弘大Home Plus介紹
樂天以外韓國超市之選！弘大合井Home Plus探訪記（附現場退稅資訊）
Hello，大家好！呢度係由韓國人每日提供最新韓國旅行資訊嘅Creatrip。
嚟韓國玩想買手信好多人都會去樂天超市，但其實除咗樂天，韓國仲有其他大型超市。今次就同大家介紹規模相當驚人嘅Homeplus。
今次小編去嘅分店就係位於大家旅行都一定會去嘅弘大合井，裏面有咩好買，又有冇得退稅呢？一齊嚟睇吓啦！
合井Homeplus | 資訊
- 地址：서울 마포구 합정동 양화로 45
- 營業時間：10:00 - 00:00（逢第二、四個星期日休息）
- 小Tips：鄰近合井站9號、10號出口
合井Homeplus | 2022最新實況
0.jpg)
弘大Homeplus超市入口同收銀櫃台係同一個方向。入去之前會有餐廳同cafe，無論平日定假期都有唔少人喺度食飯。
一入到去超級市場，大家第一個會見到嘅係賣酒嘅區域。平時喺香港想買燒酒都好貴，但係呢度最平一支都只需要₩1,350（大約HKD $8），平過便利店同餐廳，鐘意飲酒嘅朋友記住唔好錯過！（不過大家都知道韓國人好鐘意飲酒，所以呢度經常都會有好多人，大家推車嘅時候記住要小心啲）
而啤酒方面，韓國最多人飲嘅牌子係Cass，淺藍色嗰款係輕盈版，比起普通版本少33%卡路里，非常適合想飲酒又怕肥嘅朋友們。
而入口右手邊就有一個專賣HBAF杏仁嘅區域，通常都會有買1送1優惠，啱曬買返香港做手信。
行入少少大家就會去到冷凍食品區，如果大家會喺韓國逗留一段時間，又唔想餐餐都喺出面食咁貴，不妨考慮喺度買啲食材返去煮嚟食。
冷凍食品區隔離就係賣海鮮同肉類嘅地方，喺呢度可以搵到好多款本地同進口海鮮。大家冇睇錯，呢度仲有個擺滿燒酒嘅貨架，係唔係好特別呢！係因為好多韓國人都鐘意食海鮮嘅時候配燒酒，所以多數賣海鮮嘅區域都可以買到燒酒，大家都不妨可以試吓呢個配搭。
一場嚟到韓國超級市場，點可以唔買返啲韓國零食返香港啊！小編11月頭去嗰陣，咁啱撞正Pepero Day。因為Pepero，即係朱古力百力滋同1字好似，所以11月11號就叫做Pepero Day，而韓國人會喺嗰日送Pepero俾自己鐘意嘅人。所以每逢11月頭，好多超級市場都會喺當眼位置開設一個賣Pepero嘅區域，大家都可以入鄉隨俗買返一盒送俾人。
現今社會越嚟越多人自己一個人住，而且家庭規模都比較細，為咗方便同減少食物浪費，最近都出咗好多款懶人煮食包。呢啲懶人煮食包有齊所有材料，只要跟住包裝上面嘅步驟煮，就可以輕鬆搞掂一味餸甚至係一餐。最平一個只係需要₩5,490（1人份量，大約HKD$35），平過出街食！
附近亦都有賣啲只要用火加熱或者用微波爐叮一叮就食得嘅即食包，例如有粥、辣炒年糕、泡菜湯、牛骨湯等等。而最近韓國亦都推出咗好多啱素食主義者食嘅即食品，唔食肉嘅朋友都有好多選擇。
講起韓國就當然唔少得泡菜啦！以前大部分韓國人都會自己喺屋企醃泡菜，但隨著現代人越嚟越忙，而家好多人都係直接買現成嘅返屋企食。呢度泡菜種類繁多，仲有細包裝，唔洗驚一個人食唔曬。
嚟到即食麵區，最搶眼嘅都係紅色包裝嘅辛拉麵，佢哋最近仲請嚟足球明星孫興慜代言，fans絕對唔可以錯過！除此之外，大家仲可以見到呢度好多香港買唔到嘅即食麵，種類非常多，大家可以買返香港試！
而最吸引小編嘅就係辣雞麵啦！韓國辣雞麵款式越出越多，而家甚至仲出埋辣雞味咖喱，食得辣嘅朋友不妨買返包！
下一站就係大家期待已久嘅零食區啦！大家都知道韓國人非常貪靚，連零食都追求低脂低糖。最近韓國新出咗好多標榜零糖同低脂嘅軟糖同餅乾，鐘意食甜嘢但又怕肥，或者對皮膚唔好嘅朋友可以買嚟試吓。
Homeplus都有賣好多外國零食同朱古力，大家可以喺度見到啲熟悉嘅零食。
韓國超級市場同便利店經常都會有買一送一或者買二送一嘅活動，雖然真係好抵，但係大家記住要衡量吓到底需唔需要咁多先好買啊！
除咗嘢食，Homeplus仲有賣好多其他產品，例如日常用品同玩具等等，價錢有時候會比其他大型超級市場平，大家不妨喺度掃貨返香港。
去到俾錢嘅部分，大家可以選擇去普通櫃檯或者用自助埋單櫃檯。自助埋單嗰部機有中文同英文可以揀，而且過程中遇到問題，側邊都會有一個職員幫手，所以唔洗太擔心。俾完錢之後，需要退稅嘅朋友可以行去自助退稅機或者人工櫃檯進行手續，唔洗去到機場先搞！
合井Homeplus | 前往方法
0.jpg)
弘大合井嘅Home Plus超市位於地鐵2號線同6號線嘅合井站（합정역），同弘大站仲有上水站都只係行十幾分鐘就可以到嘅距離。
最快抵達Homeplus嘅方法，就係由合井站10號出口行出嚟，見到有大型商場嘅建築物就係Homeplus嘅所在地啦。Homeplus位於地下二樓，所以行出嚟之後，根據小編影嘅相，搭電梯落下面兩次就會到Homeplus。
0.jpg)
0.jpg)
0.jpg)
0.jpg)
0.jpg)
以上係小編整理嘅2022最新弘大合井Homeplus資訊。首爾住宿揀喺弘大同新村一帶嘅朋友，唔一定要走去首爾樂天，不如去附近嘅合井Homeplus行下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
