logo

深入了解韓國文化

正所謂「入鄉隨俗」,嚟韓國旅行時應該要注意嘅韓國文化!千祈唔好做錯事失禮哂!

Namdong Park.
2 years ago

Hello,大家好,我哋係由韓國人每日提供最新韓國旅行資訊嘅Creatrip


韓國雖然唔係一個封閉國家,不過就有唔少獨特文化,相信大家嚟韓國旅行嘅時候,一定遇過某啲事會不知所措,但當呢啲事發生又搵唔到人問,係唔係會覺得好無助呢?為咗可以幫到大家解決煩惱,小編寫咗一篇詳細韓國文化介紹,雖然未必會完全解答到大家所有問題,不過都會盡力去解答,你哋又準備好未?

 


1. 韓國餐廳文化

Q1. 喺韓國餐廳係點落單?

韓國餐廳文化


唔知大家會唔會同小編一樣,去其他國家旅行嘅時候,叫職員過嚟落單,會覺得係一件令人超緊張嘅事?畢竟好多遊客可能都唔識韓文,會驚講咗都冇人聽得明。不過喺韓國就唔需要大叫,因為每一張枱嘅上面或者櫃桶隔離都有一個服務鐘,撳完佢職員就會好快嚟到。


韓國文化 餐廳文化


但提前都想同大家講吓,有兩種地方未必會有呢啲服務鐘,第一個就係高級餐廳,為咗俾最好嘅Service,就算有時唔舉高隻手,只要同職員對眼,職員都好快會行過去幫大家。


韓國文化

다이내믹부산


第二個就係比較老舊餐廳或者市場,通常好多隱藏美食都會喺呢度搵到,因為生意好,而且人多會比較嘈,職員可能比較冇辦法一一照顧到全部客人,呢個時候只要舉手大叫「사장님」(老闆),就會有人過去幫大家。因為比起叫「아줌마」(大媽),「사장님」(老闆)聽落去心情都會比較好!

韓國餐廳職員都識睇眉頭眼額,只要一邊指住餐單,一邊比數字,職員都會知道!大部分韓國人都聽得明簡單英文,所以只要識少少英文+Body Language表達就唔使擔心!


Q2. 搵到唔到筷子同匙羹?

韓國文化 韓國餐廳文化

국민일보


如果大家見唔到啲餐具放咗喺枱,大家只要打開枱側邊嘅櫃桶,就會見到有筷子同匙羹,如果真係搵唔到,都可以睇吓身邊嘅人點做或者直接問老闆。


Q3. 如果只係一個人,有時可能要叫2人份先得?

韓國文化 2人份


韓國雖然好多餐廳隨便入去都會覺得好味,不過好可惜有啲地方,通常食燒肉、部隊鍋等要用到大鍋,就算只係一個人去,都要叫兩人份以上,呢個情況下,可以問吓舖頭有冇啲只係提供一人份嘅Menu,如果叫咗兩人份食唔晒,都可以將佢打包拎走,之後返到酒店肚餓再食。


Q4. 唔熟嘅食物上到枱可以點做?

韓國餐廳文化


韓國好多料理都係會現場炒、烤或煮,所以好多時候職員都只會送上材料,剩低嘅步驟就需要由客人自己煮!如果第一次遇到呢啲情況,可能會唔知點做好,不過大家又唔需要太擔心,只要同職員講聲,佢哋都會好親切咁教同幫大家。


Q5. 韓國餐廳需唔需要俾Tips?

韓國餐廳需唔需要俾Tips?


有啲人可能會諗「到底去韓國餐廳食飯或者去韓國酒店住嘅時候,到底需唔需要俾Tips呢」?答案係「唔洗!」

因為韓國好多貨品都會包稅,所以就連韓國人都認為服務費本身就已經包喺裡面,不過如果大家覺得職員服務得好,出於本人心意想俾都係無妨。



2. 韓國咖啡廳文化

Q1. 係唔係一定1人要叫1份?

韓國咖啡廳文化


韓國大部份Cafe都會規定每人要叫一杯飲品,因為佢哋認為飲品包括座位價,就算兩個人去,可能只係想叫一杯飲品或者一個甜品,唔同舖頭都有唔同規則,呢個時候就要跟住職員指示去做。當然如果係外賣,絕對就唔會有呢一個限制,不過小編相信難得去到,應該都會叫多唔會叫少。  


Q2. Cafe有冇限時?

