韓團歌曲最高同時播放量TOP20
每個月都咁多新歌，到底邊首最受歡迎？你最鍾意嘅歌又有冇上榜？
Hello，大家好，我哋係由韓國人每日提供最新韓國旅行資訊嘅Creatrip。
講起韓國文化，當然唔少得K-POP啦！韓國越出越多新團，每個月亦都有超多Idol出新歌，平時喺街上面行都會聽到。今次小編就幫大家整理咗2022年10月後發行嘅韓團歌曲最高同時播放量嘅頭20名，一齊睇吓你鍾意嘅歌有冇上榜啦！
*以2023.05.09數據為準
韓團歌曲最高同時播放量TOP20(2022年10月後發行歌曲)
TOP 20. H1-KEY《건물 사이에 피어난 장미(Rose Blossom)》
最高同時播放量：125,698
H1-KEY係一隊2022年出道嘅女團，今年年頭推出由DAY6 Young K填詞嘅《Rose Blossom》之後突然爆紅！一開頭呢首歌並冇受到太大關注，但係突然喺推出18日之後排名反彈，由本身連TOP 1000都入唔到，一度升至22名！如果大家認真睇歌詞，會發現呢首歌非常勵志！
TOP 19. SEVENTEEN《F*ck My Life》
最高同時播放量：141,962
第19名係SEVENTEEN最新專輯嘅雙主打入面其中一首《F*ck My Life》！小編一開頭見到個歌名都嚇咗一跳，不過聽完之後覺得都幾有同感。希望大家都可以好似歌詞入面所講：Fight For My Life，為自己嘅人生加油！
TOP 18. FIFTY FIFTY《Cupid》
最高同時播放量：146,844
FIFTY FIFTY係2022年年尾出道嘅新人女團，比起喺韓國，佢哋喺外國嘅人氣真係超高！而《Cupid》呢首歌更加令佢哋成為目前K-POP歷史上最快進入美國Billboard排行榜嘅女團！
TOP 17. Red Velvet《Birthday》
最高同時播放量：154,319
Red Velvet唔經唔覺已經出道咗就嚟9年，不過喺韓國仍然保持住超高人氣！佢哋每次出嘅新歌都自成一格，而呢首《Birthday》亦都非常洗腦！
TOP 16. TOMORROW X TOGETHER《Sugar Rush Ride》
最高同時播放量：157,661
TOMMOROW X TOGETHER由出道起就已經受到唔少關注，而今年推出嘅呢首《Sugar Rush Ride》更加刷新佢哋自身記錄，除咗喺Melon排行榜最高排名，亦都登上美國Billboard其中6個排行榜！小編第一次聽嘅時候覺得旋律好特別，之後就會好自然咁跟住唱XD
TOP 15. KARA《When I Move》
最高同時播放量：161,793
《When I Move》係KARA時隔7年回歸嘅主打歌，成員們都有直接參與填詞，MV入面亦都有好多令Fans們覺得感動嘅細節！加上呢張專輯係KARA出道15週年紀念專輯，有咁好嘅成績令成件事更加有意義！
TOP 14. NMIXX《Love Me Like This》
最高同時播放量：238,569
相信有聽過《Love Me Like This》嘅人絕對唔會唔記得佢嘅旋律，因為實在係太洗腦啦！以前NMIXX出嘅歌都非常特別，一首歌入面旋律會不斷變化，突然好似聽緊另一首歌咁，所以相對地冇咁大眾化。不過今次《Love Me Like This》呢首歌除咗保留到NMIXX風格之餘，旋律亦都非常易記，成功令NMIXX可以刷新自家Melon排名！
TOP 13. aespa《Spicy》
最高同時播放量：254,873
雖然aespa出新歌嘅次數唔頻繁，但係每次出都會引起全世界關注！今次呢首《Spicy》同佢哋以前行開嘅電子科技風唔同，非常有夏日氣氛~
TOP 12. NCT DREAM《Candy》
最高同時播放量：259,815
《Candy》本身係韓國元祖偶像團體H.O.T.嘅歌，喺上年聖誕節NCT DREAM翻唱之後成日都會喺街上面聽到！甚至有啲比較後生嘅韓國人會以為呢首歌本身係NCT嘅歌，由此可見佢哋呢個version真係非常深入民心！
TOP 11. STAYC《Teddy Bear》
