韓國旅行6月必做活動清單
韓國初夏旅行有咩做？一次過幫你整理好韓國6月必去、必玩、必食推介！
Hello，大家好，我哋係由韓國人每日提供最新韓國旅行資訊嘅Creatrip。
夏天終於來臨，又係去旅行嘅好日子~ 首先恭喜各位plan住6月嚟韓國玩嘅朋友們，因為呢個6月韓國真係有超多活動！小編今日幫大家整理咗一連串今年6月喺首爾可以做嘅嘢同活動日程，大家記住要save低呢篇blog啦！
首爾6月必做活動清單
1. 去漢江搭遊艇/觀光遊輪
去首爾玩點少得去漢江玩啦！不過好多人可能都只係會喺漢江影相、散步或者野餐，其實大家仲可以去搭遊艇，喺另一個角度欣賞漢江嘅靚景！
想像吓風和日麗嘅一日，大家坐喺高級遊艇上面享受悠閒時光，欣賞超靚漢江同首爾景色，都真係幾正~ 而且價錢都算合理，平時幾可有機會可以去搭遊艇啊！
漢江遊艇同觀光遊輪都有幾款，大家如果有興趣，不妨可以撳下面嘅link瞭解更多詳情，6月透過我哋預約仲可以享有獨家優惠價！
2. 去聖水、建大玩
可能大家嚟到韓國通常都係去弘大或者明洞玩，唔知大家又有冇去過聖水洞呢個地方呢？最近呢幾年聖水洞超受韓國人歡迎，而且多咗好多又新又靚嘅餐廳、Cafe同各式各樣嘅鋪頭。建國大學亦都喺附近，大學商圈有幾多嘢行同玩就唔需要小編多講啦！
聖水會突然爆紅嘅原因之一絕對唔少得「大林倉庫（대림창고）」呢間Cafe！就好似佢個名咁，呢間Cafe就好似倉庫咁大，但係入面擺放唔少藝術品，而且都裝修得非常靚，連NCT泰容都成日嚟幫襯！呢度嘅甜品同飲品都夠高質，無論係鍾意影相打卡定鍾意嘆咖啡甜品嘅你都一定會鍾意~
Oreo Pop-up
Cafe Scène
因為聖水係而家韓國年輕人必去嘅地方之一，有好多牌子都會選擇喺聖水搞Pop-up或者各種各樣嘅Event！以前LE SSERAFIM、Jay Park嘅Won Soju、Oreo、Jennie同Calvin Klein合作嘅膠囊系列都曾經喺呢度開過Pop-up Store，大家可以買到各種限定商品，有時候玩遊戲仲可以攞到免費產品添！
除咗靚靚Cafe同期間限定Pop-up Store，聖水都有唔少出名嘅餐廳，例如上面呢間西餐廳「聖水閣樓」每逢weekend都超多人排隊~ 想知道聖水同建國大學附近有咩好玩，可以撳下面條link參考，然後plan返日喺呢度玩啦！
3. 去主題樂園玩（愛寶樂園、LEGOLAND、加勒比海灣）
講起韓國主題公園，一定唔少得「愛寶樂園」！呢度有全世界第四斜嘅過山車T Express，亦都有動物園，無論係鍾意玩刺激機動遊戲嘅你，定鍾意周圍參觀同影相嘅你都一定會玩得開心又滿足！千祈唔好錯過呢個6月限定優惠啦~
愛寶樂園隔離就係全韓國最大嘅水上樂園 —— 「加勒比海灣」！每逢夏天都超多韓國人會嚟玩，享受夏日氣氛之餘仲可以消暑啊嘛~ 想過返個涼浸浸嘅夏天就一定要嚟玩啦！
韓國「LEGOLAND」由上年（2022年）開幕之後有好多人都會專程去玩！去到就好似行咗入一個用Lego砌出嚟嘅巨型世界咁，相信無論係大人細路都一定會好興奮~
4. 去丹陽玩滑翔傘
如果想去玩滑翔傘，通常韓國人都會去丹陽，呢度仲被譽為全世界十大滑翔傘景點之一！如果滑翔傘係大家嘅bucket list之一，或者鍾意刺激活動，小編非常推薦大家去丹陽！
韓綜《兩日一夜》都有去過拍攝，而且有好多韓國明星都會專程去玩，跟住佢哋一齊挑戰自我啦！
5. 上K-pop跳舞班
