Hello，大家好，我哋係由韓國人每日每日提供最新韓國旅行資訊嘅Creatrip。

嚟韓國每次買化妝品或護膚品，絕對唔少得行Olive Young，今日小編就想同大家分享吓2023年佢哋賣得最好嘅產品！大家可以參考吓有邊一款啱，之後加入自己嘅Shopping List度啦！

成日都miss咗Olive Young大減價？

飛韓國之前預約定之後再嚟攞啦

護膚品系列

爽膚水TOP1

ROUND LAB 獨島爽膚水

呢支toner一直都好熱賣，可以話係最基本嘅款！因為成分夠溫和，所以所有肌膚都可以用，如果皮膚比較敏感，或者最近開始對護膚有興趣但又唔知由邊度開始入門好，都推薦你買呢款爽膚水試用！

  韓國5款超大容量爽膚水推介

精華TOP1

ISOI 保加利亞玫瑰零瑕疵修護精華液

人之所以會成日搽防曬，原因就係唔想有雀斑，不過就算有時幾勤力都好，點都會出現一兩粒！呢個時候小編推薦大家用 ISOI 保加利亞玫瑰零瑕疵修護精華液！佢長期喺Olive Young排最TOP，11年嚟一直拎第一！用過佢嘅人都有讚冇彈！

面霜TOP1

Dr.G 積雪草褪紅修護面霜

Dr.G呢款cream本身係以軍人面霜出名，而家一直長佔Olive Young排行榜第一名，仲成日同其他卡通人物合作推出限定款添啊！呢款面霜有舒緩褪紅同修護功效，而且唔會笠，男仔女仔都啱用！

面膜TOP1

Mediheal茶樹舒緩護理保濕導入精華面膜

嚟韓國唔買返幾十塊面膜真係對唔住自己！無論係買俾自己用，定係當手信送俾朋友都好啱。如果想搵一款平靚正嘅面膜，Mediheal呢個大品牌大家絕對可以大手咁買！當中呢款茶樹面膜相信大家都有聽過，佢可以令肌膚保濕嘅同時，做到鎮靜效果，回復水油平衡，而且面膜紙亦都得到Vegan認證，就算係敏感肌都適用！

 想了解更多「Mediheal」產品

爽膚棉片TOP1

SKINFOOD 紅蘿蔔調理清透爽膚棉

可能唔少朋友都冇聽過爽膚棉呢個概念，其實佢就係吸滿爽膚水嘅化妝棉，因為非常方便，所以好多韓國人都好鍾意用。而喺韓國咁多個護膚品品牌之中，Skinfood一直都出名CP值高，呢個紅蘿蔔系列嘅產品仲特別受到韓國人嘅愛戴，唔少YouTuber都有介紹過。呢款爽膚棉可以達至補水效果，用嘅時候好清爽，一啲都唔會覺得黐立立。

卸妝產品TOP1

ma:nyo魔女工廠純淨卸妝油

講到韓國卸妝油，魔女工廠敢認第二，應該都冇其他品牌敢認第一！因為佢獲獎無數，唔單止喺Olive Young一直拎獎，其他護膚品牌網站都一直大推！

防曬TOP1

ROUND LAB 白樺樹保濕防曬

唔好以為只係夏天需要防曬，冬天其實都有好多紫外線㗎！想搵一支唔貴，但又功能非常好嘅防曬，大家可以試吓ROUND LAB 白樺樹保濕防曬，所有肌膚都適用，質地清爽，做到美白、補水同鎮靜效果，由推出到而家一直都係熱賣款之一！

特殊護理TOP1

Olive Young Careplus 隱形暗瘡貼

嚟韓國每次都會掃幾包暗瘡貼返香港？唔知邊隻又平又好用，可以試吓Olive Young自家品牌款，價錢平，量又多，買咗可以有排用！

男士護膚TOP1

ideal FOR MEN Perfect All In One Milk

邊個話男士唔可以貪靚！而家年代變，男士都愛護膚！ideal 呢款 All In One Milk專為男士而設，已經連續5年拎第一！Olive Young經常有買1送1優惠， 男士之後行街都可以留意吓啦！

化妝品系列

眼妝TOP1

CLIO極緻捲翹超防水睫毛膏

韓國其實有唔少睫毛膏都好出名，不過今次榮登Olive Young第一名嘅係CLIO。佢除咗可以令睫毛根根分明，佢嘅超強防水同防油配方仲令人唔需要擔心搽完會變熊貓眼。

彩妝TOP1

WAKEMAKE Soft Blurring眼影盤 #02 Lively Blurring

WAKEMAKE係Olive Young旗下彩妝brand，無論係眼影定唇膏/唇彩都超受韓國人歡迎！而今次佢哋嘅眼影盤就成功成為彩妝TOP1！當中#02 Lively Blurring配色夠日常，買一盒就可以化出好多款妝容，推薦mute色調同cool tone朋友買嚟用！

