logo

移民到韓國所需條件

想移民韓國要俾幾多錢?有冇咩條件符合先可以做到?小編整理好話俾大家知!

황요산
2 years ago

Hello,大家好,我哋係由韓國人每日提供最新韓國旅行資訊嘅Creatrip


相信如果係鍾意韓國文化,或者成日嚟韓國玩嘅大家,一定有諗過想移民嚟韓國。除咗嚟升學、返工一段長時間再拎居留權之外,到底需要符合咩條件先可以移民呢?小編整理好話俾大家知!

(本文經 hkginkor_97 授權喺 Creatrip 網站刊登)



移民到韓國所需條件

想移民嚟韓國其實過程都唔簡單,就算嫁俾韓國oppa都只可以得到居留權,仲要唔係永久,要每年去續(生完BB之後另計)。所以今日想俾兩個最簡單方法大家參考。

1. 房地產投資移民 


相對比較簡單嘅方法有房地產投資移民,大家只需要喺韓國買韓國政府指定嘅5億韓幣(大約320萬港幣)房地產就可以。 只要買到地,大家就可以即刻拎到F2簽證(韓國居留權),住夠5年就可以得到F5簽證(韓國永久居留權)。

不過指定區域投資係有限制,可以住嘅地居分別有:仁川松島國際都市/青羅國際都市/永忠島區域、濟州島外國人經濟特區、釜山海雲臺觀光區域、東釜山觀光區域、 麗水外國人投資區域、 江源道江淩特別區域等等。

雖然睇落去好似多地方可以揀,但其實以上地區,都係交通比較唔方便嘅地區。



2. 韓國創業投資移民


大家亦可以揀喺韓國投資5億創業,不過每個月都要定期繳交營業額同稅金證明,做夠5年加表現良好先可以得到永久居留權。 

以上方法大家都係唔需要真正長期留喺韓國,每年只需要去一日就可以得到居留權(冇移民監)。而且只要1個人申請投資移民,配偶同未婚子女就可以享有南韓嘅居住權,5年之後就可以申請永住權。不過要留意,居留權並唔代表可以轉埋國籍。



住喺韓國嘅好處? 


1. 相比香港,韓國更民主,只要符合資格,大家可以用自己神聖嘅一票,去投你想要嘅總統。

2. 樓價相對比香港平,就算唔買樓,韓國租樓可以用全租(전세),每個月只係畀水、電、煤就得。(不過一開始要俾好大筆保證金)

3. 韓國四季分明,每個季節都有唔同節目等住大家去享受。

4. 交通方便,30分鐘內轉車唔需要額外俾多程車錢。 

5. 物流速度快,好多時喺國內網站買嘢,今日訂,最快聽日就會收到,最遲都係2-3日。 


韓國每年制度都變緊,以上內容只供參考如果有錯誤,歡迎大家留言話俾小編聽。

移民韓國唔係一件簡單嘅事,大家要考慮到語言不通、當地人排外等問題,身心都要做好準備。




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章