韓國咖啡廳文化 限時


雖然韓國大部份都冇時間限制,但如果係一啲比較受歡迎,或者小型Cafe等就會有指定規則,通常最多可以留2-3個鐘。不過如果大家想再留耐啲,可以叫多杯飲品,順便問吓老闆可唔可以坐耐少少。



3. 韓國交通文化

Q1. 韓國交通好複雜,唔知點樣先可以去到目的地?

韓國交通文化


相信嚟過韓國嘅朋友,都會知韓國大眾交通系統非常完善,不過亦代表路線好複雜,好多時候會唔知到底搭邊條地鐵線或邊班車好,但慶幸嘅係韓國Wi-Fi同上網都普及同快,只要用手機查就可以知。



韓國地圖apps

네이버지도, 카카오맵, 구글맵


雖然大家可能會比較熟悉用Google Map,但喺韓國主要係用Naver Map同Kakao Map,呢兩個Apps都會教大家點樣可以用最短時間去到,甚至幾時有車都會有提示!呢兩個Apps都可以設置英文,當中Naver Map更加可以轉中文或者日文,用法簡單,推薦大家嚟到可以試吓!


Q2. 企到腳痛,但係巴士大部分只淨返博愛座或孕婦禮讓座?

韓國巴士座位

경북매일


搭過韓國巴士,眼利嘅朋友可能會發現座位顏色會唔同,通常巴士中間位,見到有黃色套即係代表博愛座,粉紅色係代表孕婦專用座位,但係如果冇人坐,一定要繼續企喺度等?其實空嘅座位係可以坐,只係如果見到老人家上車,最好都係讓一讓會好啲。


韓國交通文化 地鐵

인사이트


地鐵通常x-1或x-4車卡都有博愛座,不過同巴士唔一樣,通常喺地鐵,就算見到好多人,佢哋都會寧願企而唔會坐。


Q3. 點解搭巴士落車時要啪卡?

韓國搭巴士落車時要啪卡?


如果上車嘅時候係俾現金,就咁落車係冇問題,但如果係用Tmoney,上車同落車其實都要啪一次,因為韓國有轉乘優惠,但如果唔記得咗,大家都唔需要太擔心,最多可能只係俾多₩700附加費,下次搭車嘅時候會自動扣。


Q4. 喺交通工具上可唔可以食嘢?

韓國巴士飲食


喺韓國搭車,司機會為咗安全同埋防止有異味,通常都唔會俾乘客帶食物上車,除非係包到好實,好似樽裝水,盒裝Pizza等,但如果係咖啡或者年糕,只要手拎住,司機見到都唔會俾上車,如果喺車上食嘢,司機都有可能會叫大家落車。


Q5. 落咗車之後,發現漏咗嘢點算好?


首先大家第一件事唔好驚,先記低巴士/的士號碼,之後去附近嘅旅遊中心或者警察局尋求幫助,如果喺地鐵唔見,可以記低搭咗邊一條線,喺邊一個車卡落車,之後再請職員幫手。雖然可能要等一段時間,不過只要記低以上步驟,都好大機會會搵得返。

 

Q6. 附近搵唔到的士點算好?

韓國kakao taxi

카카오택시


有時好急需要搭的士,但附近一㗎都搵唔到?可以用Kakao Taxi App,喺個app入面揀你想由邊度去到邊,之後就有的士嚟到,內置韓文、英文同日文版本,之後嚟到大家可以試吓。



4. 韓國衛生文化
Q1. 行行吓覺得好急想搵廁所可以點做?

喺韓國街上好難搵到公共廁所,但如果突然好急,可以點做呢?

韓國衛生文化

 철도경제신문


第一個方法就係搵附近嘅地鐵站,因為基本上每個地鐵站都會有廁所,但有啲可能要入咗閘先去到。 


韓國衛生文化

(좌): AI타임즈


第二種方法就係去Cafe或者便利店,買杯平平哋咖啡,之後先再去廁所。

最後係可以去附近一啲大型建築,或者圖書館等地方,通常都係可以免費就去到,但有個唔好係比較難搵到。


Q2.  搭緊車突然想急點算好?

