韓國電子競技文化
韓國電競有幾勁？亞洲金融風暴竟然成為電競發展契機？點解發展得咁好？
Hello，大家好，我哋係由韓國人每日提供最新韓國旅行資訊嘅Creatrip。
大家都知韓國人打機叻，更加出咗好多香港人熟悉嘅遊戲，就好似有跑Online、勁舞團、食雞（絕地求生）等等，如果本身你都鍾意打機，今日就想同大家一齊了解韓國嘅電競文化！
韓國電子競技文化
咩係電子競技（e스포츠）？
위키백과
電子競技簡稱電競，係一項利用電腦、網路等設備進行比賽，同時需要智力（或體力）嘅運動。當舉辦電競比賽或聯賽等活動時，可以透過轉播觀戰。
나무위키
而最近電競喺韓國人心目中地位超高，因為韓國自2013至2017年，連續五年奪得英雄聯盟（LOL）世界冠軍後，兩年失手終於喺2020年再次奪得冠軍，尤其係當時最後一場比賽，更加係引起全世界關注，同時收看直播人數高達388萬。
而2021年，韓國隊雖然輸俾中國，只係得亞軍，但2022年賽事都令人相當期待！而家好多韓國大企業都睇好電競產業發展，所以喺好多節目或者廣告會見到電競選手活動緊。
韓國電競歷史
機鋪格鬥遊戲
나무위키
「格鬥遊戲」係韓國第一個活躍電子遊戲，當時全國雜誌上介紹格鬥遊戲戰隊超過100對，規模相當大。
응답하라 1988
直到90年代後期，遊戲產業快速發展以及專門「職業玩家」出現，社會對遊戲意識不斷提高，就有咗「電子競技」呢一個單字，而喺早期職業玩家，好多都會組隊玩格鬥遊戲。
IMF同電競文化
정보공개센터
不過諷刺嘅係電競文化喺1997年亞洲金融風暴開始流行，當時為咗克服外匯危機，韓國政府努力引入新系統，新設好多網吧（PC방）。所以即使當時遭遇外匯危機，遊戲市場仍然係一片繁榮，《薩爾達傳說 時之笛》、《戰慄時空》、《勁爆熱舞》等遊戲，都係呢個時候上市。
한국경제
上一個世代遊戲霸主，絕對唔可以唔提《星海爭霸》，隨住電腦同網路普及，越嚟越多人開始喺屋機打機，加上申珠暎（신주영）、李基錫（이기석）、林遙煥（임요환）等職業電競選手展現巨大影響力同知名度，佢哋積極參與國內職業遊戲聯賽、成為世界冠軍等。
之後政府都睇好遊戲產業前景，開始喺多方面支援，同時出現「職業遊戲玩家」職業，電競開始被認可為一項「運動」。
《英雄聯盟》誕生
K벤치
喺過去可能只會專注發展《星海爭霸》，不過2009年起，《英雄聯盟（LOL）》出現，喺2011年舉辦世界大賽，喺2012年開始流行，後嚟韓國更培養出洪珉綺（MadLife）、李相赫（Faker）等選手，為韓國遊戲產業創造出全新盛況。
엑스포츠뉴스
當時《國際足盟大賽》、《跑跑卡丁車》、《鐵拳》、《鬥陣特攻》等各種遊戲都舉辦聯賽，為電子競技增添多樣性。
隨住英雄聯盟冠軍韓國LCK（League of Legends Champions Korea）喺2021年被特許經營化，預計未來都會持續引進有潛力選手。另外城南市等各地自治團體，都宣佈大力支持電子競技遊戲團隊。
常見電競遊戲
1.《星海爭霸》
스타크래프트
《星海爭霸》喺韓國非常之成功，可以話係電競喺韓國誕生首要因素。目前佢係擁有最多正式註冊職業選手嘅遊戲，比賽規模同獲勝獎金都唔少，比現有任何電競都要多。
2. 《英雄聯盟》
테크니들
繼《星海爭霸》之後，《英雄聯盟》喺韓國越嚟越受歡迎，甚至以「英雄聯盟冠軍」名義舉行官方聯賽，即使平時唔打機，都會聽過「LOL」呢個字，由2011年起，每年秋天都會舉辦世界冠軍賽，以確定世界上最強戰隊，吸引全球眾多電競愛好者關注。2014年世界錦標賽決賽喺韓國舉行，甚至超過四萬多名觀眾付費觀賽！
3. 《跑跑卡丁車》
지디넷코리아
《跑跑卡丁車》係一款賽車比賽遊戲，由Rodumani Studio製作並由Nexon提供服務，2005年2月被選為電競官方賽事，目前仍然仲準備緊聯賽。
4.《絕地求生》
서울신문