有時候喺IG同FB見到有外國人share佢哋去參加K-pop跳舞班嘅相或者片，都會好奇到底佢哋係點申請，自己都想玩返一份！而家大家可以透過我哋預約啦！
就算完全唔識跳舞都唔緊要，呢度嘅老師會顧及到所有學生嘅程度，教得非常仔細同細心，相信大家一定會跳得開心！難得嚟到韓國當然唔可以錯過呢個機會，跟K-pop編舞家同舞者學跳舞啦！
6. 趁Olive Young大優惠掃貨
每年Olive Young都會搞幾次大優惠，而今年嘅夏天大優惠就由6月1號搞到6號！人氣商品最高會有3折優惠，仲有好多product係買一送一，真係唔掃返啲返屋企都對自己唔住啊！
7. 食醬油蟹
唔少朋友嚟韓國玩都會想挑戰食醬油蟹，但係韓國真係有太多醬油蟹餐廳，唔知邊間先唔伏？
其中一間大家比較少去，但韓國人都識嘅醬油蟹餐廳就係位於東大門區嘅「瑞山醬油蟹」啦！連MAMAMOO華莎都食到lamlam脷，下次飛韓國記住要嚟呢度食返餐啦~
8. 整Gel甲
有唔少人嚟到韓國都會想整返個韓式Gel甲，款式多之餘質素夠曬好！
如果你都想趁換季去整返個充滿夏日氣息嘅Gel甲，不妨可以透過我哋預約，撳下面條link瞭解更多資訊啦！
9. 參加各種音樂節
韓國每逢夏天都會搞超多音樂節，加上而家疫情放緩，各大音樂節同慶典選擇喺今年重新舉辦！而今年6月舉行嘅音樂節有：
WATERBOMB Festival（워터밤 서울）
- 地點：蠶室綜合體育場內輔助競技場（잠실 종합운동장 보조경기장）
- 舉辦日期：6月23~25日
- 嘉賓：Jay Park、ZICO、Sunmi、Simon Dominic、Jessi、Swings、HyunA、Loco、Gray、Yugyeom、BIBI、STAYC、李泳知等
Seoul Park Music Festival（서울파크뮤직페스티벌）
- 地點：奧林匹克公園88草地廣場、88湖邊舞台（올림픽공원 88잔디마당, 88호수수변무대）
- 舉辦日期：6月24~25日
- 嘉賓：圭賢、10cm、Shaun、Crush、Highlight、Young K、鄭世雲等
Mega Field Festival（메가필드뮤직페스티벌）
- 地點：蘭芝漢江公園（난지한강공원）
- 舉辦日期：6月3~4日
- 嘉賓：Boramiyu、Bolbbalgan4、李茂珍、河東均、I'II等
Tone & Music Festival
- 地點：奧林匹克公園88草地廣場（올림픽공원 88잔디마당）
- 舉辦日期：6月3~4日
- 嘉賓：Dynamic duo、Loco、Sunmi、Bobby、Gray、Jay Park、BE'O、BIG Naughty等
10. 參加BTS出道十週年慶祝活動
Twitter @bts_bighit
適逢今年係BTS出道十週年，由6月6號開始將會喺首爾各地舉辦為時兩個禮拜嘅慶祝活動，如果你呢段時間都喺韓國，就千祈唔好錯過啦！
Twitter @bts_bighit
今年嘅BTS Festa係一個同首爾市政府合作嘅活動，到時候漢江三光島、N首爾塔、首爾市廳、東大門DDP同世界盃大橋都會變成紫色，而6月17號喺汝矣島漢江公園更加會有超多慶祝活動，連RM都會出席，真係令人好期待~
Plan住6月嚟韓國玩嘅朋友們記住唔好錯過上面介紹嘅呢10種活動啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
