南浦洞美食總整理
釜山有咩好食？小編帶路！南浦洞11間美食令你意猶未盡！2023年釜山南浦洞美食總整理
Hello，大家好，我哋係由韓國人每日提供最新韓國旅行資訊嘅Creatrip。
一講到南浦洞，好多人都只會諗到係shopping，但其實嗰度都有唔少美食等住大家，今次小編整理好11間，鍾意食嘢嘅朋友千祈唔好錯過啦！
釜山南浦洞美食總整理
1. Kongbate韓式半自助餐（콩밭에）
「Kongbate韓式半自助餐」小編覺得CP值好高，一人只需₩11,000就可以食到自助餐（除主食），由傳統韓式到燉魚、蔬菜等都有，款式多，真係相當抵！
如果自認為係大胃王，嚟到呢度真係可以飽住走！覺得韓國一般自助餐太貴嘅話，嚟呢度都係一個唔錯嘅選擇！只要係我哋會員，4人同行仲可以免費獲得到一罐汽水添！
Kongbate韓式半自助餐（콩밭에）
- 地址：부산 중구 광복로49번길 26 B1
- 營業時間：平日 10:30 - 21:00、週末 10:30 - 21:30
2. 元祖首爾蔘雞湯（남포동 서울삼계탕）
天氣凍會令人會想食咩？小編推薦大家可以試吓「元祖首爾蔘雞湯」！
元祖蔘雞湯₩16,000
佢哋價錢合理，用料豐富，蔘雞湯放入咗人蔘、大蒜、栗子、大棗等食材製作，味道食起嚟好高級，非常適合寒冷冬季同夏季補身美食。
同樣只要係我哋會員，3人落單時，即送一罐飲品，6人以上送兩罐飲品，以此類推。另外仲會免費提供人蔘酒，最多可以送兩支。
元祖首爾蔘雞湯（남포동 서울삼계탕）
- 地址：부산 중구 남포길 36
- 營業時間：10:00 - 21:30（Last Order 21:00）
3. 阿修羅（남포동 아수라）
講到要喺韓國食肉，大家可能第一時間都會諗到五花肉、韓牛、烤腸等。不過今日小編想為大家介給嘅呢間南浦洞「阿修羅」，雖然都係燒肉，但就超唔同，絕對係燒肉新食法！佢哋每日都會製作新鮮肉捲，肉會包住啲菜，放上爐到燒，超香，令人一試愛上！
肉捲₩19,000（1份）
肉餅₩19,000
除咗肉捲之外，喺阿修羅一定要叫嘅仲有肉餅，好味程度係超過大家所期待！雖然整體嚟講價錢偏高，但喺其他地方好難食到呢隻味！只要係我哋會員可以免費獲得大醬湯一份，或者飲品（2人1罐，如此類推）。
阿修羅（남포동 아수라）
- 地址：부산 중구 비프광장로 19-2 2F
- 營業時間：12:00 - 23:00
4. 札嘎其大成生魚片店（대성횟집）
去釜山又點可以唔食海鮮？不過咁多間舖頭，小編會推薦大家可以去試「大成生魚片店」。
海鮮湯內海鮮/清蒸竹蟹
小編會推薦大家嚟，係因為價錢公道，老闆好客唔會呃遊客錢，而且份量好足！所有Menu都有分S、M、L Size，有固定價錢，不過好似帝王蟹、竹蟹、龍蝦等就係計秤賣，大家可以先問老闆價錢，啱價先買。
偷偷地話俾大家知，只要係我哋會員，仲可以享有9折優惠添！
札嘎其大成生魚片店（대성횟집）
- 地址：부산 중구 자갈치로38번길 4-1
- 營業時間：09:00 - 22:00
5. 味酒工房（미술공방 남포본점）
南浦洞最近有一間烤腸店超受歡迎，喺Sns經常會見到佢嘅出現，身為吃貨嘅小編，當然都唔想錯過，去咗一試！
烤扇貝烤腸蝦組合 小份（₩38,000）
因為佢最近人氣超高，小編去到嘅時候幾乎坐滿晒人，只係得返一張枱唔使等。小編同朋友兩個叫咗小份，份量都幾多，而且職員會直接幫大家烤，唔使自己郁手。
小編個人對呢間「味酒工房」都會俾幾高分，因為烤腸本身有調味，所以食落唔會覺得單調，另外價錢同份量都OK，如果有下次，小編會再留肚食埋佢哋嘅烤腸炒飯！
味酒工房（미술공방 남포본점）
- 地址：부산 중구 중구로29번길 17-1
- 營業時間：16:00 - 00:00
