韓國首爾垃圾分類方法
啱啱到韓國，唔知點將垃圾分類？分錯咗被人罰錢？唔怕！等小編幫大家解決呢個疑難啦！
Hello，大家好，我哋係由韓國人每日提供最新韓國旅行資訊嘅Creatrip。
隨住人口不斷增加，垃圾嘅數量當然跟住變多，所以垃圾分類非常重要！好多國家都推動環保回收嘅政策去處理垃圾。發展迅速，人口又多嘅韓國亦都唔例外，政府都制定咗一啲垃圾分類回收嘅措施。最近香港都開始試推行垃圾收費政策，大家又覺得有冇用呢？
韓國首爾垃圾分類方法
回收嘅重要性同歷史
首爾係一個不斷發展緊嘅大都市， 在制定回收（재활용품）政策之前，首爾嘅所有垃圾都會送去垃圾堆填區或者焚燒。不過呢種垃圾處理方法其實對環境有害，所以需要一個更好嘅方去處理垃圾。韓國喺 1990 年代開始多咗關注垃圾回收問題，之後韓國環境部推動咗好多政策。
其中一個政策係 1995 年推動嘅按垃圾體積收費 (VBWF) 系統，即係規定由消費者為自己製造出嚟嘅垃圾付費。推行呢個政策最先要求大家必須買指定嘅垃圾袋去裝垃圾（之後會詳細介紹），但係因為好多指導方針都唔清唔楚，令到當時唔可以好嚴格咁執行。
不過而家韓國人已經適應晒呢啲政策，回收已經係日常生活習慣嘅一部分，亦都可以睇成喺韓國生活嘅一個好處，因為做緊嘅嘢真係保護到環境。而家，包括可回收物在內嘅所有垃圾都經過分類先會送去回收廠，而食物垃圾就當做堆肥或者動物飼料。
Yonhap news
雖然有好多政策幫助減輕環境負擔，但到今日仍然存在一啲問題。首爾面臨最大嘅問題係市民唔將可回收嘅廢物沖洗咗先揼。 如果上面仲有殘餘物（例如食物）嘅話，就回收唔到。所以為咗提高回收率，免得浪費，政府處理呢啲可回收嘅廢物前會清潔咗先。
垃圾處理
政府推行嘅 VBWF 系統中，有按垃圾類型嘅專門垃圾袋， 一般可以分為：食物垃圾 (음식물 쓰레기)、可回收物品 (재활용품)、唔可以回收物品/一般垃圾 (일반 쓰레기) 同大件垃圾。
喺韓國每一個區都會有唔同指定嘅垃圾袋，如果大家只係用一個普通黑色膠袋去裝，可能就會被罰款，同時冇得被回收。所以大家係揼垃圾之前記得一定要先買垃圾袋，而家就等小編同大家講解每一個垃圾袋大約係幾錢啦。
每區有特有的垃圾袋，唔可以隨便咁用， 例如如果住喺江南區，就唔可以用鐘路區嘅垃圾袋。呢啲垃圾袋可以喺當地雜貨店、超市或者便利店買到，價格會因地區、大小同係咪用現金或者卡嚟買而有所唔同。普遍嚟講，一個20L嘅一般垃圾袋係480won（約HKD3.3），3L嘅食物垃圾袋大約 300 won（約HKD2）。
另外每一個區嘅垃圾袋可能顏色都會有唔同，不過通常一般垃圾都係白色。
瑞草區嘅一般垃圾袋（일반 쓰레기）
瑞草區嘅食物垃圾袋（음식물 쓰레기）
食物垃圾袋都會根據唔同區有唔同嘅顏色，瑞草區係藍色，但其他區有可能係黃色或者粉紅色。
另外，一啲住宅大廈會有一個特定嘅垃圾處理區。 不過要留意，某啲垃圾只可以喺特定日期先可以處理，所以要睇清潔本身大廈嘅政策。
至於一啲無法輕易處理嘅大件物品，就要可以聯絡地區辦事處 (구청) 安排回收，同收取費用。
市民嘅責任
市民唔單只有責任將垃圾分類，可回收嘅垃圾仲需要細分，小編就幫大家介紹一吓啦。
無論係邊種可回收嘅垃圾，都應該採取以下嘅步驟：沖洗 -> 摵走所有標籤、貼紙 -> 晾乾 -> 壓扁（減少體積） -> 分類 -> 揼去適當嘅指定位置。