唇妝TOP1

Romand Juicy Lasting唇彩

呢幾年韓國比起霧面唇膏，反而更加多人用呢種閃令令嘅鏡面唇彩。Romand喺韓國係一個平價品牌，就算係學生都負擔得起！而最受歡迎嘅色號係上面呢款Bare Grape，推薦cool tone嘅朋友買嚟試！

氣墊粉底TOP1

CLIO KILL COVER THE NEW氣墊粉底

有時大家係唔係都會好奇，韓國人點解好似每個人皮膚都睇落咁好？其實質素高嘅化妝品都好重要！只要用啱粉底，你嘅皮膚都可以睇落完美無瑕。呢款cushion唔單止多韓妹推，就連唔少韓仔都有用佢㗎！

散粉TOP1

BANILA CO. PRIME PRIMER定妝粉

呢款散粉小編都係因為有韓國YouTuber介紹所以開始用，佢比起其他開架品牌粉質幼細好多，而且上臉嘅時候完全唔會出現一撻撻嘅問題！

化妝用品TOP1

Piccasso粉底刮

韓國呢一兩年超流行用粉底刮，因為上妝嘅時候可以令個妝更加薄透自然，唔會好似戴咗面具咁假XD 而Piccasso呢款就最受韓國年輕人歡迎啦！價錢唔太貴又好用，平時會化妝嘅朋友不妨可以買返支試用~

想知自己啱用咩化妝品？

Personal Colour Test 推薦

個人護理系列

身體護理TOP1

Illiyoon神經醯胺敏感肌潤膚乳

天氣越嚟越凍，係咪都好需要買返支Body Lotion去滋潤吓呢？呢支Lotion聲稱每30秒就賣出一枝，好多人用完佢都返唔到轉頭，用完一枝又一枝！連敏感肌都適用，係冬天必備嘅產品！

手部護理TOP1

Kamill洋甘菊護手霜

Kamill係德國出名護膚品牌，當中呢支洋甘菊護手霜冇人唔識！唔單止有淡淡嘅洋甘菊香，重點係一啲都唔黐立立，同時仲好有保濕力，細細支擺喺袋入面，隨時拎出嚟用都得。

唇部護理TOP1

Bioderma 賦妍修復滋養潤唇膏

Bioderma唔單止卸妝水受歡迎，就連潤唇膏喺韓國一直都係排喺頭幾名！唔想個嘴咁易爆坼，你知點揀啦！

洗頭水TOP1

LABO-H 益生菌防脫髮頭皮強化洗髮水

有冇人好似小編咁係甩毛怪，成日洗/吹完頭之後都會甩好多頭髮XD 呢款洗頭水今年經常喺Olive Young個排行榜上面，聲稱有效改善脫髮問題，令頭皮更加健康，更加有唔少韓國KOL推薦過！

頭髮護理TOP1

UNOVE 重度受損髮護髮乳EX

唔想頭髮成日都咁易打棘，其實我哋間唔中都需要做吓Treatment去護髮。呢款護髮乳以多達31種豐富蛋白質&胺基酸同5種草本萃取油製作而成，加上自然草本清新香，用佢嘅時候頭髮會更加有彈性同有光澤！

染髮產品TOP1

mise en scène 染髮劑

mise en scène嘅髮尾油出名唔再講，大家又知唔知其實佢哋嘅染髮劑都一樣好好用！好易上色，自己染都冇難度！而家仲請嚟Blackpink代言，想同偶像同髮色話咁易！

其他產品

瘦身產品TOP1

FOODOLOGY 石榴味燃脂茶

呢款石榴味燃脂茶含有豐富毛喉鞘蕊花萃取物、銀杏葉萃取物、果寡糖等成分，有助於減脂、改善體內血液循環及幫助腸胃蠕動、排除宿便等。

健康食品TOP1

Orthomol Immun免疫力綜合維他命

Orthomol Immun係一個德國保健食品品牌，而呢款維他命食完可以全面增強體質，提升免疫力。小編本身都有食開，味道易入口，啱曬買返香港送俾親朋戚友啊！

香水TOP 1

FORMENT經典香水（Cotton Hug）

Forment呢個牌子越做越大，連香港官網都有！而且淨係今年就已經推出咗好多款新香水，當中最受歡迎嘅係呢款Cotton Hug，呢款香水俾人一種溫暖乾淨嘅感覺，如果另一半噴咗呢支香水應該好正～

食品TOP1

Delight Project Bagel脆片

講起Olive Young，點少得呢款bagel脆片！之前一直都淨係得蜂蜜牛油同香蒜味，而家出埋pizza味同粟米濃湯味，款款都好惹味~

以上就係2023年Olive Young最受歡迎嘅產品，大家下次嚟韓國玩可以參考呢個list掃貨返屋企！

成日都miss咗Olive Young大減價？

飛韓國之前預約定之後再嚟攞啦

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購