Hello，大家好，我哋係由韓國人每日提供最新韓國旅行資訊嘅Creatrip。

喺我哋日常生活入面，有好多樣嘢都會因為佢設計上嘅小心思，而令到我哋嘅生活更加方便。不過，我哋喺用嘅時候都唔會去諗到底係邊個咁聰明發明咗呢一樣野。

原來令到我哋生活方便咗嘅呢啲野，有部份都係由韓國人發明㗎 ！等小編今日話俾大家知有啲乜嘢啦！

呢7樣嘢原來係由韓國人發明出嚟？

1. 牛奶盒

Seoul Milk

相信大家都唔會對呢一款牛奶盒陌生。我哋由細飲到大嘅屋仔型牛奶，唔使飲筒，只要打開一邊嘅角就可以就咁飲，非常之方便。不過原來呢一款牛奶盒，係由韓國人申錫基（音釋）先生喺1953年嘅時候發明㗎！

 呢個屋仔牛奶盒嘅設計，真係令到我哋嘅生活方便咗好多，相信申先生喺發明嘅時候，都想像唔到而家呢一個設計竟然會係全世界都變得非常之普及。

2. Cushion粉餅

IOPE

相信大家都知道韓國好流行化妝品。而基本上每個女仔日日都會放喺手袋嘅Cushion粉餅，都係由韓國人發明㗎！喺2008年3月韓國嘅一間化妝品公司，就首次發明咗用氣墊嚟做粉餅，可以話係化妝品界歷史嘅一個里程碑。

而第一個賣Cushion粉餅嘅化妝品品牌就係IOPE，相信大家有留意開韓國化妝品嘅話，都唔會對呢個牌子陌生。小編都覺得自從有咗Cushion粉餅之後，喺趕時間嘅時候化妝，真係方便咗超多。

3. 打氣棒

todaykorea

相信大家都有見過相入面嘅黃色打氣棒。我哋去演唱會或者運動會嘅時候，都有機會會派呢啲打氣棒俾我哋，等我哋喺睇節目嘅時候可以為在場嘅人打氣。

原來呢一款打氣棒係喺1994年由韓國人發明出嚟嘅。用咗呢一款打氣棒，無論喺運動場定係演唱會上面應援，都可以方便又輕鬆咁樣令打氣聲加大10倍。

4. 保鮮盒

locknlock korea

相信大家對呢一款保鮮盒都一定唔會陌生。我哋平時成日用到嘅食物保鮮盒，用嚟帶飯或者存放食物，真係好方便。原來呢一個保鮮盒，係喺1998年嘅時候由韓國Lock & Lock公司發明出嚟嘅。

因為當時佢哋覺得原本已經有嘅食物保鮮盒唔能夠好好咁樣存放液體，就算將個冚蓋好咗，啲液體都仲係會漏出嚟，所以佢哋就發明咗呢一款比較密實嘅保鮮盒，等大家係裝液體嘅時候液態都唔會漏出嚟。

5. 網吧 (PC Cafe)

jejusori

雖然網吧喺全世界都好普及，但原來全世界嘅第一間網吧都係喺韓國開始營運先嘅！喺20世紀90年代嘅時候，由於電腦嘅價格非常之貴，一般嘅屋企買唔起，加上當時嘅網線都唔容易安裝。所以網吧就變得非常之歡迎，而且韓國嘅網吧除咗會提供超高速嘅網絡之外，仲可以喺入面當餐廳咁樣叫飯食㗎！

6. 即溶咖啡粉

Maxim Coffee

韓國人咁鍾意飲咖啡，原來連呢一種即用嘅咖啡粉都係由韓國人發明㗎 ！韓國知名咖啡品牌Maxim喺1976年嘅時候發明左呢一種即用咖啡粉，令到大家嘅生活都方便咗好多。

而佢哋嘅發明原因就係因為當時高級嘅咖啡價格不斷上升，但係鍾意飲咖啡嘅人又變得越嚟越多，所以佢哋就推出咗呢一種即用咖啡粉，令到大家可以用一個平價嘅價錢去飲多咖啡，直到今時今日都非常之受歡迎。

7. MP3 

Time

呢個年代嘅小朋友可能唔會太熟悉MP3，但係90後或者年紀再大啲嘅你，應該就對呢一樣野唔會陌生。喺智能手機出現之前，相信大家都係會用MP3嚟聽歌㗎啦！

事實上， MP3係喺1997年嘅時候由韓國公司去開發㗎！不過自從智能手機越嚟越普及同埋先進，相信呢一啲MP3機都可以成為「古董」啦！

以上7樣嘢明明係我哋日常生活會成日出現嘅嘢，原來都係由韓國人發明！小編係做搵資料嘅時候都有啲嚇親，唔知大家又有啲乜嘢睇法呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購