Hello，大家好，我哋係由韓國人每日提供最新韓國旅行資訊嘅Creatrip。

相信大家都知道韓國有好多地下街，而每一條地下街嘅配套都好完善，仲有好多鋪頭可以行，就好似一個小型購物中心咁！今日要嚟介紹首爾最出名嘅6條地下街，大家可以考慮plan埋落行程！

Plan住喺韓國大買特買？🤩

首爾地下街總整理

江南地下街

• 位置：首爾地鐵2號線江南站（강남역）

江南地下街位於2號線江南站，緊鄰江南商業中心，亦都係同新盆唐線交匯嘅地方，所以呢度自然成為咗好多人潮經過嘅地方。而呢度亦都有好多鋪頭，大部分都係賣女性服飾同手機飾品，有部份韓國美妝品牌都有喺度開分店。

江南站周邊物價高，但係江南地下街就完全係另一個世界XD 大家可以喺度用相對比較平嘅價錢盡情掃貨！

高速巴士地下街

• 位置：首爾地鐵3號、7號、9號線高速巴士站（고속버스터미널역）

首爾市區最大規模嘅地下街就係「高速巴士地下街」啦！佢位於3條地鐵線交匯、同時連接埋長途巴士站嘅地方，交通方便之餘真係好多嘢行（要行曬成個area都幾難吓XD）

呢度由一般潮流服飾到具有知名度嘅品牌全部都有，不過因為有好多鋪頭，有時候可能會搵到差唔多嘅商品，大家落手之前記住要好好格吓價！

永登浦地下街

• 位置：首爾地鐵1號線永登浦站（영등포역）

位於1號線嘅永登浦地下街佔地面積大，附近仲有新世界百貨公司、Time Square同emart，大家可以由地面行到地下！永登浦地下街主要分做兩個區域，一個比較近百貨公司，另一邊就以地下街小商鋪為主，但係一樣咁好行~

而頭先都有講到呢度附近仲有其他商圈，優點係只要行上地面就可以搵到餐廳（唔似高速巴士地下街咁難搵）！

蠶室地下街

• 位置：首爾地鐵2號、8號線蠶室站（잠실역）

蠶室地下街嘅感覺同江南地下街有少少似，同樣係位於地鐵站建築物之下，雖然唔大，不過正所謂麻雀雖小五臟俱全，無論係時裝定化妝品都一應俱全。

如果本身有plan住去蠶室樂天塔或者樂天世界，大家可以順便嚟行吓！不過如果大家想買比較高級嘅brand嘅話，小編建議大家可以直接去樂天免稅店行！

鐘閣地下街

• 位置：首爾地鐵1號線鐘閣站（종각역）

鐘閣地下街算係大家比較少去嘅地下商場，因為範圍唔大，10分鐘左右就可以行完XD 呢度鋪頭大部分都係化妝品同時裝，因為唔大，所以好啱喺附近返工嘅打工仔嚟行。

鐘閣地下街距離乙支路、清溪川同光化門、景福宮好近，如果咁啱會去呢幾個景點嘅話都可以順便嚟行吓，但就真係唔需要專登嚟啦。

富平地下街

• 位置：首爾地鐵1號線、京仁線富平站（부평역） 

雖然首爾地下街都好好行，不過其實仁川呢條富平地下街係小編心目中最好行好買嘅地下街！雖然唔喺首爾，但係搭1號線就可以去到，交通非常方便。呢度分成幾條街，大家可以行成個下晝！

男女服飾、鞋、手袋等等全部都有，如果大家已經行過上面介紹嘅地下街，不妨可以抽時間嚟富平地下街shopping !

小貼士💡

大家行地下街嘅時候記住要準備足夠現金，買之前亦都要檢查清楚有冇問題，最重要嘅係要格價啊！

如果有更多想知嘅內容，都可以隨時dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購

Mail：help@creatrip.com