廣藏市場總整理
2024年更新!而家廣藏市場變成點?去到有咩係必食同必買?
Hello,大家好,我哋係由韓國人每日提供最新韓國旅行資訊嘅Creatrip。
首爾大名鼎鼎嘅傳統市場莫過於位於東大門鐘路5街嘅「廣藏市場」,呢度歷史悠久,佔地大,係好多人嚟首爾嘅必去勝地,小編最新Update咗最近現況,有咩係必食?就等我哋一齊繼續睇落去啦!
記住要開廣東話字幕啊~~~~
「廣藏市場」簡介
- 地址:서울 종로구 종로4가 창경궁로 88
- 營業時間:市場 09:00 - 18:00(逢星期日休息)/ 街頭小食 09:00 - 23:00 /服裝大樓(구제상가)10:00-19:00(逢星期日休息)
「廣藏市場」介紹
廣藏市場係一個歷史悠久嘅傳統市場,1904年韓國同日本簽下喪權辱國嘅「乙巳條約」後,南大門市場嘅經營權被奪去,當時韓國人民為咗解決經濟困局,試圖成立新嘅市場營運。
廣藏市場喺1905年誕生,原本預訂設立喺鐘閣站附近嘅廣橋同長橋之間,所以當時漢字名叫「廣長市場」。不過當時受雨災影響,市場搬到朝鮮舊三大市場之一,位於東大門附近嘅梨峴市場舊址,同時個名將「廣長市場」變為「廣藏市場」,意思係「廣為保存」。
廣藏市場最近鐘路5街,呢度無論幾時都係咁多人,尤其係星期五、六、日夜晚,如果唔想同人逼,建議大家平日中午之後嚟係最好。
呢度除咗多小食之外,亦有好多間賣棉被嘅鋪頭,每一間都有唔同特色,價錢唔算貴,Cp值高,唔少遊客嚟到都會買返套。
提提大家:始終因為係市場未必每一間舖頭都肯收信用卡,建議大家去之前可以帶定現金。
廣藏市場美食推薦
1. 故鄉刀削麵(고향칼국수)
- 營業時間:08:00 - 23:00、逢星期一、每月第4個星期日休息
- 地址:廣藏市場A70號攤位
第一間想同大家介紹嘅係喺Netflix《Street Food》出現過嘅故鄉刀削麵,呢間舖頭由正門行入去就會見到,而且會見到有Netflix嘅牌印咗老闆娘個樣。
小編咁啱喺佢啱啱開鋪冇耐就去到,當時老闆娘準備緊食材,望住佢哋包嘅餃子(有豬肉同泡菜兩款),真係睇見都流口水!
小編特別推薦大家一定要食佢哋嘅刀削麵,當時老闆娘即搓即煮,食落超爽口,價錢一啲都唔貴,一碗只係₩6,000,如果加咗餃子就係₩7,000。
配埋呢度秘製嘅泡菜一齊食,令人忍唔住食完一啖有一啖,大家嚟到唔需要怕唔識溝通,因為老闆娘識講少少英文,落單完全冇難度!
2. 聲牛生拌牛肉(성우육회)
- 營業時間:10:00 - 22:00(Last Order 21:00)
- 地址:서울 종로구 종로 200-12
- 優惠:下載並出示優惠券即可享9折優惠
唔知大家又敢唔敢食生牛肉呢?呢度用咗秘製將去醃製,好多人一試愛上!
唔少人嚟到都係為咗食生牛肉肉嚟廣藏市場,雖然一開始睇外表會覺得有啲得人驚,但食落口會覺得好soft,甜得嚟又有啲鹹嘅口感真係好正!
除咗生牛肉之外,呢度仲有章魚生牛肉,一份係₩30,000,唔少節目同名人都有介紹過佢!不過因為章魚一上枱仲係識郁,識嘅時候可能會俾佢啜住,感覺好特別,但如果怕嘅人可能要小心。
另外喺雪櫃前面仲會見到有一啲新鮮內臟,有興趣嘅朋友都可以試吓!
3. Pancake, SEOUL(박가네빈대떡)
- 營業時間:08:00 - 22:00
- 廣藏市場A59號攤位
呢間Pancake, SEOUL同樣都有上過Netflix《Street Food》,呢度有賣各種小食,例如紫菜包飯、辣炒年糕、綠豆煎餅等。
綠豆煎餅ㅡ塊係₩5,000, 如果覺得唔夠可以加多塊牛肉塊,一樣都係₩5,000。
綠豆煎餅煎到金黃色,外脆內軟,超好味!
