韓星推薦食物配搭&Menu
見到偶像食得咁開心自己都想食埋一份？跟住韓星咁叫/整一定冇錯！
Hello，大家好，我哋係由韓國人每日提供最新韓國旅行資訊嘅Creatrip。
唔好睇韓國Idol同明星全部都咁瘦，其實有好多明星都超識食，推薦親嘅嘢食同配搭都令人食到舔舔脷！今日小編就為大家整理咗韓國網上流傳嘅韓國明星推薦Menu，有啲喺香港都食到㗎！
韓國仲有咩好嘢食？🤔
韓星推薦食物配搭&Menu
1. BTS 柾國 - 불그리（火浣熊麵）
Weverse
相信各位A.R.M.Y都對呢張相唔陌生！早排柾國喺網上up咗呢張相，仲教埋大家點煮呢款「불그리（火浣熊麵）」。呢個食譜需要一包辣雞麵同一包浣熊香辣海鮮即食麵，喺香港都好容易搵到，想同柾國食同一款麵可以跟住下面幾個步驟煮：
1. 煲入面放650~680ml水
2. 水滾前落一包辣雞麵醬 + 半包浣熊香辣海鮮即食麵嘅湯粉同乾燥蔬菜包
3. 水滾之後落麵收汁（如果覺得太鹹可以根據口味加多少少水）
4. 麵熟之後加埋辣雞麵配料包就大功告成！
2. BTS 柾國 - 엽기떡볶이（獵奇辣炒年糕）
트립어드바이저
下一款要介紹嘅同樣係柾國推薦嘅配搭！「獵奇辣炒年糕」係韓國最出名嘅連鎖辣炒年糕餐廳之一，以口味比較辣而出名。之前柾國就曾經同Fans分享過自己叫獵奇辣炒年糕嘅時候會叫小辣（덜 매운맛），仲一定要加芝士同紅薯粉！（記住唔好叫飯糰啊，咁先可以100%感受到柾國當時唔記得叫飯糰嘅個種可惜嘅心情XD）
3. BTS 柾國 - 蘇子油拌麵
最近柾國經常同fans分享佢嘅食譜，而前排佢就教咗大家整佢成日都會食嘅「蘇子油拌麵」，一齊睇吓到底係點整㗎啦！
1. 撈勻4羹蘇子油、2羹韓國Cham Sauce（참소스）、1羹辣雞麵醬同1個蛋黃，整成醬汁
2. 烚蕎麥麵（想食幾多烚幾多）
3. 烚好之後過冷河
4. 倒入醬汁撈勻
5. 加埋韓國紫菜碎就大功告成！
4. LE SSERAFIM KAZUHA - 芒果乾乳酪
LE SSERAFIM YouTube
講起最近最hit嘅女團，一定唔少得LE SSERAFIM！呢個女團所有成員身材都勁fit，小編每次見到都好羡慕。而前排其中一位成員KAZUHA就喺YouTube分享咗自己平時朝早會食嘅早餐，其中一款就係芒果乾乳酪啦！製作方法非常簡單，只要前一晚將2~3塊芒果乾剪成一口大細，加入原味乳酪就得！芒果乾會吸收乳酪嘅水分，除咗會令乳酪變得更加濃稠，芒果乾本身都會變到好似新鮮芒果咁~ 因為芒果乾本身都夠甜，所以小編建議大家用無糖乳酪，咁就會啱啱好！
5. EXO伯賢 - School Food
Vlive
下一個識食明星就係EXO伯賢啦！今次要介紹嘅係伯賢以前開Vlive嘅時候食嘅Menu~ 當時伯賢叫咗辣卡邦尼年糕（매운 까르보나라 파스타 떡볶이）、芝士午餐肉雞蛋紫菜飯捲（모짜렐라 스팸계란마리）同泡菜冷麵（신김치말이국시）！School Food香港都有好多間分店，大家可以約埋朋友一齊試吓本命中鍾意食嘅Menu！
6. SHINee Key - 기범주（起範酒）