紙類 (종이류)
被食物污染嘅紙製品係唔可以回收，只可以當一般垃圾。
報紙需要確保係乾同平，廣告傳單可能會夾雜咗膠，需要分開處理。書或者筆記簿就要撕走封面，如果係螺旋型嘅筆記簿，就要將膠嘅封面同膠圈分開處理。紙杯要清空，用水沖洗乾淨，壓扁之後先揼。
至於盒同紙板，一定要摵走所有膠紙、貼紙同標籤，確保佢哋係扁平同乾嘅，然後疊起再綁埋一齊，再揼去適當嘅區域。
包裝紙盒 (종이팩)
包括牛奶紙盒、紙巾筒、廁紙筒同紙巾盒。
要摵走所有唔係紙質嘅材料（例如任何塑料），清洗乾淨同放平，疊好再綁起處理。
膠嘅容器 (플라스틱 용기류)
例如係膠嘅飲品樽、洗衣液嘅樽，呢啲容器通常都係有顏色（透明膠樽係屬於另外一個類別），一樣要經過沖洗先好揼，如果有其他標籤、貼紙係由同本身容器唔同嘅材料製成嘅話，就一定要喺處理之前摵走去。如果係好難清洗嘅（例如牙膏），就要當一般垃圾處理。
要留意，玩具、文具、衣架、牙刷、電話、BB車等等都唔屬於呢一個類別。
膠袋類 (비닐류)
主要係指用包裝紙、膠袋，一樣要清潔好先回收。有啲睇落好似係膠，例如膠手套、膠墊、枱墊等等都唔屬於呢一個類別。
透明膠水樽 (투명페트병)
透明膠樽瓶係一個單獨嘅類別，因為呢類型嘅樽容易啲回收，而且材料嘅質素高啲。呢啲樽可以回收之後被製成衫、鞋、手袋等等。
處理呢類型樽嘅方法好簡單， 清空之後沖洗乾淨，摵走標籤，壓扁，然後擰返個蓋就得啦。淨係將個標籤摵走就大大提高呢啲樽嘅回收率。好似上圖咁壓扁個水樽之後，摵走標籤再擰返個蓋就搞掂啦。要注意嘅係，唔同地區有唔同日子回收呢類膠樽，要睇清楚日子先好揼。
發泡膠 (흰색 스티로폼류)
包括泡泡紙，或者用嚟保護盒入面物品嘅填充物，呢啲材料通常會被製成毛氈、框架、混凝土等等，但係而彩色嘅發泡膠同建築用嘅發泡膠就無法回收。
回收前一樣需要清空 -> 沖洗 -> 摵走標籤、貼紙 -> 揼去指定區域。
一啲用嚟保護電子產品（例如電腦、電視、廚房電器等）嘅發泡膠，通常可以拎返去買嗰間舖頭，佢哋會幫手回收。
玻璃樽 (유리병)
玻璃樽有兩種，一種係可以帶返舖頭攞返押金嘅，一種係EPR（Extended Producer Responsibility）嘅樽。EPR 玻璃樽上面會有標記（如上圖），可以喺屋企度回收呢類嘅樽。
如果係好似上面張圖嘅玻璃樽飲品，就可以拎返舖頭攞返押金，通常係100-130won（約HKD0.7-0.9）左右。
無論係邊一種樽，回收嘅過程都係一樣，先清潔，再摵走所有標籤、貼紙。所有碎嘅玻璃、有色玻璃、水晶、燈泡、花樽、瓷器、廚具都係唔可以回收。
金屬罐、鐵類 (금속캔 및 고철류)
包括飲品鋁罐、罐頭、釘、 金屬線、純鋁（唔包括錫紙）等，呢啲材料被回收去整其他嘅罐同鋼筋入面。
同樣需要清潔乾淨，摵走所有標籤、貼紙之後先回收。一啲裝過gas喺入面罐，回收之前，一定要在個罐上面打一個窿，避免爆炸。
如果有淨低gas嘅罐，可以用指定嘅袋包好，再聯絡地區辦事處去處理。
廢棄電子產品 (폐전자제품)
如果更換電子設備，可以要求舖頭回收舊嘅產品。 例如買咗一部新 Macbook，可以要求 Apple Store 職員回收舊嘅 Macbook。
另一個方法係揼去有收集電子垃圾嘅地點。至於大型電子產品（雪櫃、電視等），可以聯絡地區辦公室 (구청) 去安排收費回收。
