港韓超市比較
韓國VS香港超市比較，韓國唔俾租走購物車原來一架要$XXX？兩者比較大家又覺得邊個方便啲？
Hello，大家好，我哋係由韓國人每日提供最新韓國旅行資訊嘅Creatrip。
唔知大家平時嚟韓國又鍾唔鍾意行超市呢？如果鍾意，大家又覺得同香港超市又有咩唔同呢？今日小編就諗咗幾點嘅唔同，當中有好有壞，唔知大家又有冇同感呢？
韓國VS香港超市比較
1. 韓國有「千元幸福區」
인사이트
如果問到小編最鍾意韓國超市邊一點，小編一定會答大家係「千元幸福區」。因為當冇錢或糧尾嘅時候，「千元幸福區」相信係唔少人嘅恩公！唔單止係因為可以用到1000won（大約HKD 7）就可以買到各式各樣小食同飲品，有時生活用品都可以喺度買得到，而且每次去都會有發現新驚喜！加上好多時「千元幸福區」會擺喺店入口附近，呢一點完全係可以吸引超多人！小編覺得如果之後香港都有咁就好啦～
2. 韓國有免費紙皮箱俾大家包裝
시사주간
雖然香港都有免費紙皮箱可以拎，不過就一定要問職員，好少可以直接拎走。不過喺韓國就唔需要問都可以直接拎，而且好多超市仲會提供免費膠紙等大家包好再拎走。
3. 韓國大部份地方都有自助付款機，香港仲未普及。
매일경제
而家韓國有好多超市都有自助付款機，大家可以唔洗等人手都可以好快俾到錢。基本上每部機都有韓文/英文語言，而且仲可以俾現金，超方便。香港朋友同小編講而家有啲地方都有提供自助付款機，但大家又覺得自助方便定人手方便啲呢？
4. 韓國冇得租購物車走？
相信大家都知有時買得太多嘢，又唔夠環保袋同人手，最好嘅方法係直接租車走。喺香港只要俾HKD100就可以租，但喺韓國係冇㗎！因為韓國一架手推車係要18萬won（約HKD 1241.3），每年至少仲會唔見100架...
小編都有問韓國同事可唔可以俾多啲訂金去租，佢都話大家平時租車嘅100won其實已經係訂金唔會再收多（而家好多地方都唔需要再俾100won）。
5. 韓國生菜同生果都好貴
韓國好多時都係肉多少菜，嚟旅行嗰陣又會想買生果食。不過韓國嘅生果真係好貴....雖然而家香港物價都升咗好多，但同韓國比真係都仲有啲距離。
6. 外國比較少進口食品？
신아일보
呢個係香港朋友同小編講嘅，可能因為小編住得耐都唔太留意。不過諗深一層又好似真係，喺香港嘅超市隨時都可以買到唔同國家嘅零食，但喺韓國好似又真係比較少見，好多時都係國產多。
7. 韓國超市分類做得好同夠大？
국민일보
韓國地方大，相對超市亦都會比香港大好多。不過韓國分類有一點做得比較好嘅係多數食物會係同一層、生活用品係另一層。所有產品都擺得整齊同有規劃，令人可以一目了然就睇得哂。
小編今次整理咗以上7點，唔知大家又有冇同感，又或者覺得仲有咩唔同，都歡迎大家可以留言話畀小編聽，大家可以一齊再討論：）
如果有更多想知嘅內容，都可以隨時留言或者dm話俾我哋知：）
Instagram：creatrip.hk