MBC
Key喺《我獨自生活》入面經常都會公開佢嘅獨家食譜，吸引好多韓國人親自喺屋企試整，而且反應都好好！而其中一款就係기범주（起範酒）啦！呢款酒用Key真名命名，可想而知真係佢自己鍾意嘅配搭。要整起範酒，只要將550ml紅茶、1支燒酒同冰撈勻就得，真係超簡單。呢款酒喺韓國真係超紅，連燒酒品牌真露都同Key合作推出紅茶Tonic Water！喺香港嘅大家如果想試，聽講用冰紅茶代替普通紅茶會更加好飲~
7. 李英智 - 본죽（本粥）
본죽
香港嘅粥大部分都比較清淡，更加有唔少人係病嘅時候先會食，但係韓國嘅粥有超多花款！大家又有無諗過粥都可以係辣嘅呢？呢款章魚泡菜粥辣辣地好惹味，加埋芝士聽落好似好怪，不過好多人跟李英智咁叫之後都話勁似食緊risotto！連「本粥」官方都認證咗呢款食法，大家下次嚟韓國想食啲新花款不妨可以試吓（記住要加點兩份芝士啊）！
8. NCT辰樂 - 천러라면（辰樂拉麵）
各位NCTzen應該都有睇過《NCT Daily》呢個YouTube channel，辰樂喺其中一條片入面親自煮咗呢款「천러라면（辰樂拉麵）」，方法雖然簡單，但係真係好好味，鍾意食番茄嘅朋友們一定會鍾意！覺得煮公仔麵煮嚟煮去都係嗰幾款？不妨加少少新意，跟辰樂嘅食譜煮啦！而且所有材料香港都有，非常值得一試！
1. 煲入面放500ml水
2. 放一個番茄入去，壓成蓉
3. 水滾之後加麵、湯粉、2羹老乾媽
4. 煮到麵熟就食得（鍾意食蛋嘅可以最後加一隻蛋落去）
9. ONEUS 建熙 - 海底撈醬汁
THE K-POP
大家無睇錯，接住落嚟要介紹嘅係喺海底撈打邊爐嘅時候點嘅醬汁！ONEUS 建熙推薦嘅呢款「건희 소스（建熙醬）」喺Twitter爆紅，有好多人就算唔係Fans都會跟住整嚟食，而且反應超好！就係因為咁，建熙最後就親身拍咗條片教大家整正宗嘅建熙醬，而且仲有兩款口味任君選擇，一齊睇吓係點整㗎啦！
偏甜版：1羹麻醬 + 2~2.5羹甜辣醬 + 半羹葱花 + 適量蒜蓉、辣牛肉醬、麻油、辣椒油、辣椒粉、泰國辣椒粉、糖 （想香口少少可以加埋花生碎）
偏鹹版：2茶匙鹽 + 1羹蒜蓉 + 2~3羹麻油
10. 本月少女GoWon - GoWon定食
GS25 Twitter
相信講起Idol定食，大家第一個諗起嘅應該會係GOT7嘅Mark定食，當時真係風靡全韓國啊！而原來本月少女嘅GoWon都有佢最鍾意便利店美食配搭~ 第一款係辣豬大腸加芝士撈麵，芝士中和返大腸嘅辣味，真係好match！而第二款就係辣味芝士洪拉麵（매운치즈 홍라면）+ 뭉개뭉계란（粟米雞蛋薯仔沙律味）+ 芝士魚糕，夠好食之餘仲夠飽肚。最後韓國GS25便利店仲官方推薦咗呢兩款配搭，大家下次嚟韓國便利店唔知食咩好嘅話，不妨可以試吓GoWon定食！
唔知道以上有冇邊款吸引到你呢？如果你嘅本命仲有介紹過其他食物配搭或者Menu，不妨喺下面留言話俾小編知！
想book餐廳但係冇韓國電話號碼？
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