6. Gong血腸（공순대）
小編上次去釜山嘅時候，有專登搵吓南浦洞有咩傳統美食，點知無意中發現呢間「GONG血腸」隱藏喺小巷入面，每次只要一到食飯時候，就連出面都會坐滿晒人。
血腸鍋 小份₩28,000
嚟到一定要試佢哋嘅血腸鍋，小份可以夠2至3人食，用料豐富，雖然望落有啲辣，但食落會覺得啱啱好，重點係血腸冇腥臭味，大家可以配飯或者麵食。
小編同朋友因為當日太肚餓，忍唔住叫多份血腸拼盤（₩20,000），不過可能因為血腸鍋嘅味太令人深刻，一般血腸有少少輸蝕，建議二揀一就得，再配返支燒酒，完全就係地道韓國人食法。
Gong血腸（공순대）
- 地址：부산 중구 중구로29번길 18-5
- 營業時間：12:00 - 00:00
7. BuGwang豬肉湯飯（부광 돼지국밥）
釜山美食之中，一定要食嘅仲有豬肉湯飯，「BuGwang豬肉湯飯」上過白種元老師節目《三大天王》，係被認證過嘅豬肉湯飯名店之一。
豬肉湯飯₩8,000
一份₩8,000豬肉湯飯價錢中規中矩，有嘅小菜同醬料同其他鋪頭都大同小異，但唯一唔同嘅係，湯底一啲都唔腥之外，就連肉嘅份量都相當多，令人忍唔住食完一啖又一啖。
BuGwang豬肉湯飯（부광 돼지국밥）
- 地址：부산 중구 대청로141번길 15-1
- 營業時間：10:00 - 21:00、逢星期日休息
8. ABIGO（아비꼬 남포점）
「Abigo」係一間連鎖店，主打日式料理、咖哩餐廳，南浦洞分店座位多，同時仲有附中文menu，落單都方便好多。
大家可以揀單點之後再加其他小菜或配料，或者直接揀menu已經配搭好嘅單人、雙人套餐等。小編食過幾次都覺得套餐份量夠多，食完會超飽。而且炸豬排肉好嫩，食哂成塊都唔會覺得膩。
ABIGO（아비꼬 남포점）
- 地址：부산 중구 남포길 14
- 營業時間：11:30 - 22:00
9. 拓果蔘雞湯（꾸지뽕삼계탕）
蔘雞湯₩13,000
除咗小編啱啱介紹過嘅「元祖首爾蔘雞湯」之外，呢間「拓果蔘雞湯」都係美食店之一。湯底經過長時間熬煮，湯入面放咗超多大蒜，香味濃郁，另外雞肉嫩到只要用筷子夾一夾，肉同骨超易分離。
拓果蔘雞湯（꾸지뽕삼계탕）
- 地址：부산 중구 남포길 28
10. 海豚嫩豆腐（돌고래 순두부）
相信大家都知，有米芝蓮標誌，就係得到世界認同，但喺韓國，只要有「Blue Ribbon Survey」就係堪稱韓國版米芝蓮。南浦洞「海豚豆腐鍋」雖然睇外觀會覺得好舊，但只要一食過，好多人都會忍唔住再返去食！
嫩豆腐鍋₩6,000
海豚豆腐鍋同一般豆腐鍋唔同，佢哋豆香同辣味都令人超回味，價錢又唔貴，而家諗返起都令人流哂口水。
海豚嫩豆腐（돌고래 순두부）
- 地址：부산 중구 중구로40번길 17 2F
- 營業時間：07:00 - 22:00
11. 外婆的生魚片麵（할매집 회국수）
相當年韓戰時期，「外婆的生魚片麵」嘅婆婆，就喺影島開始做生意。佢將魔鬼魚切成薄片，用辣椒醬同麵一齊撈均嚟食，意外地獲得唔少好評。之後佢搬到南浦洞，鋪頭內部用嘅器具其實都係鐵制大碗、水壺等都好復古，好似返到鄉下咁，俾人一種好溫暖同窩心嘅感覺。
檯上大水壺裝住嘅係鯷魚湯，大家可以就咁飲，或者係等生魚片麵出嚟嘅時候，加少少落去撈勻。鋪頭入面仲有其他菜式，一樣都係好好味，同朋友去可以叫幾款share食。
- 地址：부산 중구 남포길 25-3
- 營業時間：09:00 - 23:00
以上11間餐廳都係韓國人成日會去，而且超地道，行南浦洞行到攰，Shopping完想搵間餐廳醫肚，不妨試吓其中一間啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
