logo

弘大美食總整理

2024最新弘大美食整理!每日食都食唔完嘅人氣餐廳,嚟弘大前必讀攻略!

Yeong
14 days ago

Hello,大家好,我哋係由韓國人每日提供最新韓國旅行資訊嘅Creatrip。  


無論係遊客定係韓國人,都好鍾意去充滿年輕氣息嘅弘大玩!小編相信大家嚟韓國玩,都一定會將弘大放入行程入面。但係呢度實在有太多舖頭,有時候一時之間唔知道有咩好食,今日小編就整理咗最新2023版本嘅弘大餐廳攻略,之後大家嚟弘大玩可以參考吓!



2024弘大美食總整理

弘大貓頭鷹(홍대씨부엉)

  • 地址:서울 마포구 서교동 358-39
  • 營業時間:11:00 - 00:00

弘大美食總整理 2022

韓國旅行 弘大美食 弘大貓頭鷹


「弘大貓頭鷹」係一間專門食炒年糕嘅餐廳,雖然地方唔大,但非常乾淨企理。鋪頭入面仲有賣弘大學生創作嘅藝術作品,賣出之後得到收益會俾返學生們,大家有興趣可以支持吓佢哋。


弘大貓頭鷹 海鮮炒年糕
海鮮炒年糕(씨볶이)2人份


呢度嘅招牌菜係「海鮮炒年糕」 ,辣炒年糕上面擺滿曬八爪魚、扇貝、青口,仲有各式各樣嘅炸物同麵,睇到呢個賣相都覺得震撼,嚟到大家應該都會相機食先!



夏威夷烤貝殼(하와이조개 홍대점)

  • 地址:서울 마포구 와우산로21길 19-8 B1F
  • 營業時間:16:00 - 02:00

2024 韓國首爾 弘大美食 推薦 弘大美食必吃


有冇朋友嚟韓國玩都鍾意去食燒貝殼呢!夏威夷風嘅裝修配上韓式燒貝殼超特別,而且因為餐點份量都好大+高質,所以好受韓國年輕人歡迎!


2024 韓國首爾 弘大美食 推薦 弘大美食必吃


小編覺得呢度其中一個最大優點係唔需要開瓶費,而且仲有免費即食麵,大家可以盡情飲飽食醉!


 弘大「夏威夷烤貝殼」詳細介紹


申美京弘大炒辣雞(신미경홍대닭갈비)

  • 地址:서울 마포구 서교동 364-22
  • 營業時間:11:00 - 22:40(Last Order 21:50)

弘大美食總整理 2022

韓國旅行 弘大美食 申美京弘大炒辣雞


「申美京弘大炒辣雞」雖然位置唔顯眼,但好多人嚟到弘大都會專程嚟呢度食炒辣雞!鋪頭內部非常大,亦都有提供各種語言嘅Menu,唔需要擔心睇唔明或者唔識叫嘢食。


申美京弘大炒辣雞 芝士蔬菜炒辣雞

芝士蔬菜炒辣雞(치즈퐁듀 야채닭갈비)


小編最推薦嘅係「芝士蔬菜炒辣雞」,辣炒雞肉配上芝士,香口得嚟可以中和到辣度,食到差唔多叫多份炒飯就唔怕食唔飽啦!食唔到辣嘅朋友們都唔洗驚,呢度可以調整餐點嘅辣度㗎~



飽肚烤腸(배떼기곱창 홍대점)

  • 地址:서울 마포구 양화로18안길 26-6
  • 營業時間:15:00 - 00:00(Last Order 23:30)、逢星期二休息

弘大美食總整理 2022

韓國旅行 弘大餐廳 飽肚烤腸


「飽肚烤腸」係弘大其中一間非常出名嘅烤腸店,曾經有好多電視台都嚟訪問過。呢度裝修得非常local,亦都有種復古嘅感覺。


弘大 飽肚烤腸 雪花烤腸

雪花烤腸2人份(눈꽃막창(2인))

呢間餐廳最出名嘅就係呢個「雪花烤腸」啦!搽滿香辣醬汁嘅烤腸上面堆滿好似一座雪山咁多嘅芝士,簡直係天衣無縫嘅組合。因為芝士會中和返啲辣味,所以就算唔太食得辣都唔洗太擔心啊!