最高同時播放量：269,384
相信有關注開K-POP嘅朋友們都一定會識STAYC呢團超有實力嘅女idol！《Teddy Bear》係佢哋近期出嘅歌，無論係歌定MV都超可愛，加埋佢哋6個人非常有特色嘅聲線，令成首歌非常有辨識度！
TOP 10. SEVENTEEN《손오공(Super)》
最高同時播放量：273,506
SEVENTEEN又上榜啦！今次係最新專輯嘅另一首主打歌《Super》，韓文名直譯係《孫悟空》，寓意佢哋唔會放棄，會同自己條team一齊努力。呢首歌嘅MV超大規模，聽講群舞部分最少有200人參加，真係好壯觀！呢首歌無論係歌詞定旋律都好正，小編已經加咗落自己個playlist度啦！
TOP 9. 夫碩順《파이팅 해야지(Fighting)》
最高同時播放量：276,473
SEVENTEEN小分隊夫碩順今年同Rapper李泳知合作推出嘅呢首《Fighting》又係成日會係街度聽到嘅K-POP之一！佢哋亦都有同好多明星同歌手一齊拍過Challenge影片，舞蹈動作非常有記憶點！希望大家聽完都可以得到力量，繼續加油，Fighting！
TOP 8. NewJeans《Zero》
最高同時播放量：284,052
繼之前韓國M記搵佢哋做代言人，今次可口可樂亦都成功同NewJeans合作，而呢首《Zero》就係佢哋推出嘅廣告歌啦！連廣告歌都可以吸引到咁多人聽，證明NewJeans真係超受歡迎！
TOP 7. LE SSERAFIM《ANTIFRAGILE》
最高同時播放量：400,244
《ANTIFRAGILE》呢首歌嘅concept非常符合LE SSERAFIM嘅形象，旋律亦都夠特別，一推出就受到全世界關注，亦都有超多人翻跳過！小編每次見到個歌名，個腦入面就會自動開始播：Anti-ti-ti-ti fragile fragile~
TOP 6. LE SSERAFIM《UNFORGIVEN》
最高同時播放量：406,519
接住落嚟都係LE SSERAFIM嘅歌！《UNFORGIVEN》係佢哋最近推出嘅新歌，旋律同歌詞都好易記同洗腦，小編推薦大家一定要睇佢哋嘅舞台表演，無論係表情變化定舞蹈都非常好睇！
TOP 5. NewJeans《OMG》
最高同時播放量：443,155
Oh my oh my god~ NewJeans又上榜啦！《OMG》係NewJeans最新專輯嘅主打歌，一出就超受歡迎，而且佢哋喺舞台上著嘅衫更加帶起一股潮流！而且MV入面嘅故事亦都非常特別~
TOP 4. IVE《Kitsch》
最高同時播放量：497,133
IVE早排喺正式回歸之前出咗呢首《Kitsch》，concept同IVE嘅年紀&風格都超夾！隊長安兪真嘅舞台直拍亦都令更多人認識到呢首歌（因為實在太型啦！），甚至有人覺得比主打歌更加好聽！
TOP 3. (G)I-DLE《Nxde》
最高同時播放量：530,137
講起人氣，又點少得早前以《TOMBOY》成功爆紅嘅(G)I-DLE呢！繼《TOMBOY》之後，佢哋再次推出《Nxde》呢首歌，風格非常特別！呢首歌可以話係向瑪麗蓮夢露致敬，寓意要展現真實嘅自己！最近(G)I-DLE以《Queencard》回歸，唔知道成績會唔會更加好呢？
TOP 2. NewJeans《Ditto》
最高同時播放量：556,250
《Ditto》係NewJeans推出《OMG》之前發行嘅一首歌，MV嘅風格非常復古，即使唔係主打歌，播放量都超驚人！推出到而家都過咗一段時間，但係《Ditto》仍然佔據Melon TOP10，由此可見韓國人真係好鍾意呢首歌。
TOP 1. IVE《I AM》
最高同時播放量：581,622
萬眾矚目嘅第一名係IVE嘅《I AM》！呢首歌係佢哋新專輯嘅主打歌，展現出IVE年輕得嚟充滿自信嘅一面。無論係旋律定歌詞都受到韓國MZ世代嘅愛戴，成功登上1位寶座！
唔知道大家係唔係每首都聽過呢？而你自己又最鍾意邊首韓團嘅歌呢？不妨留言話俾小編知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
