Hello～大家好！我哋係由韓國人話你知韓國旅遊資訊嘅Creatrip!

今天要為大家介紹，嚟韓國必買嘅嘢之一——就係韓星周邊啦！！！

其實有好多人嚟到韓國可能會想順邊嚟追星，睇下有冇機會可以遇到自己鍾意嘅韓國明星～

或者去一啲拍攝場地，韓星去過嘅地方或者韓星開嘅餐廳、Cafe等等

不過其實可以咁啱遇到韓星嘅機率好似唔係咁高XD

咁就要喺韓國買一啲韓星周邊商品過下癮啦～！

其實喺好多地方（尤其係明洞！）都可以見到一啲賣韓星相關商品嘅鋪頭～

不過其實好多都係盜版......ㅠ ㅠ

咁如果想要買正版嘅周邊商品要去邊買呢？就等小編話畀大家聽啦！！

＜睇呢篇文之前，仲可以參考呢啲關於韓國必買嘅文章！＞

【韓國必買】韓國購物必買伴手禮！！來韓國旅遊就帶這些伴手禮回去送人吧～人氣韓國伴手禮TOP10！

【韓國必買:韓國美妝】 2018年韓國必買！韓國化妝品購物天堂，Olive Young 明洞旗艦總店探訪記！(新增江南旗艦店位置)

【韓國必買】韓國品牌！瞬間變成韓妞的秘密！韓國明星都愛的，超夯潮牌TOP5大推薦！

【韓國購物:明洞】韓國旅遊與購物必去的知名景點！到明洞購物去吧！（含地圖，介紹）

韓國必買1. SMTOWN coexartium

韓星周邊 - SM Entertainment

首先要為大家介紹，可以買到韓星周邊嘅地方

就係最識賺錢嘅（？）SM旗下嘅SMTOWN coexartium啦～

見到coexartium呢個字就可以知道呢個地方就喺大名鼎鼎嘅COEX！

<同場加映 - COEX詳細攻略>

【韓國購物】韓國旅遊名勝！購物狂的天堂～超大Shopping Mall COEX探訪記！

由地鐵三成站嘅六號出口出嚟，就可以見到COEX隔離有一整棟嘅大型建築物上面寫住SMTOWN

呢度就係SMTOWN coexartium啦~

搭扶手電梯上去，轉右就到㗎啦！

一樓冇咩嘢睇，直接去二樓啦XD

咁而家我哋就由二樓開始一層一層為大家介紹！

二樓就係主要出售SM家韓星周邊嘅地方～

正式去到韓星周邊嗰一區之前，

可以見到好多種各式各樣奇奇怪怪（？）嘅嘢～

無論係衫、帽定袋，文具等都可以喺呢到見到。

除咗一般嘅韓星周邊商品之外

其實有一啲代言嘅嘢都可以喺呢度見到㗎！

由於種類好多，明星都好多XD

小編實在好難一一影底⋯⋯

總之，基本上只要係SM家嘅團，喺呢個韓國必買嘅SMTOWN coexartium裡面都可以見到。

可以滿足到Fans嘅需求！

SM真係好識做生意，有啲嘢真係諗都諗唔到原來可以用嚟出周邊....

真心佩服！

對粉絲嚟講呢度一定係一個好啱尋寶嘅地方～

另外，喺呢一層嘅收銀櫃台，可以見到一啲SM家嘅韓星簽名！

大家可以喺等買單嘅時候順便影下相，都幾好㗎～

咗接下嚟我哋就去三樓移動啦～～

三樓其實係呢啲韓星一般工作嘅地方嘅縮影，

可以入去體驗下明星平常生活會去嘅錄音室，美容室，練習室等等，不過呢啲都要事先預約同買飛㗎！

如果唔入去嘅話其實喺外面影下相都幾好～

因為喺三樓嘅電梯呢度有一面黐滿咗即影即有嘅牆！！

淨係睇相應該都可以睇好耐～哈哈！

另外呢度仲有一個特色就係相片牆啦～

其實搭扶手電梯上嚟嘅時候都可以見到好多相框，可以找搵下自己鍾意嘅韓星！

將啲相整成黑白真係好好睇好有feel～

除此之外仲放咗啲獎盃同衫出嚟，Fans一定要停底影相啊！

咁接下嚟就去四樓嘅方向移動啦！

四樓主要係Cafe～

一行入嚟呢度可以見到好多韓星專輯嘅黑膠唱片版（？）

不過其實呢啲都係非賣品，只係攞出嚟展出㗎炸～

再行入少少就可以見到又係可以大買特買嘅區域啦.....

