釜山海雲台美食總整理
去釜山海雲台就係要食呢啲！小編整理咗12間美食店，之後去釜山會唔會都想試吓？
Hello，大家好，我哋係由韓國人每日提供最新韓國旅行資訊嘅Creatrip。
想喺釜山睇海大家第一時間會諗到邊度？相信大家其中一個答案會係「海雲台」！不過除咗睇海之外，嗰度到底有咩好食？今日小編幫大家整理咗好幾間出名嘅餐廳，之後去到唔知食咩好嘅朋友，不妨可以參考吓！
釜山海雲台美食總整理
1. 百歲章魚（100세낙지）
- 地址：부산 해운대구 구남로24번길 3
- 營業時間：11:00 - 22:00（Last Order 21:20）
- 價錢：章魚&大腸&蝦仁（낙곱새）一人份 ₩14,000
- 小Tips：海雲台站（해운대역）5號出口行3分鐘
第一間想同大家介紹嘅係「百歲章魚」，佢喺海雲台人氣相當高，鋪頭入面都夠多位，呢度主打食「章腸蝦（章魚&大腸&蝦仁）」 ，最少要叫兩人份先可以出餐，所以如果係同朋友一齊去，大家不妨可以去呢度試吓！
食到差唔多，點可以少咗個炒飯或者加個麵落去煮呢？只要用我哋提供嘅優惠券，就可以換到麵食（冬粉、烏冬、即食麵）或飲品（可樂、雪碧）揀一款，落單嘅時候出示張coupon俾店員睇就得！
2. 尾浦末家（해운대미포끝집）
- 地址：부산 해운대구 달맞이길62번길 77
- 營業時間：11:30 - 01:00（Last Order 23:30）
- 價錢：燒貝類（細）（조개구이 小） ₩60,000
- 小Tips：由中洞站7號出口行25分鐘 / 搭7分鐘的士去（大約₩3,400）/ 由海雲台行過去20分鐘
去海雲台又點可以唔食海鮮？想搵到一間可以望到大海，又食到好味嘅海鮮餐廳，小編推薦大家可以去「尾浦末家」 ，呢度專食燒貝類，好多人食完都有讚冇彈！
唔單止海鮮量多，就連小菜一樣都好豐富！因為個火夠大，只要將扇貝同蜆放喺爐上10秒就會熟，如果燒太耐就會變得好硬唔好食㗎啦！鍾意食海鮮嘅朋友，之後都可以試吓~
3. 古來思魚糕（고래사어묵 해운대점）
- 地址：부산 해운대구 구남로 14
- 營業時間：星期日至四 09:00 - 21:0、星期五 09:00 - 21:30、星期六 09:00 - 22:00
- 價錢：唔同口味價錢都會唔一樣
- 小Tips：海雲台站（해운대역）5號出口行1分鐘
平時喺街邊食魚糕多，有冇諗過釜山會有一間專食魚糕嘅鋪頭呢？呢間「古來思魚糕」 有賣唔同口味嘅魚糕，可以買完之後當場叮熱食，又或者可以買完打包，甚至仲有啲係一包包裝好可以買返去當做手信。
小編每次去到都會忍唔住買幾條食，因為多口味，而且價錢唔算好貴，鍾意食魚糕嘅朋友，下次去開海雲台，不妨都可以同朋友夾份買幾條試吓！
4. 密陽血腸豬肉湯飯（밀양순대돼지국밥 부산본점）
- 地址：부산 해운대구 구남로 28
- 營業時間：24小時
- 價錢：豬肉湯飯（돼지국밥）₩10,000、 豬肉＋內臟湯飯 （섞어국밥）₩10,000、 豬肉＋血腸湯飯 （순대국밥）₩10,000、內臟湯飯 （내장국밥）₩10,000、什錦湯飯 （모듬국밥）₩11,000
- 小Tips：海雲台站（해운대역）5號出口行3分鐘
講到釜山一定要食嘅非「豬肉湯飯」 莫屬！雖然度度都有，不過邊間好食，又多人推薦？咁就一定要試吓「密陽血腸豬肉湯飯」 ，佢喺海雲台一帶相當出名。
呢度每一款湯飯都好好味，小編好推薦大家食湯飯時加少少韭菜撈埋一齊食，湯會更甜，令人忍唔住食完一啖又一啖！
5. 海雲台元祖奶奶湯飯（해운대 원조 할매국밥）
- 地址：부산 해운대구 중동1로 40
- 營業時間：07:00 - 20:00
- 價錢：牛肉湯飯（소고기국밥） ₩6,500、牛血湯飯（선지국밥） ₩6,500
- 小Tips：海雲台站（해운대역）1號出口行7分鐘
除咗豬肉湯飯，大家亦都可以試吓食牛肉湯飯！「海雲台元祖奶奶湯飯」 有48年歷史，唔少電視節目都有介紹過，牆上仲會見到好多韓星都嚟過打卡！
呢度出餐超快，基本上落完單唔使一分鐘就會送到， 牛肉超嫩滑，而且湯底超入味。如果前一晚飲完好多酒，之後嚟呢度解酒絕對係一流！
6. 味贊王鹽烤肉（맛찬들왕소금구이 해운대점）
- 地址：부산 해운대구 해운대로608번길 46
- 營業時間：每日 12:00 - 23:00（Break Time 15:00 -17:00、Last Order 22:00）
- 價錢：熟成五花肉130g（숙성생삼겹살130g）₩14,000、熟成豬梅花肉130g（숙성생목살130g）₩14,000 、泡菜湯（숙성지 김치찌개）₩7,000
- 小Tips：海雲台站（해운대역）7號出口行4分鐘
食燒肉有冇好介紹？當然係有啦！「味讚王鹽烤肉」 係一間連鎖店 ，佢哋嘅熟成五花肉超好食，肉超嫩好高質，好多人食完都大讚！
可能因為價錢偏貴，職員都會過嚟幫大家燒，大家只要等食就可以！另外如果只食肉覺得唔夠，大家仲可以加佢哋嘅泡菜湯，一樣都係好好味！
7. 海城烤腸店（해성막창집 본점）
- 地址：부산 해운대구 중동1로19번길 29
- 營業時間：星期一至四 16:00 - 24:00、星期五至六 16:00 - 01:00（逢星期日休息）
- 價格：牛腸180g（소막창180g）₩12,000、大腸250g（대창250g）₩12,000、牛腸鍋一人份（곱창전골 1인）₩11,000
- 小Tips：海雲台站（해운대역）1號出口行6分鐘
「海城烤腸店」係一間超多韓國人鍾意去食嘅烤腸鋪頭之一，喺網上評價相當高！同朋友邊食腸邊飲酒超地道！
唔知大家睇到有冇開始都流口水呢？將牛腸燒到金黃色，見到啲油出哂嚟就可以食，牛腸一啲都唔腥，而且好有咬口，食嘅時候一啲罪惡感都冇，而家諗返起都好想再食多次...
