韓國攝理教（JMS）風波
《以神之名：信仰的背叛》入面介紹嘅攝理教到底係咩嚟？連韓國偶像都牽涉在內？
Hello，大家好，我哋係由韓國人每日提供最新韓國旅行資訊嘅Creatrip。
唔知道大家有冇睇Netflix嘅習慣呢？最近韓國Netflix出咗一套揭露宗教醜聞嘅紀錄片 ——《以神之名：信仰的背叛》，入面其中有一集就講到攝理教（JMS）呢個宗教，引起全城哄動！到底呢個宗教係咩來頭，又點解會突然有咁多人討論呢？
韓國攝理教（JMS）風波
基督教福音宣教會，又叫做耶穌晨星會、攝理教，係一個喺1978年喺韓國起源嘅宗教。佢嘅創辦人叫做鄭明析（정명석），所以呢個宗教亦都被稱為JMS（鄭明析嘅英文名縮寫）。
呢個宗教唔單止喺韓國有，美國、英國、澳洲、日本、南非、台灣、香港等地都有教會。攝理教會成日舉辦好多義工活動，所以吸引到唔少年輕人信教，而呢個宗教嘅主要信徒都係學生同後生女仔。
睇落好似冇咩問題咁，但根據教徒所講，鄭明析會自稱係上帝同救世主，亦都會進行洗腦行為，令大家無條件咁聽從佢嘅指示。亦都會以宣教祈禱同檢查身體等等嘅理由性侵同性騷擾小朋友同女信徒，令人髮指。
Netflix
其實喺今次Netflix公開攝理教嘅黑幕之前，創辦人鄭明析已經被多次揭發性侵，亦都因此坐過10年監。不過攝理教並冇因為咁而沒落或者消失，反而規模仲變得更加大，而鄭明析嘅詭計亦都因為咁而繼續延續落去。
Netflix
喺《以神之名：信仰的背叛》入面亦都出現咗一個香港人熟悉嘅臉孔，佢就係方力申女友葉萱Maple。葉萱挺身而出，指控鄭明析喺3年入面曾經性侵佢17次，真係聽到都覺得毛管戙... 而今次JMS風波更加牽涉到一位韓國男偶像，大家又知唔知係邊個呢？
OCN
唔知道大家嚟韓國玩嘅時候有冇試過被韓國人傳教呢？佢哋會喺街頭物色目標，用友善嘅態度同對方傾閒偈，然後慢慢開始暴露出真正意圖，向對方「傳教」同邀請佢哋參加聚會。
所以之前就有論壇整理出JMS信徒經常會出沒嘅地方，希望大家唔好中招。不過點知男團DKZ成員庚潤（경윤）屋企人開嘅Cafe都係其中一個高危地方！大家之後發現呢間Cafe原來同JMS有莫大關聯，仲有人爆料話庚潤媽媽有曾經向自己傳教，令一大班粉絲都超驚嚇。
日前庚潤公開發表聲明，聲稱自己並唔知道原來爸爸媽媽一直以嚟去嘅教會原來係攝理教教會，亦都話完全對呢個宗教冇任何瞭解。點知又俾網友發現佢以前有畫過同JMS有關嘅畫作，最後庚潤先承認攝理教係佢細個嗰陣信奉嘅宗教，不過而家已經退咗教，唔再同JMS有任何關係，亦都反省緊自己過往嘅行動。
한국일보
可能大家都曾經有耳聞過，韓國有好多宗教，當中有部分更加係邪教，利用宗教去做壞事！所以大家嚟韓國玩嘅時候都要小心，唔好誤墮佢哋嘅陷阱，亦都要保持理性。
大家又對呢個風波有咩睇法呢？歡迎留言share俾小編知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