叫綠豆煎餅嘅時候,老闆仲會送上一個洋蔥汁,點住一齊食超好味!
4. 姊妹元祖麻藥紫菜包飯 (자매원조마약김밥)
- 營業時間:N/A
- 廣藏市場A08號攤位
廣藏市場仲有一樣必食嘅就係麻藥紫菜包飯(마약김밥),佢比平時食開嘅細條,裏面包咗好多餡料,上面再灑上芝麻,食一條絕對唔會夠,正如佢個名一樣可能因為落咗麻藥,會越食越多!
就嚟地獄廚神Gordon Ramsay都有嚟過,就知有幾好味!呢度連埋辣炒年糕已套餐出售,一份係₩5,000,如果加埋魚糕就係₩6,000。
除咗小編介紹嘅以上幾間舖頭,呢度有唔少小食店,每日都係新鮮出爐,唔單止聞落去好香,就連味道都一樣咁正!
呢度仲有一啲小菜賣,鍾意食韓式小菜嘅朋友一定要喺度買番啲返去啦!
老闆娘仲好親切叫小編去試食,用料新鮮,魷魚同蝦都好彈牙!
5. 昌信生拌牛肉 2號店(창신육회 2호점)
- 地址:서울 종로구 동호로 403-17
- 營業時間:星期二至日 10:00 - 22:00(逢星期一休息)
小編另一間想介紹嘅生牛肉餐廳係「昌信生拌牛肉」!呢度除咗生牛肉之外,仲有賣綠豆煎餅、葱煎餅等等嘅韓國傳統美食,就算唔食生嘢都一樣可以嚟~
呢度優點之一係可以叫Set!呢個三拼Set包生拌牛肉、生牛肉刺身同活章魚,大家可以一次過試曬咁多款韓國特色Menu。食生牛肉嘅時候記住要配埋側邊嘅梨絲一齊食,口感更佳豐富之餘味道都會更加鮮甜!
6. 昌信生拌牛肉 4號店(창신육회 4호점)
- 地址:서울 종로구 종로 206 2,3F
- 營業時間:星期二至日 10:00 - 21:50(逢星期一休息)
「昌信生拌牛肉」總共有4間分店,4位老闆都各有風格XD 除咗上面介紹嘅2號店之外,大家都可以透過我哋預約4號店!
平時生牛肉調味都係甜甜鹹鹹,不過「昌信生拌牛肉」4號店嘅生牛肉落咗辣椒粉,所以會有少少辣!小編個人覺得辣辣地反而無咁漏,加埋清甜嘅梨絲仲可以解辣,所以唔太食辣嘅朋友們都唔需要擔心。呢度亦都有韓式煎肉餅同綠豆煎餅可以叫嚟食,外脆內juicy,加埋酸酸甜甜嘅醃洋葱就perfect啦 !
7. Orai里脊(오라이등심)
- 地址:서울 종로구 종로5가 395-10
- 營業時間:10:30 - 00:00
「Orai里脊」最出名食辣椒醬烤豬肉同盲鰻,仲上過幾個韓國節目添啊!
辣椒醬烤豬肉係將豬里脊肉捲成長筒狀之後切片,再加埋惹味辣醬調味嘅超特別燒肉!而且呢度用嘅係炭火,肉快熟得嚟仲有炭香味!
8. 朴家生拌牛肉(박가네 육회)
- 地址:서울 종로구 종로32길 9
- 營業時間:09:00 - 22:00
「朴家生拌牛肉」係NETFLIX原創節目嘅拍攝場地之一,好多韓國人同遊客都會慕名而來!
「朴家生拌牛肉」嘅招牌係生牛肉紫菜包飯,每枱都會有一碟!呢度仲有生牛肉、活章魚、韓牛煎餅等等嘅美食,任君選擇!
9. 朴家綠豆煎餅 2號店(박가네 빈대떡 2호점)
- 地址:서울 종로구 동호로 403-16
- 營業時間:08:00 - 22:00(每月第3個星期三休息)
喺鍾路5街站7號出口行2分鐘就可以去到「朴家綠豆煎餅」2號店!呢間餐廳曾經上過各大韓國電視節目同NETFLIX,鋪頭入面亦都有唔少明星簽名,證明真係好受歡迎!
如果係一班朋友嚟,建議大家可以叫Set或者什錦煎餅,咁就可以一次過試曬咁多款韓式煎餅啦!
