延南洞美食總整理
嚟弘大延南洞必食嘅當地美食推薦！港式、韓式、西式總有一款啱你胃口！
Hello，大家好，我哋係由韓國人每日提供最新韓國旅行資訊嘅Creatrip。
好多遊客嚟韓國旅行都會去弘大主街嗰頭，不過其實喺3號出口有一個叫做「延南洞」嘅地方，呢度比起有連鎮店，反而多嘅係特色同私房餐廳，今日小編想同大家介紹幾間去到「延南洞」必食嘅餐廳！
弘大延南洞美食總整理
1. Happy Cheese Smile（해피치즈스마일 연남점）
呢間Happy Cheese Smile喺韓國有超多間分店，佢主打係食辣炒年糕同炸豬排。好多韓國人喺Lunch Time、Dinner都鍾意去食，因為價錢平得嚟，量都相當多。
餐廳內部雖然唔算特別多位，但就夠闊落，同朋友一齊嚟輕鬆食high tea都幾唔錯。
比起平時就咁街邊食到嘅辣炒年糕，呢度會先將年糕拎去炸，炸完再鋪喺啲汁上面，唔知係咪因為咁所以食落會覺得更加煙靭，辣到可以調整，小編叫嘅係普通辣，覺得唔算太辣可以接受到。另外炸豬扒係用咗里脊肉，肉超嫩，配埋佢哋提供嘅醬汁一齊食，好好味！
Happy Cheese Smile（해피치즈스마일 연남점）
- 地址：서울 마포구 동교로 244-1 2층 해피치즈스마일 연남점
- 營業時間：11:30 - 21:30
- 價格：Smile炸年糕（스마일 튀볶이）₩9,000、炸豬扒拼盆（돈가스 플레이트） ₩14,000
- 小Tips：由弘大入口站3號出口行6分鐘左右
2. RAT THAT（랫댓）
講到延南洞想食Pizza，不得不提嘅就係呢一間RAT THAT，SBS電視節目《Today》都有介紹過。大家可能會諗喺香港都可以食到Pizza，點解要特別去呢間？因為佢食到嘅味同香港好唔同！而且經常要大排長龍，可想言之佢人氣幾咁高！
朝早同夜晚去都會有兩種唔同feel，小編揀咗夜晚去，相當有情調，而且都幾多人。
呢度主打半半Pizza（반반피자）或者雞皮Pizza（닭껍지피자），小編最後叫咗半半Pizza，口味揀咗雞皮（닭껍질 피자）+ 大蒜薯條Pizza（갈릭포테이토 피자），呢兩款都係佢哋best menu，雞皮口味一食超驚喜！超脆，意外地同Pizza相當夾！大蒜薯條Pizza小編覺得都唔錯，但就有啲偏甜咗少少，兩款都好值得一試！
RAT THAT（랫댓）
- 地址：서울 마포구 동교로 243-4
- 營業時間：每日 13:00 - 22:00（Last Order 21:00）
- 價格：半半Pizza（반반피자）₩26,000 、可樂（콜라）₩3,000
- 小Tips：由弘大入口站3號出口行6分鐘左右
3. GOD EAT（갓잇 연남점）
GOT EAT喺韓國都有好幾間分店，佢主要係食墨西哥料理，好多人食過都係有讚冇彈！
去之前小編有做足資料蒐集，知道佢哋一到Lunch Time同Dinner就超多人去食，所以小編喺平日一開門就去到！裝修得都幾有墨西哥風情。
小編叫嘅係2人Set（A bsolute Set），一上檯份量相當之驚人，除咗可以自製墨西哥卷，仲有炸薯條同炸雞翼，另外仲有一個God bowl（類似拌飯）。
喺韓國可以食到咁多菜真係好難得，而且食嘅時候會覺得好健康，佢哋用嘅材料好新鮮，真係食到人會舔舔脷！
GOD EAT（갓잇 연남점）
- 地址：서울 마포구 성미산로 161-13 1층
- 營業時間：11:30 - 21:30（Break Time 15:00 - 16:30）
- 價格：A bsolute Set ₩32,000
- 小Tips：由弘大入口站3號出口行13分鐘左右
4. 崔老闆家之雞（최사장네닭）
嚟韓國又點可以唔食辣雞湯？呢一間喺延南洞相當出名，因為超多藝人都去過，特別係Infinite成員L更加係佢哋常客！
一入到門口就會覺得好有舊式韓國餐廳嘅感覺，牆上掛滿好多藝人嘅親筆簽名，感覺之後嚟都有機會撞到星！
小編叫嘅係辣雞湯（닭도리탕）2-3人份，量好多，湯好濃郁，雖然係有啲辣，不過真係超惹味，係有一種魔力忍唔住食完一啖有一啖！雞肉嫩，可以同大蔥、薯仔、紅蘿蔔夾住一齊食，湯好好餸飯，超開胃！
崔老闆家之雞（최사장네닭）
- 地址：서울 마포구 연남로 4-1
- 營業時間：11:00 - 22:00、逢星期四休息
