《社內相親》拍攝地
有幾多人睇完《社內相親》愛上安孝燮？劇中拍攝地到底喺邊？夏莉屋企原來喺大邱？
Hello，大家好，我哋係由韓國人話你知每日最新資訊嘅Creatrip。
由漫畫《我和社長相親相愛》改編嘅SBS韓劇《社內相親》，話咁快又嚟到尾聲，今日就係大結局！劇情誇張得嚟又搞笑，唔少網站都大熱討論，喺Netflix各國排行榜仲係名列前茅，今次小編整理好劇中經典拍攝地，有興趣嘅朋友，可以先save底，之後再跟住去打卡啦！
備註：劇照、畫面照片來源為SBS
《社內相親》拍攝地
1. 山群丘陵（카페산들언덕）
- 地址：대구 수성구 화랑로34길 93
《社內相親》申夏莉屋企係Goobne炸雞店，實際拍攝地點，係喺大邱「山群丘陵」Cafe入面，特別嘅係夏莉家炸雞店只係影外觀，實際上內部空間同屋企都係另外搭景。
雖然知道真相有啲可惜，但大家有機會去大邱，都可以去「山群丘陵」打卡。
2. 延南場（연남장）
- 地址：서울 서대문구 연희로5길 22
民宇餐廳拍攝地點係喺弘大延南洞「延南場」，主要以Cafe經營，但都有提供主食，室內裝修好有質感，搭配良好採光，同另一半嚟會覺得好浪漫。
3. 傻瓜即食辣炒年糕店（멍텅구리즉석떡볶이 공릉점）
- 地址：서울 노원구 공릉로51길 14-2
夏莉同映書成日去嘅洞內年糕店，劇名改為「好味小食（맛나분식）」，但實際拍攝地點係孔陵站附近嘅「傻瓜即食辣炒年糕店」。店入面滿佈塗鴉，以前就有唔少客人嚟打卡，牆上唔少畫作同簽名、記底嚟過到此一遊。
4. Adamas 253（파주 아다마스253）
- 地址：경기 파주시 탄현면 헤이리마을길 47
俾姜泰武識穿係假身分嘅夏莉，被映書呃咗去要同姜泰武道歉，呢個搞笑場景係坡州HEYRI藝術村入面嘅「Adamas 253」Cafe，建築外觀好現代化，相當顯眼。
5. 蠶眠院（승잠원）
- 地址：경기 파주시 법원읍 초리골길 77
《社內相親》中，姜泰武帶住以「申金熙」假名嘅夏莉，一齊同爺爺食飯嘅餐廳，係位於坡州「蠶眠院」，呢度有韓屋圍住，附近種滿桑樹，係一個好舒服同寧願嘅空間。
6. 梨浦洑便利店（이포보 편의점）
- 地址：경기도 여주시 금사면 금사로 48
食完飯之後，會長話要食包，兩人去到嘅地方係京畿道驪州市「梨浦洑」，為2009年時動工，確保南漢江一帶調節洪水同農業用水蓄水池。
7. Bella Cucina（더리버 벨라쿠치나）
- 地址：서울 서초구 반포동 1338 1F
即使夏莉被拆穿假身分，但姜泰武一樣對佢糾纏不休，仲帶佢去到漢江景觀餐廳食飯。
8. 醪串（모로미쿠시 광교카페거리점）
- 地址：경기 수원시 영통구 센트럴파크로127번길 48
《社內相親》除咗男、女主角令人好心動之外，男、女配角映書同車程勳室長一樣都睇到人心心眼！兩人成為鄰居之後喺「醪串（モロミクシ）」餐廳相遇兩次，兩人互動相當可愛！
9. 松月蕎麥麵（송월메밀국수）
- 地址：강원 양양군 손양면 동명로 282-4
姜泰武社長帶住夏莉去江陵出差，而夏莉飆車帶住社長去當地美食店探訪，點知咁啱食材又賣哂。實際上劇組係喺襄陽郡「松月蕎麥麵」拍攝，究竟有幾好食呢？下次不如親自去睇吓彌補夏莉嘅遺憾啦！
10. Surfyy Beach（양양 서피비치）
- 地址：강원 양양군 현북면 하조대해안길 119
姜泰武包咗成架SNS超出名漢堡餐車俾夏莉做驚喜，呢個場景係喺襄陽「Surfyy Beach」，同《二十五，二十一》拍攝地嘅「河趙臺海水浴場」好近，下次可以一次過去打卡！
11. Sky Bay Hotel鏡浦（강릉 스카이베이호텔 경포）
- 地址：강원 강릉시 강문동 258-4
狼狽嘅夏莉俾姜泰武掉底走咗去之後，自己一個去到酒店入住，遇到朋友嘅同時，姜泰武又好似奇蹟咁出現幫佢解圍。
12. 樂天世界（롯데월드）
- 地址：서울 송파구 올림픽로 240
為咗賠償姜泰武嘅吻，又唔捨得叫夏莉使太多錢，姜泰武就叫夏莉陪自己去樂天世界玩，不過想喺度同大家講一個TMI，樂天世界經常作為韓劇拍攝地，但點解多數只影室內呢？因為劇組包場拍攝通常係人流較少夜晚去影，以《社內相親》拍攝為例，包咗18:00至03:00時段，戶外根本影唔到，可以睇得出劇組同演員嘅辛苦。
13. Joain Studio（조아인스튜디오）
- 地址：경기 용인시 처인구 문형동림로 189
姜泰武同夏莉正式拍拖之後嘅某日朝早，話要去約會，當時去嘅係龍仁「Joain Studio」Cafe，睇落相當高級，由戶外到室內每個角落都超好影！係SNS打卡名店之一。
14. 銀星會館（은성회관）
- 地址：서울 영등포구 여의대방로65길 12
《社內相親》第9集，社長點都要跟住夏莉組員一齊聚餐，去到汝矣島「銀星會館」，而季次長仲喺餐廳大顯身手整混酒，最後仲要自己清返，成為最佳亮點。
15. 良才洞花市場（양재동꽃시장）
- 地址：서울 서초구 강남대로 27
夏莉因為知道姜泰武唔鍾意落雨，就去咗一個室內花市，呢度係江南、瑞草一帶嘅「良才洞花市場」，鍾意花嘅朋友，可以嚟行吓。
以上係小編整理出好《社內相親》嘅拍攝地，唔知道大家有冇同小編一樣，睇嘅過程一直陷入社長嘅魅力呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