10. 廣藏飯焦炸雞(광장 누룽지 닭강정)
- 地址:서울 종로구 동호로 403-8
- 營業時間:12:00 - 22:00(Last Order 21:00)
「廣藏飯焦炸雞」上過韓國三大電視台嘅節目,而且有好幾個超紅YouTuber都嚟過拍片,真係好受歡迎!
呢度所有雞肉都係韓國本地雞,亦都保障絕對唔會用急凍雞,而且運用韓國蒜頭整嘅秘製醬汁不含任何人工調味料,包保每一嚿雞都夠嫩滑juicy夠惹味!而家只要下載埋我哋嘅Coupon,消費超過₩20,000就可以免費得到一罐飲品!
11. hidden hour(히든아워)
- 地址:서울 종로구 종로32길 21 4F
- 營業時間:星期二至六 17:00 - 23:00(Last Order 22:00)、逢星期日及一休息
呢間Rooftop Wine Bar隱身喺人山人海嘅廣藏市場某個角落入面,氣氛同廣藏市場超唔同嘅,大家可以喺人山人海嘅傳統市場享受悠閒時光!
呢度嘅嘢食大部分都係韓式fusion菜,用西式烹調方法去煮各種韓國特色料理,而且全部都同葡萄酒好夾!呢度每款嘢食嘅量唔多,可以叫多幾款同朋友share,而且menu上面每款嘢食隔離都會有推薦嘅葡萄酒,大家可以參考!
廣藏市場其他區域
1. 韓服專賣店
除咗小食之外,廣藏市場其實仲有賣韓服、棉被或者日常用品等。
小朋友同大人韓服呢度都有,甚至仲有一啲韓服配飾,買嚟做手信都幾唔錯。
2. 棉被專賣店
除咗韓服之外,最多遊客嚟到買嘅一定就係棉被,因為用料高質,價錢唔貴,甚至有唔同厚度同圖案俾大家揀。
如果想用咁平嘅價錢買入棉被,可以去同我哋合作嘅舖頭(156號店、169號店、evezary、Allerman)睇吓㗎!
3. 廣藏市場二手商街
- 地址:서울 종로구 창경궁로12길 11
- 營業時間:星期一至六 10:00 - 19:00、逢星期日休息
如果你係鍾意歐美風格嘅復古裝,咁你就一定要嚟啦!呢度會分哂男女裝,行嘅時候都方便啲,大家去到廣藏市場嘅時候,記得搵紅色牌寫住수입구제就係㗎啦!
4. 其他雜貨區
如果大家想買韓國嘅傳統鍋,都可以喺度睇吓。
另外一啲乾貨、傳統零食、人蔘都可以喺度搵到,Creatrip仲有同當中幾間鋪頭(梨花商會、新郎新娘、天生緣份)合作,大家只要出示coupon就可以用9折價錢買到手信返屋企!
如果想食到最地道而且有人情味嘅傳統市場,之後去開鐘路區,就一定要去買廣藏市場食返餐好啦!
要點樣先去到廣藏市場?
去廣藏市場好簡單,只要搭1號線去到鐘路5街站(종로5가)去9號出口,轉身就會係廣藏市場入口。
不過如果想搭扶手電梯,小編會建議大家喺11號出口出,行去市場入口只係需要1至2分鐘。
除咗扶手電梯之後,呢度仲有Lift,一樣都係出嚟之後行1-2分鐘到市場入口。
想了解韓國當地文化,去市場一定會發掘唔少驚喜,而且亦會欣賞到呢度嘅獨特魅力!
廣藏市場附近其他推薦
1. Green韓語學院
- 地址:서울특별시 종로구 청계천로 61
- 營業時間:星期一至六9:00 - 21:00、星期日休息
2. 首爾元祖辣燉安康魚(서울원조아구찜)
- 地址:서울 종로구 삼일대로 436-1
- 營業時間:10:00 - 02:00
首爾元祖辣燉安康魚堅持用新鮮食材去料理,出名量多價錢平!呢度最出名食燉安康魚,另外仲有賣辣燉海鮮、辣燉花蟹同海鮮鍋等。
如果之後去廣藏市場,不妨都可以參考吓小編嘅介紹,話唔定會幫到大家㗎!如果想睇其他首爾傳統市場介紹,都可以撳我了解更多詳情。
如果有更多想知嘅內容,都可以隨時dm話俾我哋知:)
Instagram:creatrip.hk