logo

韓國五花肉文化

點解五花肉係國民美食?油脂可以吸走空氣污糟嘢?點咩醬最好食?韓國五花肉文化

Yeong
a year ago

Hello,大家好,我哋係由韓國人每日提供最新韓國旅行資訊嘅Creatrip


講到韓國美食,大家第一樣會諗到咩呢?除咗泡菜、蔘雞湯、炸雞之外,當然唔少得仲有五花肉啦!韓國無論去到邊,喺條街行唔洗幾耐,就會見到好幾間燒肉店。小編今日想同大家分享,韓國燒肉文化小知識,等大家嚟到可以好似正宗韓國人咁食肉飲酒。



韓國五花肉文化

韓國有五花肉節(삼겹살데이)


喺十幾年前,韓國畜協為咗宣傳「韓國國產豬」,創立咗五花肉節。每年3月3號就係五花肉節,韓國人為咗要紀念呢日,放工之後都會約埋一齊去食肉。韓國人點解會咁鍾意食五花肉呢?畢竟好多人無論喺屋企定係出面食,好多時都會挑走肥肉部份。但對韓國人嚟講,呢部分先係精華,甚至成為佢哋國民代表性嘅美食之一。



韓國人之咁鍾意食五花肉,佢哋分別有3個講法:

1. 五花肉油脂可以吸清氣管同肺部嘅污糟嘢。


韓國以前仲係以工業為主嘅時候,韓國人成日都係喺灰塵環境底下工作。放工之後都會一齊約食飯,如果只係食一般料理,對佢哋嚟講可能冇補充到體力,所以就揀咗食平豬肉。



當時衛生觀念唔太好,佢哋好少戴口罩防護,好多人都因灰塵引致肺部疾病而死。所以「工人食五花肉,油脂可以清潔肺部同氣管灰塵」嘅謠言開始興起,直到今時今日都仲有人講緊。



2. 豬肉主要部位都變成出口貨,只剩油脂較多嘅五花肉。


呢個講法有分兩個時間點,一個係日本殖民韓國時期,另一個係韓國獨立後60、70年代,因為當時韓國養豬業興起,大量豬肉輸出去日本,對日本人嚟講,佢哋比較鍾意食少油脂部位(做成炸豬排),只剩底五花肉賣唔出,所以養豬主人都只好喺國內賣五花肉。



3. 豬肉價格係所有肉類當中最平。


國氣候好難種大量蔬菜,大家唯一成日見到嘅可能只得泡菜,喺好耐以前,韓國一般百姓生活幾乎都係只食泡菜、大豆芽加白飯,長期落去,飲食營養難免失衡。

對一般家庭嚟講,要每餐都食到肉真係一件難事,佢哋唯一可以做嘅就係揀平啲嘅豬肉。五花肉肥肉油脂多,好多時因為太肥而賣唔出去,所以價錢唔會好貴,一般家庭都可以負擔得起,所以五花肉就成為咗平民嘅代表性食物。



韓國人食五花肉會準備咩呢?

大家應該都睇過韓國節目,或者嚟韓國食過五花肉,應該好清楚食五花肉會有咩配料。小編而家一次過整理俾大家睇,喚醒大家對韓國五花肉嘅記憶啦!

1. 五花肉烤爐


韓國燒肉主要有分兩種方式,一種係炭火,另一種係銅板加熱,銅板加熱又有分兩種,一種係板面傾斜,等肉嘅油脂可以只向一邊滴落,另一種係圓形盤狀,上面有好多細窿 ,油脂可以自己流走。




2. 燒五花肉配菜


基本上每去食一間燒肉,職員都會提供生菜、泡菜、醬料、鹽,有啲好少少嘅鋪頭,仲會提供芝麻葉、醃蘿蔔、大豆芽、洋蔥、大蒜、韭菜,有啲甚至會免費送大醬湯或者泡菜湯。



韓國人點食五花肉?

1. 燒到表面金黃色,再將肉剪開。


肉仲未熟到一定程度嘅時侯,其實係剪唔開,反而會更痴埋一齊,所以韓國人都鍾意等耐啲,表面燒到金黃色先再剪。



2. 包生菜同其他小菜一齊食



每個人都有唔同包法,好多韓國人都鍾意包芝麻葉一齊食,但好多外國人就未必接受到。



除咗要包菜之外,仲會包埋泡菜、蒜頭、大豆芽、韭菜或者蔥絲,隨便包一包已經好大舊,但韓國人仲係會好努力咁塞哂入口。



3. 點韓式醬或麻油加鹽一齊食



韓國人食燒肉嘅時候,一定會點辣醬(包飯醬)或麻油鹽一齊食。



有啲燒肉店除咗有基本醬(包飯醬)同麻油之外,仲會提供大醬同蝦醬,值得一提嘅係,點蝦醬係濟州島特有食法,喺首爾或其他旅遊地區,可能要特別問先會俾。



另外,餐廳如果有賣豬皮嘅話,亦會提供糯米黃豆粉,食起嚟會更煙韌。

  2022燒肉店推介


4. 必燒泡菜、蒜頭、韭菜、大豆芽


每間燒肉店都會提供泡菜, 比起凍泡菜,將蒜頭同泡菜燒一燒再夾肉一齊食,就更加好味。



5. 配冷麵或韓式便當


韓國人食燒肉有一個特點,比起只叫一個白飯,佢哋更加鍾意叫冷麵或韓式便當嚟食。



唔鍾意食冷麵嘅話,大家可以叫韓式便當,不過記得打開之前一定要將個飯盒不斷咁搖,咁先可以將入面配料同飯撈得勻。



6. 配上飯類同鍋類一齊食


如果都係比較鍾意食白飯嘅話,韓國人會另加多個大醬鍋或者泡菜鍋一齊食。



7. 食燒肉配酒


韓國人真係無酒不歡,基本上無論係朝早定夜晚,大家都會見到佢哋飲緊酒,首爾人多數會叫真露,釜山人會比較鍾意叫好日子燒酒(Good Day)。



韓國人飲酒文化


韓國人好鍾意將啤酒同燒酒撈埋一齊飲,佢哋稱之為「燒啤」(소맥),雖然咁樣飲會易醉啲,但係只飲燒酒又會覺得好苦。韓國人會先用燒酒杯裝6、7成滿,再倒入啤酒杯,之後再倒啤酒,佢哋會用一隻筷子或匙羹插入酒杯打一下,等兩隻酒可以撈埋一齊。



韓國仲做過問卷調查,燒酒同啤酒比例3:7係最多人鍾意,咁嘅比例小編都好鍾意,一啲都唔覺得苦,反而覺得甜甜地,好易入口。

以上係韓國燒肉(五花肉)文化,下次嚟韓國嘅時候,不妨模仿吓韓國人食法啦!




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

熱門文章