梨大「孔陵一隻雞」介紹
除咗陳玉華一隻雞之外，仲有令人一直念念不忘嘅孔陵一隻雞！大家又掛唔掛住呢？
Hello，大家好，我哋係由韓國人每日提供最新韓國旅行資訊嘅Creatrip。
位於梨花女子大學附近嘅shopping街好多人都識，唔少遊客都會嚟梨大掃貨，其實唔單只多嘢買，仲有好多美食店。今日就為大家介紹一間叫「孔陵一隻雞」嘅餐廳啦！
梨大「孔陵一隻雞」介紹
孔陵一隻雞（공릉닭한마리）
地址：서울 서대문구 연세로2길 77
營業時間：11:00 - 23:00
梨大孔陵一隻雞係專門食雞嘅地方（唔係打機個食雞啊！）。「一隻雞」係用濃郁嘅湯底，放入一隻雞，同埋一啲蔬菜咁一齊熬嘅一道菜。食完又飽又暖胃，又有營養，所以好受歡迎，連外國嘅遊客都會成日嚟。
孔陵一隻雞喺好多區都有分店。梨大店就有2層，空間超大，非常適合組團嘅遊客去。
呢度用嘅雞唔係冰鮮雞，而係用活雞，所以肉質更加嫩滑、有彈性。
喺早幾年前一隻雞只係₩19,000，但最近都加咗價，小編整理咗俾大家參考。通常2至3人食一隻雞，再加其他配料，四人以上就可以考慮食兩隻雞。
孔陵一隻雞菜單 2021.11.01更新 | |
| 一隻雞 닭한마리 | ₩22,000 |
| 刀削麵 칼국수사리 | ₩2,000 |
| 薯仔 감자사리 | ₩1,000 |
| 年糕 떡사리 | |
| 白飯 공기밥 | |
除咗雞之外，另外仲可以加一啲配料落個煲度，例如年糕、薯仔、刀削麵等等，可以按自己個人喜好咁加，食得更加過癮！
伴菜就有泡菜、辣椒、椰菜、同醬料。食之前，將個醬倒落椰菜、韭菜再撈勻，等雞肉熟咗之後點嚟食就得啦！一隻雞係個主菜，其實都唔太需要伴菜，因為本身隻雞肉已經好入味！
一隻雞同蔘雞湯有啲似，但食落一啲都唔似！蔘雞湯有糯米一齊熬，所以個渴會傑啲；而一隻雞嘅湯會清啲。食完啲雞，落個刀削面，或者加飯落個煲度煮成粥，吸收晒雞嘅精華，會係另一番滋味！
經過濃郁湯底熬成嘅一隻雞，個湯真係好濃，好好味！職員仲會幫手剪好啲雞肉，食起上嚟更加方便！如果鍾意濃味啲嘅朋友，可以試吓加埋個水泡菜同蒜入去煮！
推薦大家食一隻雞嘅時候，加落其他配料，除咗雞，其他配料都會入晒味，可以試到唔同口感！
酸酸辣辣嘅醬好開胃，本身淡淡哋嘅雞肉，連埋撈咗醬嘅椰菜一齊食，味道更多層次！
食到咁上下，就可以落刀削麵，或者白飯去煮。再加隻蛋同紫菜落剩低嘅湯度，攪勻去就煮成粥啦！吸收晒雞湯嘅精華，無論刀削麵又好，粥又好，都一樣咁正！
好似小編咁加埋泡菜，簡直係絕啊！
睇吓小編食到咁乾淨，就知有幾好味啦！用雞肉、配埋刀削麵、飯等配料，一次過享受到多重味道同口感嘅孔陵一隻雞！咩時候食都咁滿足，咁補身啊！包你食過番尋味！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
