logo

3個韓國二手買賣平台

喺韓國住只係呼吸都洗緊錢?一齊嚟睇吓有邊啲韓國二手買賣平台可以執平貨啦!

HannaVu
2 years ago

Hello,大家好,我哋係由韓國人每日提供最新韓國旅行資訊嘅Creatrip


對於生活喺韓國嘅人會有同感,韓國衣食住行都係錢,物價唔平得香港幾多,所以每次想買新嘢,都會猶豫一陣唔捨得買,因為平時嘅支出已經夠多ㅠㅠ 不過唔洗擔心,今日小編就同大家整理咗3個就連韓國人都好鐘意用,幾乎咩都買到嘅二手買賣平台,一齊嚟睇吓有邊幾個啦!



3個韓國嘅二手買賣平台

1. Karrot Market (당근마켓)

Karrot Market (당근마켓)


당근마켓 (Karrot Market)係由前KakaoTalk員工Gary Kim同Paul Kim喺2015年創辦嘅,而家係韓國最多人用嘅二手買賣平台。佢最特別嘅係,佢會幫用家搵佢屋企範圍6公里之內嘅買家/賣家,可以更容易進行交易之餘,仲可以減低任何用家詐騙嘅機會。


二手買賣平台Karrot Market


操作方法亦都好簡單,只要download個app再用韓國電話號碼開個account就okay啦。不過要留意嘅係,Karrot Market只係允許用家設定兩個唔同地區嘅地址為住宅地址,設定好哂所有嘢就可以開始shopping啦。

如果你係賣家,只要upload你想賣嘅產品嘅相片同描述,再set個價就可以啦。喺韓國,揼好似床褥,衣櫃或者梳化之類嘅大型垃圾嗰陣,需要俾額外嘅處置費用,所以唔少人都會用好低價賣出,當係慳番揼垃圾嘅錢。


喺呢度可以買到免費嘅衣櫃


正正因為咁,你可以用0至2萬won(大概港幣140蚊)買到一個大衣櫃,甚至任何家具電器都買到,只要你肯自己俾運貨。

Karrot Market係個好可靠嘅平台,因為佢對於買賣家雙方都有評分嘅系統,專業行銷人員或者店主都會受到限制,只會預留空位俾真正嘅用家。


2. Bunjang  (번개장터) 

Bunjang (번개장터)


第二個平台係Bunjang(번개장터),呢個平台喺2011年創立,幾乎所有嘢都可以喺上面買到,特別係好多K-POP粉絲會喺上面賣明星週邊或者專輯,呢個平台唔只俾你搵屋企附近嘅買家/賣家,只要係韓國境內嘅都可以進行交易。


二手買賣平台 Bunjang  (번개장터)


就好似Karrot Market一樣,要使用Bunjang同樣需要韓國電話號碼去開account。不過因為Bunjang允許全韓國範圍嘅交易,如果唔係住屋企附近,咁就好難面交,相對變咗會增加受到詐騙嘅機會。

雖然呢個平台本身會做個中間人角色,佢會等買家收到貨之後先再入錢俾賣家,但就算收到貨後轉錢期間,仍然會有受騙嘅風險。所以呢種冇得面交嘅情況,只係進行小額嘅交易會安全得多。


3. Joongonara (중고나라)

Joongonara (중고나라)


最後一個小編想介紹嘅係Joongonara(중고나라)。佢係喺2003年由韓國最大嘅網上平台Naver Cafe嗰度創立嘅,係韓國規模最大嘅二手買賣平台,用家人數高達2130萬人,同上面兩個平台類似,Joongonara容許用家自己揀想進行交易嘅地區,唔一定只限於自己住嘅地方附近。


二手買賣平台 Joongonara (중고나라)


喺呢個平台,用家需要做個人認證,同時亦可以睇到賣家嘅交易記錄同佢嘅交易review添,以防俾人呃。


以上就係小編推薦嘅3個二手買賣平台啦,大家如果喺韓國生活又想執平貨嘅話,不妨download呢三個app嚟用吓啊! 已經有用過嘅話,亦都可以留言同我哋分享吓用後感同經驗!




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章