韓國「阿珠媽」嘅特徵
成日聽到韓劇嗌「阿珠媽」，到底呢個韓國中年婦女嘅獨特稱呼有咩特徵？
Hello，大家好，我哋係由韓國人每日提供最新韓國旅行資訊嘅Creatrip。
平時睇韓劇成日聽到「阿珠媽」，到底「阿珠媽」係咩意思？「阿珠媽」呢個字喺韓國係專門稱呼啲已婚女性或者中年婦女，但如果韓國女性未到做阿珠媽嘅年齡，而又比其他人嗌佢地做阿珠媽嘅話，佢地可能會嬲㗎！所以喺韓國有個笑話：韓國人可以分成3類——男人、女人同「阿珠媽」。
「阿珠媽」嘅特徵
1. 時尚打扮
阿珠媽嘅時尚打扮被認為係間接咁反映咗喺時裝秀上面好流行嘅「撞色」設計，最不可或缺嘅元素，一定係顏色鮮豔嘅服飾，但如果想完美咁複製阿珠媽嘅穿搭，緊係唔少得一件有防曬功能仲可以反光嘅衫。
無論係喺屋企附近散步定係去外國旅行，阿珠媽通常都會著到好似去行山咁，由頭上面頂帽到腳著果對鞋，呢種穿搭風格都有佢哋互相匹配嘅色系，而阿珠媽仲要出奇地著得好可愛！仲有最受歡迎嘅阿珠媽髮型一定係短頭髮，仲要電成攣毛，呢個髮型一年四季都係咁流行㗎。
對小編嚟講，阿珠媽會著成行山咁嘅風格係為咗方便唔同嘅郁動，更加重要嘅係，鮮豔嘅顏色可能會帶嚟你諗唔到嘅好處！試諗下，當你出現咗啲咩意外，呢啲顏色咁鮮豔嘅衫咪可以更加容易令人注意到你。
阿珠媽嘅髮型點解係短頭髮？我諗同香港上咗年紀嘅女人多數係短頭髮嘅原因類似。小編老咗嘅時候，可能都會想剪短頭髮同埋電攣個頭，等個頭嘅髪量望落多啲，個人都自信啲！呢個髮型喺韓國阿珠媽圈子入面就相當流行啦。
2. 生活方式
去過韓國旅行嘅人一定有喺朝早嘅地鐵入面見過阿珠媽，因為阿珠媽最鍾意嘅活動之一就係去行山。唔單止係因為興趣同鍛鍊身體，更加係為咗維繫同其她阿珠媽朋友嘅友誼。
喺韓國仲流傳緊一個笑話：當你屋企嘅家庭主婦煮牛骨湯，咁就代表佢要出遠門啦。除咗透過行山做運動，阿珠媽仲好鍾意行路。阿珠媽風格嘅步姿就係，一路行你對手要一路呈90度角彎曲，咁樣行路仲可以促進血液循環。
另一樣阿珠媽平時好鍾意嘅活動就係去韓式桑拿，即係汗蒸幕，如果大家嚟韓國嘅時候有去過汗蒸幕，肯定會喺入面見過成班一齊坐嘅阿珠媽。
點解阿珠媽咁鍾意去汗蒸幕？咁就緊係因為佢哋相信汗蒸幕可以幫佢哋嘅皮膚變好，個人望落可以後生啲，而且血液循環都好啲。
3. 行為
另一樣分辨阿珠媽嘅特徵就係佢哋嘅行為，佢哋嘅速度簡直勘比光速，尤其係喺地鐵或者巴士入面搵空位坐，無論佢哋本身離道門有幾遠，都硬係會搵到條捷徑比自己，再運用飄移嘅技巧等佢哋比起其他人更快搶到個位，真係不得不佩服佢哋大師級嘅技術。
另一樣分辨阿珠媽嘅行為就係佢哋製造聲音嘅能力。根據小編自己嘅個人經驗，喺交通工具上面只要有阿珠媽喺到就絕對唔會瞌眼訓，因為無論有幾眼訓都好，只要有阿珠媽嘅電話響就會被吵醒。
第三樣阿珠媽式嘅行為就係佢哋永遠充滿自信，呢樣都可以話係韓國阿珠媽獨有嘅特點。阿珠媽對自己充滿信心，認為自己嘅所有行為都係正確嘅，而佢哋嘅呢種自信就好似賦予咗啲特權比佢哋咁。
第四項阿珠媽行為就係佢哋對人非常之親切！無論你係自己一個喺條街到行定係蕩失路，如果你遇到阿珠媽，佢哋一定會主動過嚟幫你㗎。
睇完以上阿珠媽嘅特徵，大家有咩睇法？覺唔覺得阿珠媽就好似隔離屋嘅姨姨咁，有時候好可愛但有時候又覺得好麻煩？歡迎大家可以喺下面留言話俾我哋知你嘅睇法！！
如果有更多想知嘅內容，都可以隨時dm話俾我哋知：）
Instagram：creatrip.hk
