韓國新鮮又有趣嘅二手交易故事
賣夢、賣日記、仲可以搵人幫手捉曱甴？利用韓國嘅二手交易平台可以做到咩地步？
Hello，大家好，我哋係由韓國人每日提供最新韓國旅行資訊嘅Creatrip。
大家平時多唔多買二手嘢呢？韓國人好興用중고나라（Joongonara）、당근마켓（Karrot Market）同번개장터（Bunjang）等等嘅二手買賣平台嚟做二手交易。特別係新冠疫情之後，就令二手交易市場更加活躍起嚟啦。因為二手交易多數都可以而合理嘅價錢進行交易，所以特別受年輕一代歡迎。同時因為二手交易市場嘅成長，二手買賣平台亦都開始出現一啲好千奇百趣嘅交易。今日就等小編同大家介紹吓呢啲有趣嘅故事啦！
可愛又溫馨嘅故事
1. 我賣我嘅夢境！
唔知大家有冇聽過賣夢呢？韓國人相信當發到啲暗示好運嘅夢境嘅時候，將夢境賣俾其他人嘅話可以令對方都得到好運。例如喺韓國如果夢見豬嘅話，有得到財富嘅講法，所以發到呢個夢嘅人好多時都會去買樂透（即香港六合彩）㗎！而呢個時間如果同朋友講夢境內容再收少少錢嘅話，就可以將好運傳埋俾朋友㗎啦！
而喺呢啲二手交易平台上面，竟然真係有人會賣自己嘅吉夢！如果因為買咗夢而好運到中樂透頭獎嘅話就真係好啦，係咪？雖然暫時都未有呢種後記哈哈🤣。
2. 曬寵物
或者有人見到呢啲相會嚇一跳？放心絕對唔係賣貓或者賣狗！睇介紹嘅話可以見到賣家強調唔係賣，只係想曬寵物。😂
相信所有養寵物嘅朋友都會想向全世界曬自己可愛嘅寵物，除咗曬俾朋友，呢啲貓主狗主更加放上二手交易平台上面曬添！而韓國嘅網民亦都好配合咁會讚佢哋可愛，仲會留言「又係得我冇貓/狗...」等等嘅反應🤣。 咁嘅程度絕對稱得上係免費咁成功曬寵物啦呵？
3. 分享我哋狗狗嘅週邊商品
呢個post係早前喺SNS得到好多討論嘅狗仔貼紙免費分享故事。上傳呢個post嘅人覺得自己隻狗好得意所以print咗一堆貼紙，但佢又想更多人同佢一齊欣賞自己隻狗有幾可愛，所以最後就放咗上二手交易平台上面啦！
theqoo
而且佢仲會帶埋主角狗去面交添！呢種破格（？）嘅marketing策略吸引咗更多人申請要佢張貼紙，聽講因為人氣太高，賣家足足派咗2個月先派得完添！
theqoo
因為喺短時間得到幾百人以上嘅關注而令佢提早停止咗免費分享。轉番收生產貼紙嘅原價同郵費之後，每逢星期三同星期六朝早10點同夜晚8點都進行狗仔嘅fan meeting嚟面交添，真係一個好得意嘅故事！相信不論賣方定買方都會係好深刻嘅回憶！
4. 畫畫俾你
幾個月前，一位小三學生為咗賺錢買生日禮物俾爸爸，佢喺二手交易平台上面收到每張100won幫人畫畫，雖然只係照住相畫，而且唔係啲咩專業嘅畫功，但一個小朋友為咗爸爸嘅生日禮物做到咁，真係好乖又好得意😭。
幫襯（？）完小朋友之後嘅人因為佢嘅純真同可愛而感動，開始喺各大社群分享後記，令呢位小朋友喺網上紅起嚟，之後更令唔少鐘意畫畫或者叻畫畫嘅人，開始流行喺二手交易平台上面賣畫添！多數都係免費，或者只係收好少錢，當係做善事！
5. 嚟睇吓我嘅日記同信
講到賣日記，大家大多數會諗起唔用嘅日記簿啦係咪? 之但係早前喺一個二手買賣平台上出現咗一個反應好熱烈嘅post，要賣自己努力寫嘅日記咁話喎。最得意係佢喺介紹嗰度話「保證有趣」，「如果我之後成為一個更叻嘅人的話，價錢可能會升㗎。」賣家呢種堂堂正正嘅語氣吸引更多人嘅關注。
好多網民都表示真係好想睇吓，都有人話想投稿做小說家嘅人買嚟做題材參考都幾ok咁話。竟然賣自己嘅日記，真係好神奇！甚至有人行出嚟話要賣前男友寫俾自己嘅相添😂，真係好想知係咪真係有人會買。
6. 唔該幫我捉曱甴
自己一個人住嘅話冇嘢比見到曱甴更得人驚啦，特別對於好驚捉曱甴嘅人嚟講，真係一件好恐怖嘅事！但呢種事竟然都可以靠二手交易輕易咁解決！有人喺二手交易平台上面po話，如果有人幫佢捉曱甴嘅話就俾3萬won佢。
「真係唔知可以做咩...」，「有啲似曱甴，同手指公差唔多大細，識飛。」只係睇post都feel到賣家有幾驚，真係好認真咁搵緊人幫佢！
之後賣家更up咗後記認證咗過咗數嘅後記添，聽講呢個方法之後都好多人用🤣。
7. 同我一齊~（活動）！
당근마켓
二手交易平台用家之間都好常會見面㗎！特別好似Karrot Market呢種主要以同一地區嘅人為交易對象嘅平台，用家之間真係好容易就可以識到附近嘅朋友。好多二手平台用家會po文搵人一齊做某啲活動添，例如「搵今日一整日都一齊溫書嘅人」、「搵每星期一齊跑3次步嘅人」或者係搵人一齊去啲限制最低消費為兩人份嘅餐廳添！