給豚的男人(돈주는남자)

  • 地址:서울 마포구 잔다리로6길 34-9
  • 營業時間:星期一至五 13:00 - 23:00(Break Time 15:00 -17:00、Last Order 22:00);星期六及日 13:00 - 23:00(Break Time 15:00 - 16:00、Last Order 22:00)


「給豚的男人」喺條巷仔入面,雖然外觀睇落其貌不揚,但係佢喺弘大連續八年攞第一!



呢度嘅烤盤係用鐵煲蓋,而且會先喺外面用炭火燒熟豬肉外皮,咁做可以鎖住肉汁之餘仲會多一陣碳香!食嘅時候推薦大家可以點中間嘅特製麻藥醬汁,甜甜辣辣好惹味!而家外國人都終於可以喺網上預約啦!

 「給豚的男人」詳細介紹



HONKAZ 弘大店(혼가츠)

  • 地址:서울 마포구 와우산로21길 36-6 
  • 營業時間:11:30 - 22:00

弘大美食總整理 2022

韓國旅行 弘大餐廳 HONKAZ


呢間專賣炸豬扒嘅「HONKAZ」曾經上過韓國美食節目《白種元的三大天王》,非常受當地人歡迎。鋪頭空間算大,都可以容納到唔少人,而且牆上面嘅塗鴉令呢度嘅睇落都幾趣緻。


HONKAZ炸豬扒

王炸豬扒(왕돈까스) / 芝士炸豬扒(치즈돈까스)


韓式炸豬扒同日式炸豬扒有少少唔同,好似左邊呢款「王炸豬扒」咁,上面會淋上甜甜地嘅醬汁,份量仲非常大添!鍾意食炸豬扒嘅朋友不妨嚟試吓~



二代祖薯仔排骨湯(이대조 뼈다귀)

  • 地址:서울 마포구 동교로 196
  • 營業時間:10:00 - 23:00

2024 韓國首爾 弘大美食 推薦 弘大美食必吃


二代祖薯仔排骨湯係弘大最受歡迎嘅薯仔排骨湯餐廳之一,相信好多人都有食過!雖然佢而家轉咗做唔係24小時營業,但係嘢食味道同水準依然冇變!


2024 韓國首爾 弘大美食 推薦 弘大美食必吃

薯仔排骨湯(小)(감자탕 소)


排骨肉燉得非常軟熟,而且湯底夠惹味,食到咁上下想加肉、炒飯或者麵都得!如果係自己一個人去,都可以去食一人石鍋版!



有見到想去嘅餐廳?🤤



翁多來燉雞(옹다래찜닭)

  • 地址:서울 마포구 양화로 122
  • 營業時間:星期一至六 11:00 - 23:00、 星期日 11:00 - 22:00

弘大美食總整理 2022

韓國旅行 弘大餐廳 翁多來燉雞


「翁多來燉雞」位於弘大入口站9號出口附近,喺弘大超出名,價錢平得嚟份量又夠多,CP值好高。


翁多來燉雞

翁多來燉雞S(옹다래찜닭S)


雞肉完全唔會腥,而且非常滑,加埋惹味醬汁,真係令人停唔到口。食完雞之後仲可以用剩底嘅醬汁撈飯食,食完超滿足。

  弘大「翁多來燉雞」詳細介紹



荒謬的生肉 弘大店(엉터리생고기 홍대점)

  • 地址:서울 마포구 어울마당로 118 2F
  • 營業時間:11:00 - 23:00

弘大美食總整理 2022


講起韓國燒肉,相信大家應該都會諗起主打韓燒任食放題嘅「荒謬的生肉」,唔單止係遊客,連韓國人都非常鍾意嚟呢度!呢間燒肉鋪賣嘅全部都係新鮮豬肉,即叫即切,食落都安心啲。


韓國旅行 弘大餐廳 荒謬的生肉


小編認為呢度係弘大燒肉鋪之中品質最穩定嘅店鋪,而且無論係五花肉定梅頭豬,或者係大醬湯同小菜,全部都可以任食 ,食肉獸們真係唔可以錯過!


荒謬的生肉 韓燒放題

韓燒任食放題(1人)

不過因為呢度真係太受歡迎,大家要做好心理準備午餐同晚餐時段都一定要等位,記住預多少少時間啦!Download埋我哋嘅coupon仲可以享有全單95折優惠!

  弘大「荒謬的生肉」詳細介紹



弘大風川鰻魚(풍천장어)

  • 地址:서울 마포구 동교로27길 39
  • 營業時間:11:30 - 22:20(Break Time 15:00 - 16:30、Last Order 21:30)


小編當日係平日中午時間去,開門冇幾耐就已經有好多客人,一樓更加已經坐滿曬!一入到就已經聞到超香碳烤味,令小編好期待!



