《氣象廳的人們》拍攝地
跟住宋江同朴敏英足跡,一齊去《氣象廳的人們》拍攝地打卡!
Hello,大家好,我哋係由韓國人每日提供最新韓國旅行資訊嘅Creatrip。
由宋江、朴敏英、尹博、Yura主演嘅《氣象廳的人們:社內戀愛殘酷史篇》,雖然開播時話題唔少,但因為同《二十五,二十一》撞哂期,完結篇相對就少人討論,有啲可惜,不過今次小編都有整理好拍攝景點,希望可以幫到大家啦!
備註:畫面截圖來源為jtbc、Netflix
《氣象廳的人們》拍攝地
1. 坡州 紺岳山(파주 감악산)
- 地址:경기 파주시 적성면 설마리 산23
《氣象廳的人們》第1集,李時雨跑去山上氣象觀測所,send相俾當時女朋友蔡流進,但就被已讀不回,呢個場景係位於坡州紺岳山,著名地標就係由山頭延伸而去嘅吊橋,鍾意行山嘅朋友,會唔會想挑戰一下呢?
2. 複合韓屋空間處(복합한옥공간 곳)
- 地址:서울 종로구 계동길 52-11
陳夏媽媽同家姐住嘅地方係典雅韓屋建築,實際上係北村韓屋村民宿「複合韓屋空間處」,室內空間到傳統式庭院,都令人難以忘記呢度嘅氛圍。
3. 首爾橋 (서울교)
- 地址:서울 영등포구 여의도동 29
《氣象廳的人們》第2集,李時雨跟住一班人喺橋上行,突然意識到天氣即將要變,當時佢係喺連接汝矣島同永登浦嘅橋。
4. 氣象廳(기상청)
- 地址:서울 동작구 여의대방로16길 61
可以話出現得最多嘅場景,「氣象廳」係實際上借咗政府機關(氣象廳地震中心)拍攝,有機會嘅話,小編都好想去參觀吓。
5. 一膳天婦羅蓋飯(이치젠덴푸라메시)
- 地址:서울 용산구 한강대로72길 11-21
「一膳天婦羅蓋飯」係一間專賣日式料理,當時呢個地方就係時雨同夏京兩人關係再進一步嘅重要場地之一,之前韓劇《你喜歡布拉姆斯嗎?》都有喺度取景,之後可以一次過去打卡!
6. 舊文來/Old Mullae(올드문래)
- 地址:서울 영등포구 도림로 433-6
時雨同夏京兩人決定要拍拖,眼利嘅朋友,應該會發現呢個場景之前好多韓劇都有出現過,就好似有《Start Up》、《重返18歲》等。
7. The River(더 리버)
- 地址:서울 서초구 반포동 1338
第6集時雨同夏京去到漢江「The River」景觀餐廳,同樣之前《社內相親》、《海岸村恰恰恰》都有喺度拍過,大家又記唔記得呢?
8. 白金堂(백금당)
- 地址:경기 남양주시 두물로27번길 12
「白金堂」喺韓國各地都有好幾間分店,而當時拍嘅係喺南楊州市分店。
9. 雪梅嶺自然修養林(설매재자연휴양림)
- 地址:경기 양평군 옥천면 용천로 510
為咗逃離工作,夏京同時雨兩人一齊去露營,呢度係位於京畿道楊平郡嘅「雪梅嶺自然修養林」,唔少經典韓劇,例如《住在我家的男人》、《王的男人》都有喺度取過景。
10. LUCA Kitchen(루카키친)
- 地址:서울 강남구 선릉로 818
嚴前輩終於抽到時間訂咗餐廳同屋企人食飯,但因為統籌一組科長發脾氣,再放屋企人飛機,呢度係位於狎鷗亭羅德奧站附近嘅「LUCK Kitchen」,裝修得靚,而且食物味道都唔錯,大家之後會唔會想去試呢?
11. 首爾氣象觀測所(서울기상관측소)
- 地址:서울 종로구 송월길 52
《氣象廳的人們》結尾,夏京同時雨相擁而吻、大家都唔捨得放開,之前《九尾狐傳》第一季嘅「來世出入境事務所」都係喺呢度拍。
12. 必敬齋(필경재)
- 地址:서울 강남구 광평로 205
「必敬齋」係喺江南區水西站附近 ,主要係食高檔韓式定食,價錢一啲都唔平,不過氣氛都唔錯,有機會都可以試吓。
以上係小編整理好《氣象廳的人們:社內戀愛殘酷史篇》拍攝地,之後疫情結束,不如就跟住宋江、朴敏英足跡一齊去打卡啦!
如果有更多想知嘅內容,都可以隨時留言或者dm話俾我哋知:)
Instagram:creatrip.hk