韓國人會遵守/唔遵守嘅規則
韓國人有咩規則會遵守有咩唔會遵守？同香港嘅有幾成似？
Hello，大家好，我哋係由韓國人每日提供最新韓國旅行資訊嘅Creatrip。
相信每個國家或者地區都有啲規則係需要遵守，今日就想同大家講吓韓國人有咩係最擅長或者最唔擅長遵守嘅規則！
韓國人會遵守嘅事
1. 上車前排隊
如果有喺韓國高峰時段搭個巴士，應該都會見到有唔少人喺度排隊，地下會有寫住巴士號碼，如果唔排隊司機未必會知道你等緊車，可能就會直接開走。
2. 唔會用紅筆寫名
同香港人一樣，韓國都係唔好用紅色筆去寫自己名，因為會覺得好似係死亡筆記寫住自己咁，有一種不祥嘅感覺。
3. 回收做得好徹底
雖然香港都會做回收，不過韓國相對嚟講會做得好徹底，無論係膠樽上面嘅膠紙，佢哋都會分開嚟回收，好多韓國人已經習慣哂，甚至連垃圾袋都有分一般或者係食物，不過小編喺韓國生活咁耐....仲係覺得好困難。
4. 發夢夢見豬要買樂透（六合彩）
喺韓國有一種講法係，只要發夢夢到豬就會有好運，有可能係話你會賺大錢，第二日好多人都會去買樂透（六合彩）。另外除咗夢見豬，夢到祖先、名人等都係一個被認為要去買樂透嘅夢！
5. 唔會開風扇瞓覺
KBS
只要一到夏天，風扇絕對唔可以少，不過韓國人喺瞓覺之前有熄風扇嘅習慣，原因係2004年，有一單新聞係講因為一個人開住風扇瞓，之後就過咗身，所以唔少人之後都唔敢再開，雖然後嚟都有人話喺封閉空間開住風扇瞓，都唔會有生命危險，不過唔少韓國人都太敢開。
6. 地鐵唔會坐關愛座
韓國每一個車卡（例如：1-1、1-4）都會有關愛座，為咗孕婦、老人家或者係傷殘人士提供關愛座，不過就算有時韓國人要搭好耐車，有哂普通位只剩關愛座，佢哋都寧願企唔會坐。
7. 考試前唔會食海帶湯或者粥
喺韓國，如果有考試，當日都唔會食海帶湯或者粥，因為佢哋覺得食完好似會失敗咁嘅意思。
雖然呢兩樣食物好有益，不過海帶湯嘅海帶好滑，令到佢哋覺得識咗之後就好容易喺磅上面滑落，就好似我哋香港考試之前都唔會食雞蛋，因為怕會攞零雞蛋。
韓國人唔會遵守嘅事
1. 巴士停低先起身
韓國人做咩都想快啲，就算車上有好多貼住「停車後先好起身」嘅標語，好多人未停低已經企咗起身，為求就係可以快啲落車。
2. 過馬路時唔應該踩住單車
韓國有一個交通法係講，唔可以踩住單車過馬路，不過遵守嘅人唔算多，但如果大家下次嚟韓國，最後都係落咗車之後，拖住單車過馬路，咁樣相對會安全得多！
3. 唔會理推定拉
韓國有一個笑話係講，韓國人最唔識分嘅就係推/拉，就算門口有好大隻字寫住，佢哋好多時都會揀推開道門，唔得先會去拉，唔知大家又會唔會係咁呢？
4. 唔聽醫生講
tvN 슬기로운 의사생활
雖然有時醫生講嘅嘢好簡單，只要跟住做就冇問題，但唔係人人都會去聽，就好似醫生俾三日藥，正常就算好返應該都要食埋佢，但有啲人可能食完一、兩次有啲好轉就會唔食。
5. 喺扶手電梯乖乖地停低
小編覺得香港人同韓國人性格都係好急，如果見到扶手電梯好多時都會行，唔會乖乖地停低。
6. 搭lift撳閂門唔止撳一次
韓國人做咩都急，就算而家疫情，𨋢入面為咗防止疫情擴散，喺撳掣嘅位貼咗抗菌膜。不過大家通常都會見到閂門嘅掣張抗菌膜係爛嘅XD
唔知大家睇完，又覺得香港人有咩會遵守有咩唔遵守呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