- 價格：辣雞湯 2-3人份 （닭도리탕）2~3인 ₩24,000
- 小Tips：由弘大入口站3號出口行4分鐘左右
5. 今日和你（오늘그대와）
只係睇餐廳名，係咪已經覺得好浪漫呢？呢間主要係食西式料理，如果同另一半嚟韓國，想食一餐溫馨又浪漫嘅晚餐，小編推薦可以嚟呢間「今日和你」。
餐廳每一個位都有唔同感覺，而且好好影，鍾意簡約風同浪漫路線嘅你，更加唔可以錯過。
食物方面唔單止好影而且仲要好好味，當中小編特別推薦大家一定要食蘑菇忌廉意粉，除咗多蘑菇，同上面嘅薯仔一齊食，識落嘅嗰種口感真係好幸福！
今日和你（오늘그대와）
- 地址：서울 마포구 동교로 262-13
- 營業時間：11:30 - 21:30
- 價格：白汁菇意粉（버섯크림파스타）₩18,000，、白汁菠菜燴飯（시금치크림리조또）₩17,000、牛排番茄肉醬意粉（라구파스타）₩22,000
- 小Tips：由弘大入口站3號出口行9分鐘左右
6. Banh Mi Phuong（반미프엉）
呢幾年韓國越嚟越多越南餐廳，想喺延南洞瞬間好似去咗越南咁？可以嚟叫呢間Banh Mi Phuong！只要喺人經過都會忍唔住要停喺度打卡！
呢度價錢一啲都唔貴，可以喺咁有feel嘅餐廳到打卡真係超值！
小編叫嘅係所有麵包（모듬반미）＋ 牛肉湯麵包（반미솟방），所有麵包即係有齊所有配料，當中會有叉燒、蛋、蕃茄、越南火腿，再加其他醬汁等，因為用料多而且新鮮，食一個都好有飽肚感，而牛肉湯麵包係將麵包點湯落一齊食，湯夠濃郁，加埋芫荽一齊食，呢個重口味組合，冇得輸！
Banh Mi Phuong（반미프엉）
- 地址：서울 마포구 성미산로29길 20
- 營業時間：每日 11:00 - 21:00
- 價格：所有麵包（모듬반미）₩9,000、牛肉湯麵包（반미솟방）₩11,000
- 小Tips：由弘大入口站3號出口行12分鐘左右
7. 柿子樹司機餐廳（감나무집기사식당）
巴士總站附近總係會有可以俾司機快啲食完又方便停車嘅餐廳。呢啲通常會叫做司機食堂，而通常呢啲餐廳麵係平得嚟又好食，的士、巴士司機大叔每日都去同一間餐廳咁濟...因為如果餐廳味道唔好，好容易就執笠。
弘大延南洞呢度都有一間司機食堂，原本一開始只係得繞行麻浦一帶嘅司機大叔們會去幫襯，但自從韓綜《無限挑戰》喺度取景之後，變得超出名！Menu多選擇，大部分係家常配菜同烤製料理，以一人一份為主。
料理就同喺屋企會食到嘅菜色一樣咁溫馨。雖然要等一段時間先可以入座，但食落肚之後，大家就明白到呢間延南洞美食係點樣「征服」一眾嘴挑嘅司機大叔們！
柿子樹司機餐廳（감나무집기사식당）
- 地址：서울 마포구 연남로 25
- 營業時間：24小時
- 價格：炒豬肉（돼지불백）₩10,000、辣炒魷魚（오징어볶음）₩11,000
- 小Tips：由弘大入口站3號出口行8分鐘左右
8. 香港大排檔（홍콩대패당）
如果只係短暫嚟韓國，可能都會想盡量使當地出名嘅美食，不過如果大家係會留耐啲，相信一定會好掛住香港嘅茶餐廳味！
香港大排檔色香味俱全，味道同香港平時食開嘅大排檔味道幾乎係一樣，嚟呢度好有家鄉嘅感覺。唔單止係留學生至愛，每次去都有唔少韓國人喺嗰度打卡，大家都係有讚冇彈！
只要我哋會員，之後去到下載優惠券，埋單嘅時候即享九折優惠（只限平日）！
香港大排檔（홍콩대패당）
- 地址：서울특별시 마포구 양화로23길 10-8, 2층(동교동)
- 營業時間：星期二至六11:00 - 21:00 （Break Time 15:00 - 17:00） 、星期日15:00 - 21:00 、逢星期一休息
- 價格：鮮茄焗豬扒飯 （돼지고기토마토그라탕）₩16,000、薑蔥霸王雞 半隻（홍콩식닭찜 반마리 ）₩19,000、招牌西多士（프렌치 토스트）₩5,500、紅豆冰（팥빙수 음료）₩6,800、凍檸茶（아이스 레몬티）₩4,800
- 小Tips：由弘大入口站3號出口行8分鐘左右
以上係小編真心推薦喺弘大延南洞行完街，可以去吓嘅餐廳，有特色得嚟又唔會太貴。大家喺弘大瘋狂shopping之後，可以嚟延南洞醫肚，回一回氣，再買過！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