呢個區主要係賣SM自己出嘅一啲產品，大部分都係食物類～

糖、餅乾等嘅零食，

上面會印咗呢啲韓星嘅樣～

如果唔係自己追嘅韓星，買嚟送畀朋友嘅話，其實都唔錯㗎～

可以當係喺韓國買嘅小禮物！

或者係韓星代言嘅食物都可以喺呢度見到！

除咗零食之外，仲可以買到手機殼，隨叉等等～

再行入去就可以見到Cafe同一啲枱凳啦～

呢度嘅甜品上面都會有呢啲韓星嘅樣或者LOGO等等

不過小編覺得.....如果唔係追星，呢度嘅甜品真係買唔落手...

價格上有少少貴婦Cafe嘅感覺XD

不過如果只係純粹影下相都可以嘅~

順帶一提~喺呢間Cafe入面嘅凳都會有韓星嘅簽名㗎！

大家可以嚟搵下！

呢個Cafe入面，仲有一啲扭蛋機

聽講呢度嘅扭蛋機好熱門！

成日都畀人扭晒XD一補貨就會有人嚟一掃而空咁～哈哈哈！

所以～如果想扭到嘅話可能就要碰下運氣啦～

仲有～Cafe呢度仲有一個室內退稅機㗎！

如果大家行完街要退稅嘅話可以喺呢度退～

小編真係估唔到呢度都會有退稅機.....

係咪因為Fans每次都會喺呢度大失血，所以要放個退稅機呢？哈哈！

我哋再去樓上睇下啦！

一行上嚟就會見到好多大圖～

呢度嘅照片係可以買㗎～價錢根據大細而定。

大家可以嚟睇下相！基本上SM家嘅藝人嘅相都有齊～

有時仲會更新放啲新嘅相上去～

其實五樓基本上係影廳同互動裝置～

影廳每日都會播唔同嘅影片，要買飛入場嘅。

同一般嘅戲院有啲像XD係有固定嘅場次～

未開始入場之前就會見到好多Fans喺凳上面等。

呢度仲有一個大螢幕播預告片(?) 同埋最近呢幾日嘅場次有咩內容～

只要係SM家藝人嘅影片都有機會播出，好似演唱會、音樂劇等等。

SMTOWN嘅官網上都可以查詢到最近有咩影片會播㗎！

＜影片播放場次睇呢度＞

互動裝置就係可以同鍾意嘅偶像合照，仲可以印出嚟拎番屋企留紀念㗎！

互動裝置嘅體驗係唔需要畀錢嘅，不過如果要印出來嘅話就需要畀費啦～

再行入啲嘅話可以見到一大片嘅手掌XD

呢啲都係SM家藝人嘅手印～呢度仲有一個互動裝置可以測你同呢度偶像嘅合拍度。

不過都係玩下～哈哈！應該係冇咩實際作用～

六樓主要作用同五樓一樣，

而家呢度放咗好多畫，Fans畫嘅偶像都會喺度展出～

睇完覺得有啲Fans真係好有才華ㅠ ㅠ畫得太好！

基本上SMTOWN coexartium嘅介紹就到呢度啦～

不過呢度仲有一個特別資訊要同大家講：

為咗悼念SM家已故藝人 SHINEE主唱鐘鉉，

1/27~4/30期間SMTOWN coexartium嘅六樓最後面有一個空間係開放畀Fans去悼念。

小編去個日真係見到好多Fans都喺牆上黐咗好多紙條去紀念。

如果係SHINEE主唱鐘鉉嘅Fans嘅話，可以嚟呢度，留底大家嘅文字。

韓國必買2. DDP (東大門數位廣場) (DDP (동대문 디지털 플라자)) - Ｄ館 살림터(設計中心)

韓星周邊 - SM Entertainment

喺東大門DDP入面，其實都有賣SM家藝人嘅周邊商品！

當然啦，呢度嘅商品冇啱啱介紹喺COEX嘅SMTOWN咁多，

不過基本好受歡迎嘅產品都有齊！

啱啱喺Cafe入面嘅扭蛋機喺呢度都可以見到～～

仲有衫、帽、袋等嘅周邊小物，

喺呢度都係一應俱全！！

如果嚟到韓國旅行又唔一定會去到三成站嗰度，

咁可以喺東大門呢度睇下有冇想買嘅韓星周邊！

手機殼呢度都有～

而且呢度嘅手機殼可以訂做㗎！

所以每個價錢都唔一樣，可能要問一問店員～

不過可以訂製手機殼，就代表唔洗擔心呢度買唔到自己嘅手機型號啦～

鍾意咩款都可以自己揀！

韓國必買3. DDP (東大門數位廣場) (DDP (동대문 디지털 플라자)) - M館 배움터(文化中心)