《絕地求生》又稱為「食雞」，喺2017年12月成為有史以嚟最暢銷PC遊戲，全球用戶超過10億，仲舉辦PUBG全球錦標賽等比賽。
5. 《OVERWATCH》
시사저널
《OVERWATCH》係2016年5月尾出現「第一人稱」射擊遊戲，喺世界各地舉行大型錦標賽。2018年為咗成為職業之路，設定由《鬥陣特攻公開賽》、《鬥陣特攻職業競技賽》再到《鬥陣特攻職業電競聯賽》三級晉升道路。
韓國出名電競選手
1. Kim In Jae（김인재）
줌뉴스
Kim In Jae參加過《特種部隊Online》、《特種部隊Online2》、《黑色小隊》、《鬥陣特攻》同《PUBG》等五項賽事，作為國家電競代表，參加2016年《鬥陣特攻世界杯》，仲以壓倒性獲得冠軍。
나무위키
另外佢可愛又溫柔嘅外表，吸引唔少女fans，喺地鐵成日都會見到佢嘅生日應援，人氣都幾高！
2. Kim Hyo Jong（김효종）
나무위키
「Kim Hyo Jong」外表一樣夠哂吸睛！就連打機戴住超厚黑框眼鏡，都令人忍唔住望多幾眼。
디스패치
Kim Hyo Jong喺《鬥陣特攻》聯賽中獲得超高評價選手之一，唔單止韓國備受肯定，亦受到Cruze、TviQ 、Taimou等海外知名選手認可。
3. 洪榛浩（홍진호）
뉴데일리
洪榛浩原先係《星海爭霸》職業選手，以「亞軍」聞名，而家係電競賽事主播，但點鮮解小編要強調佢係「亞軍」呢？因為佢喺退役儀式上講過「大家只記得第一名，但如果你拎太多次第二名，其實好多人都會記住。」
tvN 더지니어스
作為職業選手退役後，佢仲出演過《The Genius 2》同《SNL》等節目，至今仍然相當活躍。
4. 林遙煥（임요환）
jtbc
2000年代象徵電競偶像「林遙煥」，佢改變電競文化，令聯賽票房達到當時高峰，可以話係帶領韓國電競書寫歷史代表人物之一。
憑住個人遊戲策略，獲得「人類皇帝（테란의 황제）」稱號，連續兩次獲得OngameNet《星海爭霸》聯賽冠軍同三次兩大聯賽冠軍、WCG《星海爭霸》部門中唯一二連冠，創下進入決賽最大年齡選手等華麗紀錄。
인스티즈
林遙煥喺韓國職業選手中相當出名，有埋fans club，佢嘅妻子係演員金佳妍，成日都會喺節目上分享佢哋婚姻生活。
5. 李相赫（Faker）
인사이트
上面介紹過嘅選手大家可能都會有啲陌生，但要講到全世界都識嘅就一定係Faker！了美國CNN仲封佢做「英雄聯盟之神！電競界Michael Jordan！」可想而知佢實力有幾咁勁。
佢喺2013年出道，曾獲得三次世界冠軍、兩次MSI冠軍、九次LCK冠軍，Faker喺接受媒體採訪時表示，佢喺清醒狀態有80%時間都係諗緊點比賽。
來MBC 라디오스타
就連Super Junior「宇宙大明星」希澈都係Faker嘅fans，當聽到Faker要上《Radio Star》，希澈即刻取消所有行程，只係為咗同Faker一齊上節目。
電競選手生活
한겨레
由2010年起，鍾意打機嘅朋友應該都會夢想自己成為一位「職業電競選手」，透過遊戲賺取名利，只係諗都令唔少人羨慕，所以好多學生放學之後，都會直接去網吧。聽講2020年教育部公佈數據，小學生夢想職業TOP5入面有電競選手。
한국경제
而韓國呢兩年受到疫情影響，《英雄聯盟》常規聯賽平均觀看人數達到166,000人，比疫情前多咗74%。根據對Faker戰隊T1採訪，韓國有456萬人鍾意LOL，但成為職業選手只係得85人，佔0.0018%。顯示當遊戲成為職業，就唔再係一種愛好，必須做好多例行公事，或者每日要用10幾多個鐘打機，練習到深夜先可以瞓。
데일리스포츠
另外電競選手都會因為姿勢不良，手腕同頸部椎間成日都會痛。另外仲會講到「如果你夢想成為職業選手，就必須準備好放棄除咗遊戲之外嘅一切。」
以上就係韓國電競文化嘅介紹，唔知大家睇完有冇了解多咗呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