雜物、其他注意事項
除咗上述常見嘅類別之外，仲有其他唔太常見嘅特殊回收垃圾，小編再一一為大家講解。
電池：通常喺便利店度回收，特別係手機電池。
衫/布料：有專門收集箱回收，包括衫、袋、鞋、窗簾、地毯。但係枕頭、毛巾，同有轆嘅物品，例如：溜冰鞋、手提行李箱，係唔可以回收。
油：食用油凍咗之後容易結成一舊。 如果就咁將啲油倒入鋅盤，可能會整塞去水管。 所以應該將啲油收集喺罐或者樽度，再揼去一般普通垃圾度。
燈膽：爛咗嘅燈膽或 LED燈唔可以回收，先用紙包起，再當一般垃圾咁揼。完整嘅燈泡就可以放去指定嘅回收地點。
生果網：用嚟放水生果或者菜嘅網可以當膠去回收，但如果唔肯定個網嘅材料，都可以放去一般垃圾桶。
冰袋：如果附近有收集冰袋嘅指定地點，就可以揼去嗰度。 如果冇嘅話，可以當做一般垃圾咁揼。
再提提大家，任何未列入上述可回收類別嘅垃圾，都可以當一般垃圾咁揼。包括木筷子、牙刷、尿片、收據、貼紙、藥丸包裝紙、膠紙、被食物污染嘅物品、橡膠/乳膠手套等。
另外有指定 PP（聚丙烯）袋可以回收包括玩具、橡膠軟管、膠繩、鏡、瓷器（碟）、瓷磚、袋、牆紙、膠墊、膠波。如果係少量嘅，都可以放入一般垃圾桶，但如果數量較多，就需要聯絡地區辦公室攞 PP 袋去回收。
公共責任
目前首爾制定減少一次性膠製品嘅計劃同政策，例如大多數舖頭嘅膠袋會費 ₩100（約100），鼓勵市民買嘢嘅時候自己帶定購物袋。
一啲位於首爾嘅麥當勞唔再提供膠飲管。
首爾嘅Starbucks 就用紙嘅飲管。
公共場所亦設有可回收同一般垃圾兩種垃圾桶。
上圖標住PET嘅垃圾桶，就係回收透明膠樽嘅垃圾桶。
到底垃圾桶可以喺邊度搵到？
파이내셜 뉴스
平時喺Cafe、地鐵站、公共廁所等可能都會好易搵到垃圾桶，但係喺街上真係好難見到，呢一點就連韓國人都好有同感。因為由2018年開始，所有飲品禁止帶上車，當時一實施，好多人都習慣唔嚟，因為平時都會買咖啡外賣拎走，但嗰時如果帶飲品上車就會被拒絕，好多人都會為咗快啲上車一口氣咁飲晒，然後就將膠杯隨便揼喺巴士站附近，造成好多垃圾。不過呢個問題最近都有改善，唔少巴士站附近都開始已經有垃圾桶。
另外喺街上好難搵到垃圾桶嘅原因有好多，就好似係人多嘅弘大或者永登浦等市中心。因為人多好多時就會令人想隨便揼垃圾，如果冇好好處理，垃圾就會有好多異味，而且處理嘅成本亦都好高。
所以為咗解決呢個問題，增加垃圾桶嘅數量固然重要，但對於隨便拋垃圾嘅人嚟講佢哋都要遵守基本嘅禮儀。
隨便揼垃圾要罰幾多錢？
如果非法揼垃圾會因為唔同地區，罰嘅價錢都會唔一樣，大約價錢如下：
隨便揼煙頭、紙巾 - 罰50,000韓幣
屋企揼出嚟嘅垃圾 - 罰100,000韓幣
如果唔用指定分類垃圾袋，用咗普通垃圾袋 - 罰200,000韓幣
喺韓國對於非法揼垃圾罰款真係好高，所以大家喺揼垃圾之前一定要買好自己住緊地區嘅垃圾袋，同埋好好分類。
參考資料
如果想更深入了解相關內容，可以撳入以下嘅網頁度睇。
SUSA (Seoul Urban Solutions Agency)
以上就係小編整理嘅首爾垃圾回收規則，希望可以幫到啱啱嚟首爾生活嘅朋友仔啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