韓星周邊 - 各家偶像

東大門DDP文化中心嘅地下2樓可以見到呢間寫住Ktown4u嘅鋪頭

其實佢本身係間Online Shop，後嚟先開咗實體店～

喺呢度可以見到唔同公司唔同偶像團體歌手嘅唱片同周邊～

其實有少少似一般嘅唱片行，

只係喺呢度可以見到一啲其他嘅周邊商品～

所以如果自己鍾意嘅韓星唔係SM家嘅話，可以喺呢度搵下㗎！

雖然產品冇經紀公司自己開嘅專門店咁齊全，

不過都可以滿足下Fans嚟買嘢嘅心～～

<同場加映 - 東大門DDP詳細攻略>

【首爾名勝探訪】 首爾，東大門的地標——DDP探索! DDP總整理（包含交通方式，購物，美食整理）

韓國必買4. YG Republique

韓星周邊 - YG ENTERTAINMENT

小編跟住要介紹嘅呢間，終於唔係SM家㗎啦～

呢間其實係YG開嘅餐廳，呢間餐廳入面一共有三種唔同嘅美食餐廳，有燒肉店，酒吧同埋Cafe。

不過食物唔係小編要介紹嘅重點～

重點呢間店入面嘅韓星周邊區！

喺一樓最後個度可以見到呢個專賣韓星周邊商品嘅區域～

雖然係一個好細嘅空間，不過依照小編嘅粉絲心理，大家應該都係好想入去尋寶㗎啦～！

既然係YG開嘅餐廳，咁入面嘅韓星周邊商品就梗係都係YG家㗎啦！

其實就好似SM一樣，咩都有咩都賣咩都唔奇怪

（但SM都係誇張啲....）

衫、帽呢一類應該都係基本款~

Fans嘅手燈都可以喺呢度買到㗎！

好得意嘅GD熊都係不可缺少嘅韓國必買商品之一！！

順帶一提～呢間餐廳嘅最外面都放咗一隻好大隻嘅GD熊㗎～～

雖然呢度賣韓星周邊嘅空間好細，不過其實都有幾多嘢買～

推薦大家可以嚟呢間餐廳袋飯，

得閒嘅時候順便過嚟行下周邊商品呢區！

！韓國必買 加碼資訊！

Star Avenue 明洞樂天百貨星光大道 (롯데백화점스타의거리)

最後~要介紹呢大家嘅就係～明洞樂天嘅明星大道！

有時候雖然好鍾意某些偶像，但係韓星周邊又有啲貴XD

好像唔一定可以負擔得到> <

咁小編要推薦大家嚟呢個地方～雖然唔係可以買到韓星周邊商品嘅地方，

不過係喺大家嚟韓國Shopping可能都會經過嘅樂天免稅店！

呢條唔係好長嘅Ｌ型星光大道，喺牆上會有好多韓星嘅相同手印！

雖然呢條路唔太長，不過對Fans嚟講可能會花好多時間行XD

因為一直係度睇相同影相，哈哈！

唔同SMTOWN凸起嚟嘅手掌印，呢度嘅係凹入去～

可以同你鍾意嘅偶像high fiveXD

不過其實呢個有其他作用，就係佢係一個互動裝置，

只要同相對應嘅韓星手印high five，隔離嘅螢幕就會顯示出個位韓星嘅相㗎！

不過呢度會有嘅韓星，只限於樂天嘅代言人～

所以如果自己鍾意嘅韓星唔係樂天嘅代言人就冇辦法喺度睇到啦> <

呢度仲有一個幾特別嘅就係，會有一個展示櫃展出呢啲代言人著嘅衫～

等大家可以清楚睇到佢哋著邊一個牌子嘅衫，

如果想同鍾意嘅韓星著同款衫嘅話，可以喺呢度睇下～

而且有啲價格都唔係好貴，好似八秒，SPAO呢啲比較平價嘅牌子都有㗎！

咁今日嘅介紹就到呢度啦～

其實嚟到韓國必買嘅嘢有好多！如果係Fans嘅話一定會喺韓星周邊上面洗好多錢ㅠ ㅠ

不過都係好布望大家可以支持正版～（雖然正版好貴～～～）

今天主要介紹咗呢幾間韓國必買嘅韓星周邊商品鋪，希望大家會鍾意啦～

雖然比較多都係SM家藝人XD

未來有機會都會繼續更新一啲韓國必買嘅韓星周邊商品鋪嘅資訊㗎！

例如仲有今日冇介紹到嘅，弘大嘅TWICE周邊商品專門店～

如果想知道關於呢啲資訊嘅話都可以同小編講，之後再為你哋介紹啦～