Hello，大家好，我哋係由韓國人每日提供最新韓國旅行資訊嘅Creatrip。

喺明洞行完街好攰想搵餐好食？就等吃貨小編為大家介紹呢間「安東嫩雞 」啦！只要一到Lunch time，就會有好多韓國上班族去食。唔單止汁香辣得嚟夠惹味！雞肉更係超嫩滑，配飯一齊食簡直係絕配，就算食多幾碗飯都唔會有罪惡感！小編今日就去咗本店探訪，有興趣嘅朋友就要繼續睇落去啦！

明洞「安東燉雞」介紹

• 地址：서울 중구 명동10길 3
• 營業時間：11:30 - 22:00

小編去嘅係本店，有3層樓高，特登避開Lunch time時間，11點半左右就去到，嗰陣客人仲未算多。

1樓

因為有3層樓高，所以其實都好多位，大家唔使擔心冇位坐。1樓同2樓都冇太大分別，唯一比較唔同嘅3樓係坐地式，入去坐之前要先除鞋，可能會比較唔方便: (。

Menu有寫上中文、英文、日文，大家唔洗驚會叫錯。小編去嘅時候咁啱開始有Lunch Set (11:30 - 17:00；週末及公眾假期除外) 。因為小編係3個人去，所以就點咗一隻中燉雞同兩碗白飯。

大約等咗5-10分鐘左右，燉雞就出現啦！一送到上嚟就聞到超香！而且份量超多，包保一定食到好飽。

大家見唔見到有幾多辣椒⋯⋯如果唔太食得辣嘅朋友，喺點餐前記得要同店員講。

或者大家覺得小辣都太辣嘅話，可以好似韓國人咁，邊食燉雞，邊飲蘿蔔泡菜湯。蘿蔔泡菜湯酸酸哋，唔單止可以解辣，同時可以令大家開胃。

呢度嘅雞肉真係好嫩滑，就連雞胸肉都係，一啲都唔會乾！冬粉亦都係好煙韌，配埋白飯一齊食簡直係冇得輸！

另外，小編之前去食都試過點海鮮燉雞，相對嚟講海鮮量會比較多，燉雞就比較少。所以如果鍾意食海鮮多嘅話，可以點海鮮燉雞。

如果大家都食得辣嘅話，小編真心推薦大家去食安東燉雞。 希望大家會鍾意小編呢次嘅分享啦！

如果有更多想知嘅內容，都可以隨時dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購