Hello，大家好，我哋係由韓國人每日提供最新韓國旅行資訊嘅Creatrip。

大部分嚟韓國旅行嘅朋友們應該都係喺仁川機場出入境，而機場鐵路「AREX」將會係大家其中一個出市區嘅交通選項。今日小編就幫大家整理咗「AREX」嘅時間表同相關資訊，仲有搭「AREX」嘅小Tips，記住收藏呢篇文，下次嚟韓國旅行就唔洗怕唔識點搭車啦！

仁川機場快線AREX直通車 | 資訊

• 停靠車站：仁川T2、仁川T1、首爾站
• 需時：43-53分鐘
• 價錢：₩9,500→₩7,350（事先預約時）

AREX優惠車飛｜撳我買飛

因為AREX直通車只會停靠仁川機場T1、T2同首爾站，中途唔會停其他站，所以可以慳返好多時間。車上面有好多位，仲有放喼嘅地方，令大家可以舒服放鬆咁出到首爾市區。如果想快速來回首爾站同仁川機場，AREX可以幫到你，事先預約仲可以享有優惠添！

仁川機場快線AREX直通車時間表

最後更新：2023.01.30

 仁川機場快線「AREX」直通車票詳細介紹

AREX同一般機場快線有咩分別？

一般機場快線

• 停靠車站：仁川T2、仁川T1、機場貨物辦公樓、雲西、永宗、青羅國際城、黔岩、桂陽、金浦機場、麻谷渡口、數碼媒體城、弘大、孔德、首爾站
• 需時：59-66分鐘
• 價錢：成人₩4,750、小童₩2,200（交通卡價錢）

好多人都可能會問，韓國唔係本身都有條機場快線㗎咩，呢個又同AREX有咩分別啊？一般列車唔需要事先買飛（可以直接嘟交通卡入閘），班次密（大約5~15分鐘一班車），中途亦會停好多其他車站。雖然可以去到嘅地方會多咗（例如最多人去嘅弘大入口站），但係缺點就係真係超多人搭，返放工時間基本上唔會有位坐，加埋咁多遊客嘅行李，都真係幾逼狹。

想坐得舒服啲嘅朋友們建議去搭AREX直通車，然後再喺首爾站轉車，都一樣咁方便。

 弘大交通總整理

 首爾站交通總整理

仁川機場快線AREX直通車 | 首爾站搭車位置

如果你住嘅地方唔係喺首爾站附近，大家可以搭1號線、4號線或者京義中央線去到首爾站再轉AREX。下面小編會教大家搭完1號線之後可以點行去搭機場快線，就算大家係搭其他地鐵線，只要睇住指示牌都可以輕鬆搵到上車位！

*如果住宿喺弘大入口站/2號線地鐵站附近，直接喺弘大入口站轉乘一般機場快線會比較方便。

落車之後跟住Airport Railroad（공항철도）指示牌行

嘟卡出站，然後繼續直行

搭扶手電梯上去

繼續沿住指示牌行

首爾站真係好大，大家可能行行吓會懷疑自己係唔係行錯路，不過只要一直跟住寫明「Airport」或者「仁川國際機場」嘅指示牌就得，唔需要太擔心！

行到尾就會見到「Airport Railroad」入口

搭扶手電梯落去

最後就會去到「機場鐵路」閘口

AREX車票Sample

事先喺網上買飛之後需要去AREX官網預約使用日期，完成之後就會得到呢張電子車飛，上面會顯示你嘅搭車時間、目的地、座位號碼，同埋最重要嘅QR Code。到時候大家只要嘟呢個QR Code就可以入到閘，唔需要再另外買車飛或者交通卡。

 AREX官網預約教學

仁川機場快線AREX直通車 | 小Tips

1. 網上預訂更加抵！

雖然大家可以直接喺車站現場買到AREX直通車車飛，不過事先喺網上訂購就可以用優惠價₩7,350（原價₩9,500）買到！而且小童車飛原價仲貴過呢個價錢，所以建議無論係大人定小朋友都可以先事先預訂。

2. 落機之後先去AREX官網預約時間！

另一方面，如果大家喺AREX官網預約完使用日期同時間，但發現因為航班delay而搭唔到嗰班車，可以去AREX官網改票（每張飛將會收取₩1,000手續費）。小編就建議大家可以等大家已經順利降落韓國之後，連機場Wifi或者用數據上網預約使用日期（只要班車未出發都可以預約到！）。

仁川機場快線AREX直通車 | 車廂內部

AREX內部乾淨闊落，就好似搭緊頭等咁，仲有免費Wifi可以用！車費同一般列車相差唔太遠，但係整體體驗會比較好，而且仲可以快啲去到目的地~

AREX更加有專門放行李嘅區域，大家唔需要好似平時搭一般地鐵嗰陣咁攬住自己個行李，亦都唔洗怕會阻到人。

以上係小編最新整理有關仁川機場快線「AREX」嘅相關資訊，有需要嘅朋友們記住要mark低，下次嚟旅行就知道要點做啦~

AREX車票｜撳我預約

  網上付款Q&A 

如果有更多想知嘅內容，都可以隨時dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購

Mail：help@creatrip.com