如果係搭地鐵或者巴士,可以等喺下一個站落車,去附近嘅商場或者公共廁所。

韓國衛生文化


KTX、新村號等火車係每一個車廂都有廁所,基本上唔洗等好耐就去到。

韓國衛生文化

 내손안의서울


最尷尬嘅係搭長途巴士嘅時候,距離休息站仲有啲距離,忍唔到又可以點算呢?只要同司機講聲,司機都會先停喺路邊比你可以落車解決,大家都唔需要太擔心,千祈唔好怕羞唔敢講,忍太耐會對身體唔好。



5. 韓國購物文化

Q1. 可唔可以試完先再買?

韓國購物文化마다메이드


基本上會因應舖頭嘅大細,可能都會有啲差異,好似地鐵站入面嘅賣衫鋪,好多時都未必會有,但其他地方,如果有更衣室,都可以用佢哋入面提供嘅Face Cover,主要係防止化妝品會掂到件衫,如果試完覺得唔啱,都唔一定要買,可以慢慢考慮。


Q2. 買完化妝品但收到其他sample?

韓國購物文化


基本上喺韓國買完化妝品,佢哋都會送一啲sample俾大家,希望可以試吓佢哋其他產品,有時收到都幾有幫助,不過有時未必會寫有效日期,最後收到之後快啲用。


Q3. 想拎優惠可以點做?

韓國購物文化


當然買嘢最開心就係有優惠!不過小編教大家嘅以下方法係唔適用於百貨店或者免稅店!

第一,通常買得越多,都可以同試吓老闆講吓價,話唔定可以用合理嘅價錢買到。

第二,比起碌卡用現金會比較抵!因為老闆唔需要另外交稅,也是最多可以有9折添!

不過以上方法都唔係每一個地方都有,最好都係唔好期望太大。  

 


6. 韓國人同外國人
Q1. 如果完全唔識韓文點算好?

韓國旅行 韓國文化


去韓國旅行,完全唔識聽同講韓文點算好?無可厚非第一次一定會覺得好緊張。大部分韓國人都會識講簡單英文,只要大家勇敢少少,佢哋都會好盡力幫助大家。


Q2. 韓國人點諗外國人?

韓國旅行 韓國文化 韓國自由行 라디오스타


以前韓國可能仲未太開放,不過而家越嚟越多國際婚姻,多留學生嚟韓國讀書,佢哋都好接受大家,有遇到任何困難嘅話,可以請求佢哋幫手,佢哋都會好樂意。

 


7. 其他韓國生活文化
Q1. 韓國人好鍾意飲酒

韓國旅行 韓國文化 韓國酒文化


喺韓國讀大學或返工嘅朋友,一定都有見過韓國人飲酒飲到好誇張嘅場面,每到呢種場合,有好多韓國人都會盡量避開唔飲。例如,可以見到有啲人偷偷哋將酒倒喺地下,要飲杯只飲一半或用水裝滿自己杯子等。不過最好方法就係同對方講自己係唔飲酒。如果飲酒係為咗要迎合當下氣氛,咁最後辛苦嘅都只有自己,只要明確表示自己唔飲,相信其他人都唔會繼續強迫。


Q2. 垃圾係點揼?

韓國垃圾分類


韓國唔似香港咁多垃圾桶,有時真係會唔知點做,通常如果有垃圾,可以去到附近地鐵站嘅垃圾桶,或者Cafe同餐廳地方揼,但如果揼錯,可能就會被罰款。


Q3. 韓國治安到底好唔好?

韓國治安到底好唔好

경찰청


韓國治安係全世界數一數二安全,即使唔記得拎嘢,返去搵都仲會搵得到,根本冇人會拎走。唔單止每個地方都有裝CCTV,路上或大樓裡面都可以見到警察局或管理室,真係遇到問題時都唔使驚冇地方可以求助。 

韓國警察局號碼係112、消防局號碼係119。遇到緊急情況時,記得打呢兩個號碼求助。警察同消防人員基本上都會識講英文,遇到事需要去警局請求協助時,記得先講自己國籍同事由,受到警察不當對待亦可以進行救濟,只要將情況一一記底,之後再請律師或大使館處理就可以。


韓國治安

위키피디아


大家都知道韓國係越夜越靚,見到咁多韓國人玩到咁夜都唔驚,就知道韓國好安全,大家亦都唔需要太過擔心。 


以上係深入了解韓國文化FAQ ,希望呢篇文章可以幫到大家啦!有任何問題,歡迎大家可以留言話俾我哋知。




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

熱門文章