logo

韓國唔同地區人口特徵

韓國唔同地區人口特徵!首爾人特別cool?同忠清道人講嘢要至少問3次?

Hongjoo Lee
10 months ago

Hello,大家好,我哋係由韓國人每日提供最新韓國旅行資訊嘅Creatrip


大家都知韓國有分好多地區,每個地區都有唔同特色,而家就等小編為大家逐一介紹有咩特別啦!



韓國唔同地區人口特徵

韓國行政區

韓國行政區

mappr

以韓國行政區劃圖嚟睇,京畿道環繞住首爾、江原道喺右上,而忠清北道同忠清南道合稱忠清道,忠清道左下方分為全羅北道同全羅南道,合併為全羅道。慶尚道係位於忠清道同全羅道右邊,分為慶尚北道同慶尚南道。最後橙色部分係「濟州道」。



1. 首爾

  • 日忙夜晚冇時停

韓國唔同地區人口特徵

무한도전

好多人對首爾人嘅印象係「成日都好忙而且望落好攰」,做緊嘢嘅時候唔可以少咗杯咖啡,不過只要一收工或者係放假,佢哋又好生猛,會成日去鍛煉身體、去學新嘢或者同朋友見面、飲酒等,冇一種會停嘅感覺。


  • 獨立又帶有距離感

首爾人特徵

무한도전

小編個人認為,同首爾人傾偈嘅時候有時會覺得隔咗一埲牆,因為始終係標準首爾話,聽落會冇咁熱情,講嘢都好似要特別小心,加上首爾人多偏向自己搞掂所有嘢,望落雖然好似好有型,但有時都會希望可以幫到少少手。



2. 京畿道

  • 獨特距離感

京畿道人特徵


韓國有一句說話係「如果你係京畿道居民,有20%嘅時間都係喺地鐵度過。」,相當之搞笑。因為有時要上首爾,至少都需要一個鐘或以上,另外比較麻煩嘅係,當大家夜晚玩得最開心嘅時候,因為末班車通常係22:30左右,就要急急腳咁返屋企。


  • 都住京畿道但會約喺首爾見京畿道人特徵


由於京畿道範圍好大,每去一個城市都會有一段距離,為咗方便起見,大家都會約喺中心點「首爾」見面。就好似上圖有一個住平澤、一個住日山同一個住議政府,最後會約咗喺弘大見面。



3. 江原道

  • 薯仔同粟米

江原道人特徵


因為韓國大部分農作物都係嚟自江原道,所以好多人見到江原道嘅朋友,都會講笑問佢哋屋企有冇種薯仔同粟米,但因為事實上好多人屋企的確有薯仔同粟米田,咁樣反而令到佢哋更加嬲。


  • 愛心薯仔

江原道人特徵 愛心薯仔


前排韓國網站有一篇名為「江原道男人如何告白」文章成為熱門話題,故事講述江原道青年如果想對心儀對象表白,會用心形薯仔表白。當然呢個只係一個傳言,並唔係所有江原道嘅人都會咁做。



4. 忠清道

  • 慢條斯理

忠清道人特徵

루리웹

忠清道人講嘢好慢,所以以前有一個故事係講《爸爸,石頭滾下去了(아부지 돌 굴러가유)》,當中提到即使石頭碌到父親面前,個仔只係大叫「石頭跌落去啦!」,結果因為講得太慢,爸爸最後被石頭壓死。小編有一個朋友忠清道嘅朋友,第一次見面嘅時候,都忍唔住講咗句「你可唔可以講快少少?  」。


  • 至少要問三次

忠清道人特徵

tvN 서울촌놈

喺韓綜《首爾鄉巴佬》,嚟自忠清道嘅李凡秀同韓孝珠講,如果向忠清道嘅人問「你要唔要呢個?」、「 你想唔想食?」佢哋多數都唔會即刻答「要或者想」。因為聽講如果問忠清道人問題,至少要問三次,如果一個問題唔問多幾次,佢哋會認為你唔係真心問,會好嬲或者敷衍咁答。


  • 萬用單字「咩話(뭐여)」

韓國文化

來源:인사이트

忠清道人有一個神奇方言叫做「뭐여(咩話)」,代表住嬲緊、驚訝、驚、尷尬、傷心、感動等任何情緒都可以用。



5. 全羅道

  • 好識煮飯

全羅道美食

한국관광공사

全羅道食物相當地道,甚至有句諺語係話「喺全羅道唔需要點樣特別搵餐廳」,因為隨便去一間已經好好味,曾經仲有綜藝以「點解全羅道啲嘢咁好食?」為題進行討論,結論係全羅道憑著平原、山區等地理優勢,發展獨特食材同飲食文化。


  • 方言特色

全羅道方言

뉴스엔

全羅方言句尾通常加「야(ya)、당께(dangkee)、야제(yaje)、잉(ing)」等語助詞,就好似中文嘅「呀、唷、啊」,聽落都會比較舒服。例如閔都凞喺《請回答1994》講嘅道係全羅道方言。



6. 慶尚道

  • 爭執開始:你係邊個?

慶尚道特色

慶尚道

영화 바람

聽講慶尚道嘅人問對方「你係邊個?」之後就會開始鬧交,但有時唔係真係鬧,只係一種問候,但因為慶尚道方言口吻,令人聽落就好似係撩交嗌咁。如果有興趣想睇吓慶尚道方言鬧交、爭執場面,小編建議可以睇電影《風願》。


  • 得意得嚟又好強勢嘅方言

釜山方言

응답하라 1997

慶尚南道同北道方言都有少少差異,例如慶尚北道講得好可愛,聽落好似有啲撒嬌、而慶尚南道有啲僵硬同木訥;當《請回答1997》人氣飆升時,全國人民都愛上慶尚方言魅力,好多人都會模仿。



6. 濟州島

  • 經過一兩座橋就會知道一切

濟州島方言

국민일보

韓國因為地小,有「經過一兩座橋就知道一切」嘅講法,就算唔識某人,但只要透唔其他A、B朋友都可以識到對方,喺濟州更加可以深刻感受到呢句說話。雖然透過朋友嘅朋友,自然可以識到,但另一方面,如果留底一個唔好印象,好容易說會傳出去,所以必須要小心。


  • 用一個鐘去到嘅地方就係遠

濟州島

한라일보

由濟州市去西歸浦市距離大約係一個鐘,所以租車嘅遊客可以用三至四日內遊覽濟州市同西歸浦市,但對濟州島居民嚟講,20分鐘車程以上就會覺得有啲唔方便,更加難以想像點解首爾人返工要用半個鐘以上。


  • 盛產橘濟州島 橘

매경헬스

濟州島被稱為「橘國」,有啲人仲會將橘作為配菜同酒一齊食,佢哋會將橘整成泡菜。去到冬天,濟州島係最盛產,好多人會買嚟送禮。


唔知大家身邊嘅韓國朋友有冇嚟自唔同地區,大家有冇發現呢幾點特徵呢?歡迎留言話俾我哋知。




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章