職員會幫大家燒,仲會燒埋蒜頭俾大家可以配住一齊食。呢度嘅鰻魚口感同小編之前食過嘅唔太一樣,比起滑嫩嘅魚肉,呢度嘅鰻魚偏彈牙,而且味道都好惹味!

 想預約風川鰻魚?


HONGOJIB(혼고집)

  • 地址:서울 마포구 동교로30길 1 1층 혼고집
  • 營業時間:11:30 - 22:00(Break Time 15:30 - 17:00、Last Order 21:30)


大家有冇諗過自己一個人都可以去食燒肉呢?弘大HONGOJIB係一間一人燒肉店,每人有一個一個獨立火爐可以慢慢食!



除咗燒肉仲有Shabu-shabu,份量啱啱好,自己一個人嚟旅行又想食韓式燒肉嘅話推薦大家嚟呢度!



自己一個去旅行都想食盡好西?



江南豬肉商會 弘大店(강남 돼지상회 홍대점)

  • 地址:서울 마포구 서교동 355-28
  • 營業時間:11:30 - 00:00

弘大美食 2022推薦 弘大餐廳

韓國旅行 弘大餐廳 江南豬肉商會


唔知道大家有冇聽過「江南豬肉商會」呢間燒肉鋪呢?餐廳內部非常乾淨,不過油煙味會有少少重,介意嘅朋友們要注意啦。


江南豬肉商會 炸雞

江南豬肉商會 韓燒炸雞任食

Set B(1人)

呢度最特別嘅地方係除咗燒肉,仲有炸雞任食!上圖呢個Set B 就係可以無限任食烤肉同炸雞嘅Set啦,唔知道食咩好嘅時候叫呢個一定冇錯。另外仲有普通燒肉任食嘅Set A同其他各種唔同配搭嘅Menu任君選擇。而燒肉放題嘅部位就包括冷凍五花肉、豬頸肉、豬皮同肥牛,一定有一種啱你口味。

  弘大燒肉任食推介


橋村炸雞 弘大店(교촌치킨 홍대점)

  • 地址:서울 마포구 서교동 371-3
  • 營業時間:12:00 - 02:00

弘大美食總整理 2022

韓國旅行 弘大美食 橋村炸雞


相信有關注韓國,或者有嚟過韓國玩嘅朋友們應該都會聽過,甚至食過「橋村炸雞」。弘大呢間分店空間非常大,仲有露台位,天氣好嘅時候大家不妨可以去呢度食炸雞。


橋村炸雞 橋村Combo 蜂蜜Combo

橋村Combo(교촌콤보)

呢度最受歡迎嘅就係「橋村Combo」同「橋村蜂蜜炸雞Combo」,平時食炸雞通常都會係一隻雞所有部位都有齊,不過橋村炸雞有提供Combo(雞翼+雞鎚)呢個選項,每嚿都嫩滑多汁,唔鍾意食雞胸肉嘅朋友記住要叫Combo啦。


  弘大「橋村炸雞」詳細介紹


兔子停(토끼정 홍대점) 

  • 地址:서울 마포구 잔다리로2길 13 
  • 營業時間:11:30 - 22:00

弘大美食總整理 2022

韓國旅行 弘大餐廳 兔子停


「兔子停」係一間結合日韓風格嘅連鎖餐廳,而弘大呢間分店就有三層,裝修好靚,仲有落地玻璃,啱曬鍾意影相打卡嘅朋友們。


弘大兔子停 意粉兔子飯桌

意粉兔子飯桌(파스타 토끼밥상)

弘大兔子停 忌廉咖喱烏冬

忌廉咖哩烏冬(토끼정 크림 카레 우동)

忌廉咖哩烏冬係呢度最受歡迎嘅Menu,小編次次去都見到每枱最少會有一碗。另外呢度仲有好多非常適合相機食先嘅Menu,唔止睇得,仲好好食添啊!撳埋下面個掣,download優惠券,就會得到9折優惠啦!

  弘大「兔子停」詳細介紹



牛雅(우아하게)


牛雅主打用100%純牛肉炮製而成嘅韓式漢堡扒,仲有各款燒肉同海鮮。因為有定食,所以就算係自己一個人去都冇問題!



