韓國可愛訂製蛋糕鋪頭推薦
世上獨一無二嘅韓國可愛手工蛋糕,喺生日同紀念日嘅時候整返個啦!
每逢重要節日或者生日同紀念日,相信唔少人都會買返個蛋糕慶祝!而韓國就好興買一個特別訂造嘅蛋糕送俾當日嘅主角,夠曬獨一無二,又可以影相打卡啊嘛!不過大部分訂製蛋糕都需要有韓國電話號碼或者KakaoTalk先可以訂到,對遊客嚟講都幾唔方便... 今日小編就整理咗幾間最近韓國好hit嘅可愛訂製蛋糕鋪頭,當中有幾間都可以透過我哋預約!
韓國可愛訂製蛋糕鋪頭推薦
1. Cafe Highwaist(카페 하이웨스트)
- 地址:서울 종로구 돈화문로11다길 18
- 營業時間:星期一至五 09:00 - 22:00、星期六及日 11:00 - 22:00
슈취타 EP7
TWICE Jihyo Instagram
BLACKPINK Jisoo、SNSD Yuri、宋慧喬 Instagram
到底係邊間蛋糕鋪咁受韓星歡迎,成日喺佢哋嘅Instagram度出現?冇錯,就係以懷舊動物蛋糕聞名嘅「Cafe Highwaist」啦!
INSTAGRAM @cafe_highwaist
INSTAGRAM @cafe_highwaist
款款都夠趣緻,而且大家仲可以喺咁cute嘅蛋糕上面加字,度身訂造返個俾朋友/自己啦!
2. Ours Coffee(제주 우스커피)
- 地址:제주 제주시 대원길 49
- 營業時間:星期一、四、五 10:30 - 21:00 / 星期二及三 10:30 - 18:00 / 星期六及日 10:00 - 19:00
- 可預約時間:星期一、四、五 11:00 - 20:30 / 星期二及三 11:00 - 17:30 / 星期六及日 10:30 - 18:30
- Creatrip獨家優惠:訂完蛋糕去Cafe自取,即可免費影一張人生四格(價值₩6,000、送完即止)
「Ours Coffee」係一間位於濟州島嘅Cafe,最出名嘅就係佢哋嘅訂製蛋糕啦!雖然呢度同濟州機場唔算近,不過老闆話都仲係有好多外國遊客會專程嚟買蛋糕!
無論係生日、紀念日,甚至係同一班鍾意同一個K-pop Idol嘅朋友一齊去玩嘅時候都可以訂返個可以自訂句子嘅蛋糕,「Ours Coffee」會根據季節同你想慶祝嘅日期幫你裝飾得超cute!
其實除咗可以訂蛋糕,「Ours Coffee」亦都係一間出名飲咖啡食甜品嘅Cafe!黃豆粉艾草蛋糕、蛋撻、牛油曲奇、南瓜磅蛋糕等等都係呢度嘅招牌,唔單止靚仲夠好食!另外而家只要透過我哋訂蛋糕,去拎蛋糕當日就可以免費影一張人生四格(價值₩6,000、送完即止)!
3. HAPPY BEAR DAY(해피베어데이)
- 合井店地址:서울 마포구 양화로12길 16-6
- 營業時間:10:00 - 21:50
「HAPPY BEAR DAY」就喺弘大附近,每款蛋糕上面都有超cute又圓碌碌嘅動物!
小編上次都訂咗個藍莓Cream Cheese味蛋糕,上面有兔仔同熊仔公仔,而且呢度連蛋糕紙盒都好靚!
呢度唔似一般蛋糕訂製鋪咁只可以外賣,「HAPPY BEAR DAY」仲有堂食位,亦都有嘢飲賣,可以直接同朋友喺度慶祝埋!
只要事先預約,就可以喺蛋糕上面加埋字!蛋糕細細個,啱曬同兩三個朋友一齊慶祝嘅時候用~
INSTAGRAM @happybearday.cake
「HAPPY BEAR DAY」有幾款固定蛋糕款,大家訂蛋糕嘅時候就唔洗擔心唔知整咩design好啦!首先有上面呢款兔仔忌廉蛋糕,係唔係好得意啊!
