十大韓國人春天必聽歌曲
又到春天~以下呢幾首韓國人最鍾意嘅春天歌你又聽過未？
Hello，大家好，我哋係由韓國人每日提供最新韓國旅行資訊嘅Creatrip。
春天係一個令人心動同充滿希望嘅季節，望住四周圍開滿花嘅風景都會覺得好療癒同開心~ 小編自己好鍾意趁春天唔太熱嘅時候一邊聽歌一邊散步，大家又知唔知韓國人春天必聽邊幾首歌呢？
自認係KPOP迷？
十大韓國人春天必聽歌曲
Roy Kim《봄봄봄(Bom Bom Bom)》
小編喺公司問韓國同事講起春天會諗起咩歌，幾乎有8成都係答呢首！雖然呢首歌已經推出咗超過10年，但係每逢春天都可以喺街上聽到XD
LUCY《개화(Flowering)》
如果冇follow開KPOP，或者平時多數只會聽IDOL歌嘅話，可能未聽過LUCY呢隊band！呢隊樂隊最特別嘅係有個成員會拉小提琴，古典弦樂加上band音樂真係好特別！而呢首《Flowering》更加係佢哋嘅代表歌，每到春天都會出現喺人氣排行榜，聽完會令人突然好有衝勁！
IU《봄,사랑,벚꽃 말고(Not Spring, Love, or Cherry Blossoms)》
呢首歌大家都應該唔陌生！IU呢首歌嘅MV觀看次數已經超過1.3億，無論喺韓國定海外都一樣咁受歡迎，夜晚聽住呢首歌散步真係好寫意~
10CM《봄이 좋냐??(What the Spring??)》
《What the Spring??》呢個歌名一睇就知道，呢首歌唔係講緊春天有幾美好，而係妒忌緊春天拍拖嘅情侶們，歌詞入面仲話春天總會過去，櫻花都有一日會凋謝，其實真係冇咩咁值得鍾意同心動XD
BTS《봄날(Spring Day)》
講起春天一定唔少得防彈嘅《Spring Day》，歌詞同MV入面都令人聯想起世越號事件，歌詞非常感人！
想親眼睇韓國歌手表演？
Busker Busker《벚꽃엔딩(Cherry Blossom Ending)》
講起韓國春天一定唔少得櫻花，講起櫻花就一定唔少得《Cherry Blossom Ending（櫻花結局）》呢首歌！就算大家冇聽過歌名，睇韓國綜藝都一定會聽過一兩次，旋律同歌詞都同春天勁夾！
Loco&Yuju《우연히 봄(Spring Is Gone By Chance)》
《Spring Is Gone By Chance》係韓劇《看見味道的少女》嘅插曲，一開頭第一句歌詞就令人勁心動！
張凡俊《흔들리는 꽃들 속에서 네 샴푸향이 느껴진거야(Your Shampoo Scent In The Flowers)》
呢首歌係《浪漫的體質》嘅插曲，一推出之後勁多人翻唱，而且旋律勁洗腦！可能因為歌手係Busker Busker主唱，所以一聽到把聲就會覺得係春天XD
I.O.I《벚꽃이지면(When the Cherry Blossoms Fade)》
I.O.I呢個限定女團相信係唔少KPOP Fans嘅回憶，《When the Cherry Blossoms Fade》呢首歌由前B1A4成員振永作曲填詞，歌詞寫得好靚，推薦大家一邊聽一邊睇歌詞！
Wanna One《봄바람(Spring Breeze)》
Wanna One同I.O.I一樣都係韓國選秀節目限定團，好多KPOP Fans都話覺得冇其他團體可以超越到佢哋，而且佢哋每首歌都非常膾炙人口，當中《Spring Breeze》入面有句歌詞係“春風過後我們再次見面”，希望真係可以再次見到佢哋合體啦。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
