韓國算命文化
韓國人好迷信？除咗塔羅，原來仲會睇生辰八字？巫術又係咪好邪？
Hello，大家好，我哋係由韓國人每日提供最新旅行資訊嘅Creatrip。
唔少韓國人都有自己嘅宗教，最多人就係信奉基督教，其次就係佛教、道教、天主教等等。雖然好多宗教都禁止信眾算命，不過喺韓國算命就視為一種重要嘅娛樂，亦可以為問題提供一啲解決嘅指引。除咗比較多人知嘅四柱八字同埋塔羅牌之外，韓國其實仲有好多其它形式嘅算命。大家嚟韓國旅行嘅時候有無見過一啲路邊攤提供算命嘅服務？如果大家對自己嘅命運好奇嘅話，下次來韓國不妨試下！
未有時間嚟韓國?🔮
韓國算命文化
四柱（사주）
「四柱」（사주）就係四柱八字五行嘅統稱，主要透過大家嘅出生日期同時間推算命理。呢一種傳統係相信一個人嘅命運一出世已經註定無辦法改變，而韓國人好鍾意用四柱睇下自己同另一半夾唔夾、相生定相剋、外宮內宮又契唔契合，藉此推斷婚姻會唔會美滿，呢係習俗就稱為宮合（궁합）。
喺中國嘅曆法，十天干（甲•乙•丙•丁•戊•己•庚•辛•壬•癸）同十二地支（子•丑•寅•卯•辰•巳•午•未•申•酉•戌•亥 ）係一個循環，就係一甲子六十年嘅時間。而四柱（年、月、日、時）就以天干地支對應生辰建立特定嘅八個字，俗稱「八字」。五行「金、木、水、火、土」就用嚟推算每個人唔同嘅個性同埋命運。
四柱比較依賴過去去預測未來，有啲人甚至願意透過改名改善夫妻之間嘅關係。上圖呢種四柱占卜鋪頭喺韓國非常常見，有興趣嘅話見到入面無客人不妨可以入去算命！
我都想改返個韓文名🥺
掌相（수상학）
掌相都係韓國其中一種熱門嘅算命方式，透過睇手掌嘅形狀、顏色、掌紋嘅線條、手指長度等等，推斷一個人嘅愛情、生命、命運同婚姻！
面相 / 觀相（관상）
面相都係韓國好出名嘅算命方式之一，透過觀察人嘅面部特徵推算性格同命運，已經有好耐嘅歷史。韓國人普遍認為五官可以反映性格，而命運同基因都會影響外貌特徵。
不過因為韓國整容文化相當流行，唔少觀相家都覺得好難辨別。韓國人整容嘅時候甚至唔止想要靚，仲會透過整容改變面相，從而改變命運。
2013年嘅電影《觀相》就係以睇相為主題，由宋康鎬，李政宰，李鍾碩等主演。宋康昊扮演一個天才觀相家，可以透過觀相洞察一個人嘅性格、精神狀態同習慣，仲可以分析到佢嘅過去同未來。
電影有一個情節係宋康昊嘗試喺國王瞓教嘅時候改變佢嘅面部特徵，藉此改變命運，證明面相文化喺韓國真係歷史悠久。
韓國漫畫《樣子（꼴）》（2008）入面都有透過觀察人地嘅面部特徵，解讀一個人嘅個性嘅情節。連漫畫都有面相嘅劇情，大家感唔感受到韓國人對於觀相嘅熱愛？
心郁郁想去脫癦改變命運？😯
塔羅（타로）
塔羅係西方國家流傳咗好多世紀嘅算命文化，近幾十年喺韓國非常流行。塔羅嘅占卜方式就係揀三張牌再問問題，大家對塔羅有興趣仲可以試下學習塔羅占卜嘅技巧，記得要同自己嘅牌組培養下感情。
네이트뉴스
喺弘大就有好多塔羅嘅舖頭，出面痴住比電視台訪問嘅報導，大家有興趣嘅下次來韓國可以去試下！
巫術/神占（신점）
巫術聽落好恐怖，但其實大部分情況都係被電影電視劇嘅劇情妖魔化咗。同其他算命方式相比，巫術占卜主要由巫師靠猜測講出你嘅過去、現在、同未來。而且透過巫師巫婆嘅舞蹈，除咗可以占卜未來嘅命運，仲可以袪除厄運，所以唔少韓國人都好相信巫術，甚至會提前預約好嘅巫師幫佢哋解決問題。
韓國神婆真係咁準？🤔
血型（혈액형）
香港人比較習慣問大家嘅星座，不過喺韓國就相信血型多啲。大部分韓國人都會知自己係咩血型，血型仲係韓國人第一次見面嘅時候會討論嘅話題之一。血型比起占卜同算命主要係用來推斷大致嘅性格，可以初步睇下大家夾唔夾，雖然都有人好信血型，但主要都係用嚟做下話題。
星座（별자리）
星座可以話係西方版嘅八字，雖然韓國人比較相信血型，不過近呢幾年占卜嘅時候，尤其係塔羅，越嚟越多人都會加入星座作為變數。
雖然有人覺得呢啲占卜算命只係隨口噏無科學根據，不過對於韓國人來講就係喺一盞指路明燈，亦都係精神寄托，可以俾到啲建議佢哋下決定。小編就覺得只要唔犯法或者危害生命安全，呢類型嘅占卜都可以去體驗下，話唔定會有意外收穫？
未有時間嚟韓國?🔮
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