INSTAGRAM @happybearday.cake
另外亦都有呢款雞仔Oreo蛋糕!每款蛋糕側面嘅design都唔同,大家可以根據喜好揀。
INSTAGRAM @happybearday.cake
跟住呢款就係伯爵茶蛋糕,上面有一隻戴住生日帽嘅熊仔,用嚟做生日蛋糕最fit!
INSTAGRAM @happybearday.cake
最後仲有呢款上面有兔仔同狗仔嘅紅絲絨蛋糕,頭先介紹嘅所有款式都可以透過我哋預約!
4. CHERRY OO CHERRY(체리오오체리)
- 地址:서울 송파구 백제고분로15길 42
- 營業時間:13:00 - 18:30(逢星期二、三休息)
位於蠶室嘅「CHERRY OO CHERRY」都係其中一間超受韓國後生仔女歡迎嘅蛋糕訂製鋪!
唔似一般蛋糕係圓形或者方形,呢度嘅招牌蛋糕係真係兔仔形狀,大家都可以自訂句子,寫喺蛋糕底板上面,夠曬特別。而呢隻白雪雪勁cute嘅兔仔其實係一個朱古力蛋糕!
連蛋糕盒同寫住注意事項嘅卡片都係粉紅色,少女心爆棚~
「CHERRY OO CHERRY」亦都有呢啲細細個嘅蛋糕仔,全部都好cute!
呢度亦都有唔需要訂嘅蛋糕賣,不過每日款式都會變,大家去之前可以先去佢哋嘅Instagram(撳我)睇睇。
INSTAGRAM @cherry.oo.cherry
小編當時就俾呢隻攞住條香蕉嘅熊啤啤吸引到,佢係一個海鹽焦糖+香蕉味嘅忌廉蛋糕,唔單止睇得,味道都唔錯!想喺度訂返個蛋糕嘅話,不妨可以搵我哋幫手!
5. odd(오디디)
- 地址:서울 마포구 월드컵로 10길 17
- 營業時間:星期二至六 12:00 - 21:00、星期日 12:00 - 20:00(逢星期一休息)
INSTAGRAM @odd.cake
望遠出名多靚靚Cafe,而當中「odd」除咗有賣普通蛋糕,亦都接受訂製蛋糕預約,全部款式都夠靚夠cute!
INSTAGRAM @odd.cake
大家可以透過佢哋嘅KakaoTalk訂蛋糕,不過要注意1號同2號size嘅蛋糕要最少提早2日訂!
INSTAGRAM @odd.cake
另外現場亦都有6款迷你size嘅蛋糕可以即日買,小編覺得6個character都好cuteXD
INSTAGRAM @odd.cake
呢度嘅蛋糕design定期會轉,所以去/訂之前記住要check check佢哋嘅Instagram(撳我)啦!
6. Koike(코이크)
- 地址:서울 마포구 동교로39길 8
- 營業時間:12:00 - 22:00
INSTAGRAM @koike.official
同頭先介紹嗰幾間cute cute蛋糕鋪唔同,「Koike」嘅蛋糕design偏夢幻風,有一種水彩畫嘅感覺!不過想訂蛋糕同樣都係要透過佢哋嘅KakaoTalk,亦都需要事先俾定錢。
INSTAGRAM @koike.official
每朵花都畫得好仔細,真係會唔捨得食!
INSTAGRAM @koike.official
亦都可以俾張你鍾意嘅相佢哋,訂造呢種好似一副畫咁嘅蛋糕,重現珍貴回憶。
除咗訂製蛋糕,鋪頭每日都會準備幾個基本款式蛋糕,如果突然需要買蛋糕,大家都可以去買(想即日買都需要事先透過KakaoTalk預約)!
以上就係最近最受韓國人歡迎嘅6間訂製蛋糕鋪頭,喺特別嘅日子訂返個同朋友、家人、另一半慶祝啦!
如果有更多想知嘅內容,都可以隨時留言或者dm話俾我哋知:)
Instagram:creatrip.hk
Mail:help@creatrip.com