Hello，大家好，我哋係由韓國人每日提供最新韓國旅行資訊嘅Creatrip。

同一種食材，唔同國家都可能有唔一樣嘅食法，今日小編同大家分享5個香港同韓國面對同一樣食材，但唔同食法嘅例子啦！

港韓食法大不同

1. 茄汁豆

HKTVmall

見到呢罐茄汁豆，即刻諗起細細個成日食嘅茄汁豆撈飯，或者去茶餐廳食嘅早餐、常餐！

구팡돌官網

韓國都有類似嘅茄汁豆罐頭，之不過佢哋嘅食法完全唔同！佢哋多數會用嚟做湯底，好似部隊鍋咁。小編有次同韓國朋友食部隊鍋，見到有茄汁豆就攞嚟撈飯食，韓國朋友個驚訝樣真係到而家仲好記得！

2. 通粉

講到茶餐，另一個經典就係火腿通粉，熱辣辣，仲可以配唔同湯底，例如蕃茄湯、忌廉湯等等，朝早食完真係人都醒神啲！除咗湯嘅通粉，仲可以炒，款式千變萬化！

emart mall

韓國都有通粉賣，但佢哋通常係整做沙律當配菜，好少會煮熱當一餐嘅主菜！

3. 紫菜

第三樣就係紫菜啦！好多人嚟韓國旅行都會買紫菜，通常都會當零食咁食。

擷取自MBC《我獨自生活》286集

不過喺韓國，除咗大家都知嘅一條條紫菜飯捲（김밥）之外，平時佢哋仲會攞嚟餸飯，用筷子夾起一細啖飯再用紫菜包住，將塊紫紙痴住啲飯一齊咁食，又或者有人會再點豉油嚟食。上圖Jessi出演《我獨自生活》時都用紫菜咁包住啲飯嚟食，仲話「點解紫菜配飯會咁好食」添！

4. 蔥

史雲生食譜/維基百科

細個跟媽咪去街市買餸，老闆總會搭多條蔥！啲蔥通常係煮餸嘅時候加上去吊吓味，或者加薑、豉油等等整成醬料，有時候會用嚟炒蛋。

ssg/g9

而喺韓國，蔥都係一樣好常用嚟醃嘢嘅食材，但有一樣嘅食法，係香港人諗都諗唔到嘅，就係醃成泡菜，當做一個小菜咁食！

5. 蔬菜類

由細到大都聽「食多啲菜，健康啲！」，煮嘅方法通常用蒜蓉炒，或者用水烚，視乎個人嘅口味，有人加蠔油，有人唔加就咁食。除非係當沙律咁食，一般都會煮熟嚟食嘅。

而喺韓國就比較鍾意生食蔬菜，例如食燒肉嘅時候用生嘅菜包住嚟食。又或者佢哋都會有唔同嘅材料，辣椒（粉）、洋蔥等將啲菜醃成泡菜。就算唔係醃做泡菜，都只會洗乾淨之後，直接點包飯醬（쌈장）嚟食，又或者稍稍焯熟，再雪凍嚟食。記得小編啱啱嚟韓國嗰年特別凍，食飯嘅時候見到枱上面有碟結咗冰嘅西蘭花，同枱嘅韓國人點辣醬嚟食，小編睇到覺得好新奇！

以上就會小編諗起係同一種食材，但香港同韓國就有唔同食法嘅例子。大家又有無諗到其他例子呢？歡迎留言同小編分享！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購