8. 伍班長烤肉（오반장）
- 地址：부산 해운대구 구남로24번길 20
- 營業時間：11:00 - 04:00
- 價格：雪花排骨肉一人份（꽃갈비살） ₩15,000
- 小Tips：海雲台站（해운대역）5號出口行4分鐘
相信如果大家喺Google搵海雲台美食，一定都會見過「伍班長烤肉」，因為真係超多人推薦。
將肉擺上爐度燒，側邊會有蒸蛋，另外一邊可以放泡菜或者大豆芽等。肉好嫩又juicy，相當好味！
9. MIPOSEAWA（미포씨와）
- 地址：부산 해운대구 달맞이길62번길 55 6F
- 營業時間：12:00 - 23:00
- 價格：玫瑰醬意粉（로제파스타）₩14,900、辣肉腸Pizza（페페로니피자）₩16,000
- 小Tips：由BUSAN X THE SKY行過去大約16分鐘
嚟韓國日日食韓式會覺得有啲悶？想轉吓口味，可以試海雲台觀光列車附近嘅「MIPOSEAWA」，呢度係一間露天海景餐廳，專食西餐。
天氣好嘅話，坐出面可以邊望海景，邊食意粉同Pizza，重點係價錢一啲都唔貴！
10. 海雲台瓦房鱈魚湯（해운대 기와집 대구탕）
- 地址：부산 해운대구 달맞이길104번길 46
- 時間：08:00 - 21:00（新年及中秋休息）
- 價錢：鱈魚湯 （대구탕）₩14,000
- 小Tips：喺海雲台站（해운대역）7號出口搭200號巴士，喺尾浦·月光路入口站落，然後行8分鐘
除咗豬肉湯飯同牛肉湯飯，仲有冇其他好食？小編推薦可以去「海雲台瓦房鱈魚湯」 。
呢度裝修得好傳統，佢哋招牌菜就係鱈魚湯，裡面仲有一嚿大白蘿蔔，同魚一齊食，味道一流，無論係大人定細路都會鍾意食！
11. 海雲台草梁小麥冷麵（해운대 초량밀면）
- 地址：부산 해운대구 구남로 20
- 營業時間：10:00 - 22:00
- 價格：水冷麵(細)（물밀면 소）₩7,000、 水冷麵(大)（물밀면 대） ₩8,000、 辣拌冷麵(細)（비빔면 소） ₩7,000、 辣拌冷麵(大)（비빔면 대） ₩8,000、 餃子（왕만두） ₩7,000
- 小Tips：海雲台站（해운대역）1號出口行2分鐘
네이버 지도
「海雲台草梁小麥冷麵」同海雲台地鐵站好近，小編每次經過嘅時候，都會見到好多人，有一次趁住人冇咁多時去食咗次。
呢度嘅辣拌冷麵同水冷麵有分大細，麵條好有咬口，辣拌冷麵唔會好辣，反而帶有少少甜味，令人意猶未盡。而餃子（왕만두）餡料多，CP值相當高！
12. HAEMAKKI醬油蟹（해마끼간장게장）
- 地址：부산 해운대구 해운대해변로298번길 24 팔레드시즈 콘도 2F
- 營業時間：星期一、二、四至日 10:00 - 21:30（Break Time 15:00 - 17:00） 、逢星期三休息
「HAEMAKKI醬油蟹」用嘅蟹全部都係韓國西海最頂級同貴價嘅花蟹，每一隻都超多肉同膏，而且仲唔會腥，配埋獨家調味更加係一流！
除咗生嘅醬油蟹同辣醬蟹之外，呢度亦都有花蟹湯、清蒸花蟹、辣燉花蟹章魚、豬肉煎餅等等嘅menu任君選擇。大家去之前記住download我哋嘅coupon，只要出示俾職員睇，每枱就會送一罐飲品！
以上係小編推薦嘅釜山海雲台美食，唔知大家有冇食過邊一間覺得都唔錯，而小編又冇寫到嘅呢？歡迎大家一齊留言討論。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