而且因為會即場喺你面前用炭火燒,有得影又有得食XD



豬腳小姐 弘大總店(미쓰족발 홍대본점)

  • 地址:서울 마포구 어울마당로 123-1
  • 營業時間:星期一及二 16:00 - 00:00 星期三至日 12:30 - 00:00

弘大美食總整理 2022

韓國旅行 弘大餐廳 豬腳小姐


有嚟過弘大嘅朋友們,相信都曾經路過,甚至去過「豬腳小姐」。呢間餐廳位於弘大主街,非常容易搵到。


弘大豬腳小姐 蒜味豬腳

蒜味豬腳 (中)(마늘족발(중))

小編之前去嗰陣就叫咗一份中size嘅蒜味豬腳,份量非常多,唔好睇佢上面好似好多醬,好似會好鹹咁,其實呢個蒜蓉醬甜甜地,辟到肉腥味之餘仲非常惹味!不過食到最後唔多唔少都會有啲膩,建議3個人share食就啱啱好~

  弘大「豬腳小姐」詳細介紹


Amazing Nongkhai(어메이징 농카이)

  • 地址:서울 마포구 동교로 156-11
  • 營業時間:11:00 - 20:30(Break Time: 15:20 - 17:00、Last Order 19:45)

弘大美食總整理 2022

韓國旅行 弘大餐廳 Amazing Nongkhai


講起弘大嘅泰國菜,一定唔少得「Amazing Nongkhai」,呢度有好多其他地方食唔到嘅特色泰國料理,而且好多明星都有嚟過,例如GOT7有謙同Bam Bam、仲有韓國著名廚師洪錫天都有到訪過,可想而知由幾好食啦!鋪頭入面仲佈置到令人覺得瞬間去咗曼谷咁,非常有異國風情。


弘大Amazing Nongkhai 泰國菜


小編上次去叫咗4個主菜,仲食埋甜品,全部都非常地道,連泰國同事都有認證,鍾意食泰國料理嘅朋友們絕對唔可以錯過!Download埋我哋張Coupon,二人同行就會即送一杯泰式奶茶或者凍牛奶!

  弘大「Amazing Nongkhai」詳細介紹



弘's小章魚(홍스쭈꾸미 홍대본점)

  • 地址:서울 마포구 어울마당로 146
  • 營業時間:11:30 - 23:00

弘大美食總整理 2022

韓國旅行 弘大餐廳 弘's小章魚


「弘's小章魚」鋪頭門面睇落好似平平無奇,可能平時行過都唔會發現到,不過其實呢度真係好受歡迎。成間鋪總共有3層高,小編去嘅時候,1樓同2樓已經坐滿曬添啊!


弘's小章魚 辣炒章魚


小編叫咗呢度最受歡迎嘅五花肉辣炒章魚,見到都流曬口水。食到差唔多,店員仲會幫大家炒個蟹籽炒飯,真係好好食(價錢入面包埋㗎!)。不過美中不足嘅係同價錢相比,份量唔算多,性價比唔太高,但鍾意食辣炒章魚嘅朋友不妨可以去試吓。

  弘大「弘's小章魚」詳細介紹


弘益醬蟹(홍익게장)

  • 地址:서울 마포구 성산동 232-12
  • 營業時間:11:30 - 21:30(Break Time 15:50 - 17:00)

弘大美食總整理 2022

韓國旅行 弘大餐廳 弘益醬蟹


講起韓國特色美食,當然唔少得醬油蟹啦!而位於弘大嘅「弘益醬蟹」係一間非常出名嘅醬油蟹任食放題餐廳,入面有分一般坐席跟地席,小編去嘅時候係坐地席嘅,非常有傳統嘅感覺。


弘益醬蟹 醬油蟹 醬油蝦 任食放題

醬油蟹、醬油蝦任食放題(1人)

其實小編一開始都唔夠膽食醬油蟹,但喺呢度食過一次之後,真係令人非常難忘。特別適逢秋冬天係蟹當造嘅季節,蟹肉非常鮮甜。呢個價可以食到高質嘅海鮮放題,真係好抵!

  弘大「弘益醬蟹」詳細介紹


以上就係小編整理出嘅2024最新弘大美食攻略,嚟到弘大唔知食咩好嘅話不妨可以參考吓~ 亦都歡迎大家留言話俾小編知你最鍾意邊間弘大餐廳!




如果有更多想知嘅內容,都可以隨時dm話俾我哋知:)

 Instagram:creatrip.hk

 Facebook:Creatrip 帶你認識韓國每一面 

 韓國代購

熱門文章