11位成功反轉命運嘅偶像
家境唔代表一切！11位成功反轉命運嘅偶像！
Hello，大家好，我哋係由韓國人每日提供最新韓國旅行資訊嘅Creatrip。
或者好多人都會覺得偶像外表好光鮮亮麗，但你又知唔知都有好多偶像有艱苦嘅過去？能夠成為而家受歡迎嘅偶像，佢哋都經過好多挑戰先有今時今日嘅成就，證明咗「輸在起跑線」係錯嘅！今日就同小編一齊睇吓呢啲偶像嘅勵志故事啦！
11位成功反轉命運嘅偶像
李孝利
李孝利曾經提到，佢喺一個貧窮嘅家庭到長大，細個嗰陣都得唔到其他小朋友有嘅嘢，佢屋企甚至窮到供唔起佢讀幼稚園添。不過幾經千辛萬苦，李孝利最終都成功成為韓國代表嘅女歌手，仲同老公喺濟州島過住好幸福嘅生活添！
東方神起 - 允浩
作為第二代KPOP嘅傳奇人物之一，或者唔少人只係知道佢嘅成就而唔知道允浩其實都有好艱苦嘅童年。當年允浩嘅家人面對巨大嘅經濟問題，後更面臨破產而被逼要瞓地鐵站添。而且當時允浩嘅父母亦都非常反對佢做明星，所以中斷哂對佢嘅所有支援。為咗解決呢個問題，允浩連打幾份工，有時仲會瞓喺地鐵站過夜。允浩2014年出演《The Beatles Code》提到，佢當時瞓地鐵嗰陣，因為唔小心瞓咗人哋個位而俾人叫醒。只不過佢付出嘅努力同熱情並冇背叛佢，佢成功成為SM練習生，仲以東方神起出道，得到好多人嘅喜愛。
JYJ - 在中
同樣係KPOP傳奇之一嘅在中，細個曾經因為家境唔好而俾自己媽媽拋棄喺弧兒院。15歲嘅時候佢自己一個去首爾參加SM嘅auditon，希望實現自己嘅夢想。佢為咗喺首爾交每月15萬won嘅房租（大概1050港幣），佢喺地鐵站賣香口膠等等打過好多唔同嘅工。最辛苦嘅時候，為咗交租甚至走去賣血添。不過就算咁辛苦，在中都克服哂呢啲難關最後成功改善命運。
Super Junior - 利特
Super Junior係出咗名開朗又幽默嘅idol，不過喺佢哋嘅笑容背後，或者冇咩人知道其實利特都有個好辛苦嘅童年。佢細個多次俾自己爸爸家暴，佢嘅父母更喺利特5歲嘅時候就已經離婚。利特當兵嗰陣，佢嘅爸爸殺咗利特嘅爺爺嫲嫲再自殺，更加將巨大嘅債務留低俾佢。雖然利特有不幸嘅童年，但佢依然不斷努力咁將問題一一克服，成為一眾ELF冇翅膀嘅天使隊長同成功嘅KPOP偶像之一。
Super Junior - 銀赫
Super Junior嘅main dancer銀赫都曾經因為家境問題而辛苦過。當時佢屋企連廁所都冇，每逢要用廁所就唯有去屋企附近地鐵站嘅公共廁所。鐘意跳舞又負擔唔起正規跳舞學校學費嘅銀赫，選擇努力參加街頭表演，透過表演訓練自己嘅舞技。最終皇天不負苦心人，銀赫被SM揀中，成功以Super Junior出道。
BIGBANG - 太陽
太陽嘅童年同樣唔簡單，年僅13歲嘅太陽為咗減輕屋企經驗壓力，決定搬出去自己住。就係因為呢啲難關，令佢燃起想成為歌手賺錢養家嘅決心，最後成功以BIGBANG成員同solo歌手出道。
2NE1 - Sandara Park
Dara因為家境問題，由細個就搬咗去菲律賓生活，只不過佢爸爸搞外遇，喺韓國另外再組織咗家庭，之後仲攞哂屋企啲錢走咗佬。為咗照顧媽媽同兩個細佬妹，Dara無可奈何喺19歲就出嚟創業，更加影過成人畫報，為嘅就係想快啲出名賺錢。後來Dara事業開始慢慢順利，佢爸爸就因為犯罪被捕。不過好彩嗰時佢已經成功以2NE1出道，成為傳奇嘅KPOP女團之一。
INFINITE - 聖圭
聖圭細個家境都唔太好， 有時佢無辦法甚至要喺朋友屋企過夜，而且佢父母亦都唔支持佢做歌手。不過經過多次audition失敗後，聖圭被Woolim娛樂錄取，最後成功以INFINITE隊長出道。
IU
IU係KPOP最成功嘅solo歌手之一。IU細個屋企都負債累累，喺佢父母番工嘅時候，佢成日都要留喺親戚屋企。佢之後更加同佢嫲嫲住喺充滿甲甴嘅屋企添。IU曾經提到，因為佢嘅歌手夢，曾經俾好多親戚取笑，但佢嘅嫲嫲就非常支持佢。經過多次audition唔合格，IU終於搵到有公司賞識佢，並成功以IU出道，成為韓國最有才華嘅歌手之一。
BTS - SUGA
SUGA作為BTS嘅成員，其實佢都有一段辛苦嘅過去。喺2017年一次回歸嘅時候，佢曾經提過高中時期賺得好少錢，所以佢每日都要食1000won嘅麵再搭巴士番屋企，同食2000won嘅炸醬麵再行兩個鐘番屋企之間做選擇。佢仲提到其實佢寫歌唔係賺太多，想知道更多佢嘅心路歷程可以聽吓佢嘅歌！
BTS - V
BTS嘅V都來自一個生活艱難嘅家庭。佢出生於農民家庭，所以成日都好缺錢，佢甚至一度以為自己會成為一位農民而唔係歌手。當初帶V一齊去參加auditon嘅朋友，都一定冇諗過咁嘅決定竟然可以令佢成為全世界有名嘅歌手！
以上就係11位克服自身困難，最後成功反轉命運嘅偶像啦，如果大家有咩意見都歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