mbc
實際上綜藝節目《玩什麼好呢？》就正正show咗呢種交易係點啦！一位青年喺Karrot Market度開po搵人一齊去燒肉店食飯，最後竟然係國民MC劉在錫應邀去咗，相信呢件事對於嗰個人嚟講一定會好深刻啦！
令人衝擊嘅故事
1. 賣BB
上年韓國發生咗一件引起好大影響嘅社會事件，就係二手平台上面竟然出現咗有人以20萬賣一個36個月大BB嘅po啦，呢件事一出現就喺網上引起好大嘅爭議，警察更即刻展開調查，最後出po嘅人以販賣兒童未遂被捕。
經調查後發現，出po嘅係個BB嘅阿媽，因為佢係未婚媽媽加上冇工作，所以佢打算搵人收養自己嘅小朋友。只不過因為佢聽講專門嘅收養機構都要經過好複雜嘅程序，所以衝動之下先咁樣開po賣仔。有意見指，未婚媽媽喺韓國好難維持生計先間接造成呢件咁令人震驚嘅事，所以呢件事嘅發生嘅濟洲島嘅知事（類似省長概念）表示，佢哋會研究提出喺社會層面可以保障未婚媽媽同小朋友嘅方法，而呢個po上傳嘅平台Karrot Market亦都表示，佢哋會研究方法以防類似嘅事件再次發生。
2. 盜用相片同人口販賣
就好似上面賣BB件事咁，曾經亦都有發生過盜用其他人嘅相嚟販賣人口嘅事。上年其中一個二手交易平台上面，一位青少年竟然出咗個有關販賣殘障人士嘅po。呢年事都同樣喺網上引起好大嘅反應，之後先發現原來係佢盜用咗自己一個非殘障人士嘅朋友嘅相而開嘅玩笑。再後嚟更有人出「生活艱難，我要賣自己。」嘅po，仲有po出女性嘅全身照，唔少網民都好嬲咁話呢個係助長性交易嘅po，最後發現呢件都同樣係盜用相片之後再開玩笑嘅事件。😠
雖然可以二手交易嘅物品種類變多咗，但因為可以販賣嘅標準唔夠清晰而引起咗呢啲不法事件嘅發生。所以唔單止呢啲平台要設定更清晰嘅準則，同時呢啲平台嘅用家嘅道德意識都必須有所改善。
二手平台欺詐案例
除咗令人衝擊嘅故事之外，二手交易欺詐案都係一個非常嚴重嘅問題，當我哋遇到騙局，到底應該點樣處理好呢？
1. 寄磚頭
喺2003年，有一個人喺二手平台買一個電話，點知佢收到嘅係一舊磚頭，當時呢件事擺上論壇，相當之出名，甚至有啲人仲會只寄零食包裝、一張紙條等。
2. 玩失蹤
好多時喺傾緊話要買嘅時候，賣家都會覆得好快，幾時聯絡佢都會覆，不過有啲衰嘅賣家一收到錢就會玩失蹤，甚至有時可能係約面交，點知當日完全聯絡唔到。
3. 將件貨Set貴啲
如果係二手出售，正常應該要賣得平過原價，但有啲人會將佢賣返同等價錢或者更貴，當然醒目嘅人唔會買，但有啲唔知成本價嘅人就會天真墮入陷阱。
如果被騙可以點做？
1. 面交
雖然有時面交係麻煩咗少少，不過呢個都係一個好方法，特別係有時買啲貴嘅電子用品、樂器等，喺面交嘅時候先試吓O唔OK，咁就唔怕被呃。
2. 請賣家send商品嘅相
雖然有時賣家都會上傳一啲關於商品嘅相，但如果想睇得再清楚啲，可以喺要求事項請賣家再影多啲相，最好係叫佢唔同角度都影，因為有時賣家可能係偷網上嘅相，如果佢肯影同有埋時間顯示嘅話，咁就可以知道佢係真。
3. 用安全嘅交易服務
只要向二手平台俾少少手續費，咁你就可以避免直接過數俾賣家，之後賣家寄出商品，當你收到之後再撳確認，平台先會過數俾賣家，尤其係買相對貴嘅商品，咁樣做對大家都好。不過因為賣家要隔一段時間先會收到錢，有啲比較固執嘅賣家可能會直接叫你過佢戶口，如果佢一直催，好可能係呃人多，大家要小心。
4. 確認賣家評價
喺二手交易平台上，你可以睇到賣家過往賣嘅商品，甚至啲人嘅評價，大家要睇清楚，再考慮賣家值唔值得信任。
5. 搜尋賣家戶口號碼
喺過數之前，韓國有一個叫做Thecheat嘅網站，你可以喺嗰度打賣家嘅戶口號碼，去睇吓呢個號碼之前有冇咩欺詐個案。
6. 就算係細嘅金額都要申報
雖然有時喺二手平台只係買啲幾千至萬won嘅商品，但如果賣家收咗錢之後又唔寄貨，一定要申報，因為有時可能一開始呃幾千，慢慢會再呃其他人幾十萬，甚至幾百萬，為咗唔好有更多受害者，遇到呢啲事都唔好驚同怕，一定要講出嚟！
以上就係一啲韓國二手交易平台上面發生嘅一啲故事啦！隨住二手交易越來越活躍，除咗會出現更多可愛又溫馨嘅故事，都有機會引起唔同嘅非法案件。為咗唔好令呢啲二手交易平台成為犯罪嘅溫床，韓國社會各界都需要更努力先得。
大家又對今日呢個主題有咩意見呢？歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
