公仔麵,

玹碩就整咗由 PALDO 推出嘅經典辣拌麵+蚶子,

去江陵必食嘅蚶子拌飯,今次同辣拌麵結合,成為最佳組合👍🏻



最後用剩低嘅醬汁加拌醬整拌飯!

睇到小編流晒口水... 我今晚都要食拌麵!!!😋

 


食完麵,再食飯,佢哋兩個完美示範咗韓國吃播,

想睇返詳細嘅食譜可以參考15-Ya(채널 십오야)頻道嘅 拉面豆 🙆🏻‍♀️



另一位Treasure成員志焄,佢就用咗真拉麵整咗海鮮辣湯麵。

真拉麵有推出原味同辣味,原味係比完全食唔到辣或者小朋友食嘅清淡味道,

辣味其實普通一般人都可以食到嘅程度,湯頭清爽,辣味亦唔會停留太耐,值得一試👍🏻



賣相真係非常之正!!

加入大量海鮮嘅湯頭,同時得到PD嘅高度評價……!



啊... 興奮嘅志焄唔小心踢到張枱... 

煮咗一個半鐘嘅海鮮湯麵... 都未開始食... 已經倒瀉晒😫

唔緊要啦,我哋可以睇返佢當時嘅做法,跟住佢整返出嚟都得嘅!!😌


PALDO
經典辣拌麵(1袋5包)
OTTOGI
真拉麵-辣味(1袋5包)




軍檢察官多伯曼



為咗錢同名譽而成為軍事檢察官嘅都倍萬(安普賢飾演),

呢套韓劇得到世界國地嘅關注同喜愛嘅電視劇。

第11集中,車友仁(曹寶兒飾演)當時食緊農心推出嘅辣牛肉杯麵。



韓劇經常出現嘅經典辣牛肉杯麵,宵夜必食~

當時只有車友仁食,佢仲食得非常滋味😋



都倍萬當時用迷惑嘅眼神望住車友仁,

相信好多網友一定心諗:快啲食啦,啲麵都漲晒啦...

為大家介紹嘅呢款係細麵條,比起袋裝款,喺韓國比較出名杯麵款!

特別適合宵夜或者出去野餐嘅飲食之一。


農心
辣牛肉杯麵




閒著幹嘛呢?



劉在錫做主持嘅一套綜藝節目,『玩什麼好呢?』又『閒著幹嘛呢?』

呢集劉在錫又帶大家去食公仔麵,

果然係農心嘅代言人,一定會將農心公仔麵整得更加好食👍🏻



此外,呢集我哋仲可以睇到你係邊類型嘅人,

公仔麵究竟要整碎落?定成餅落?你哋話呢?



講到農心公仔麵,辛拉麵一定係代表之作,韓國國民拉麵!

為大家介紹嘅係辛拉麵BLACK加入豆腐泡菜嘅組合,新嘗試,不妨試吓🙂


農心
豆腐泡菜辛辣麵(94g)




文福喜 Eat with Boki



文福喜係一個 YouTuber,美貌嘅外表 + 治癒嘅 ASMR = 完美吃播。

769萬Subscriber,唔單止韓國,佢亦都受到全世界嘅關注。



文福喜最近上傳嘅影片入面,280萬VIEW嘅拉麵吃播!

佢食緊嘅呢款公仔麵係由三養推出嘅辣雞海鮮湯麵🤩

同泡菜、Kimbap一齊食,真係睇到流晒口水呀!!



辣雞麵相信大家都唔會陌生啦?

呢款海鮮湯麵係最新推出嘅,消費者評論話係令人上癮嘅味道,

用肉湯製成加上海鮮湯嘅鮮味+辣味,辣味等級為3級,同卡邦尼辣雞麵差唔多辣👍🏻



如果你鍾意食辣雞麵嘅話,不妨試吓~

海鮮湯+辣雞麵嘅組合,同泡菜一齊食嘅話,

味道會更加分,建議你哋都可以跟文福喜嘅食法呀👍🏻


三養
辣雞海鮮湯麵(1袋4包)




今日就同大家介紹咗時下當紅熱門話題嘅公仔麵,

喺韓國綜藝節目、電視劇、Youtube都出現過㗎,唔知你又有冇留意到呢?

希望睇完呢篇嘅你可以幫你決定今日嘅午餐或者晚餐Menu啦😜



其他推薦
LoadingIcon