Hello，大家好，我哋係由韓國人每日提供最新韓國旅行資訊嘅Creatrip。

之前同大家介紹過那些經典韓劇，反應都唔錯，所以小編決定寫多個經典電影俾大家懷念吓。今日要為大家介紹嘅，好多套都好催淚，就算依家重睇都仲係覺得好正。唔知當中大家又睇過幾多套呢？

那些經典韓國電影
1. 8月照相館（8월에 크리스마스）

〈8月照相館〉可以話係經典之中嘅經典，呢套電影唔經唔覺已經有24年歷史。當時一出喺韓國已經得到唔少迴響，同時仲拎過好多獎。

喺電影入面，會見到男主角好似冇咩煩惱成日都笑咁，但其實佢係有絕症，有苦只得自己知... 雖然佢有努力試過希望可以改變命運，但喺死亡面前，好多時都係徒勞無功。

2. 我的野蠻女友 (엽기적인 그녀)

〈我的野蠻女友〉呢套電影，可以話係80、90後都一定睇過嘅韓國電影中之一。當時I Believe呢首歌更係耳熟能詳，大家當時MP3（年齡暴露哈哈）一定會有呢首歌。

女主角（全智賢）喺劇入面，飾演一個野蠻又霸道嘅女朋友，相反男主角（車太鉉）溫柔細心。雖然一開始女主角對男主角冇特別意思，不過男主角一直嘅努力，令到佢哋最後愛情開花結果。

3. 醜女大翻身 (미녀는 괴로워)

女主角係一個唱歌好聽，而且係一個溫柔女仔，但因為外表唔吸引，所以只可以做幕後代唱歌手，不過佢一直都暗戀唱片公司嘅老闆，一次意外之下，佢受到打擊而感到自卑，令到佢下定決心整容同減肥。

整完容之後，因為聽到要為女配角重新請幕後歌手，佢就去應徵同時返番去男主角身邊。男主角一聽完女主角把聲之後，就直接同女主角簽約做真正嘅女歌手。成為女歌手之後都有唔少風波，其中最大嘅困難就係佢整容嘅事實被公諸於世，但係因為佢嘅善意同單純嘅性格，令佢嘅支持者冇減少反而仲增加，同男主角亦都繼續一齊！Happy ending！

4. 假如愛有天意 (클래식)

假如愛有天意係韓國經典愛情電影，入面講述咗兩段愛情故事，一段係女主角同大學師兄嘅感情故事，另一段係女主角媽媽嘅初戀故事。故事中女主角搵到媽媽嘅情信，發現一段錯過嘅愛情，因為為世所逼佢最終冇辦法同初戀情人開花結果。

最終女主角發現自己一直暗戀嘅師兄，原來係媽媽初戀情人嘅仔。上一代充滿遺憾嘅愛情故事，就由佢哋兩個完成，呢段緣份真係天意。

5. 我腦海中的橡皮擦  (내 머리 속의 지우개)

我腦海中的橡皮擦係改編自日本電視劇嘅《Pure Soul》，唔少綜藝節目都介紹過，主要係講女主角失憶之後，佢老公一直留守喺佢身邊感人故事。

佢哋嘅相識，由女主角放工時俾人打劫，男主角幫佢追返個賊而相識。佢哋拍拖一段時間就結婚，以為婚後生活會好開心，點知女主角記憶力開始慢慢減退。甚至最後佢失去哂所有記憶，每日一起身都以為身邊老公係陌生人，但男主角都冇放棄，仲一直留喺女主角身邊。

咁多套韓國電影，大家又睇過幾多套呢？歡迎留言話俾小編聽。

如果有更多想知嘅內容，都可以隨時dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購