喺韓國用₩5,000可以做到嘅事
5千韓幣（HKD 30）原來咁好使！食飯、唱K、買衫都得？？
Hello，大家好，我哋係由韓國人每日提供最新韓國旅行資訊嘅Creatrip。
大家都知而家韓國匯率高，由以前1:7變到而家1:6左右，大家可以用更少嘅港幣玩轉韓國！今日小編就想教大家點樣用￦5,000（ 約HKD 30）玩盡同食盡佢！
￦5,000的幸福
吃喝
1. 街頭小食
去旅行無非都係想休息吓，食盡當地美食或者買返夠本！如果想食韓國最地道嘅美食，去傳統市場就一定冇錯！淨係首爾都已經有唔少傳統市場，每一個地區都有特別出名嘅小食，價錢唔貴，又可以體驗到韓國當地文化，超推薦大家去！
韓國雖然都有唔少麵包舖，不過想食到即叫即整嘅多士，就一定要去Isaac Toast 或者Egg Drop啦！大家都知佢哋出名又平又好味，如果之後大家去明洞聖堂店Isaac Toast，更加可以透過我哋提前預約，以優惠價食到熱辣辣多士！或者返到酒店之後唔想再出街，都可以搵我哋代訂外賣㗎！
2. 便利店小食
講到韓國除咗Cafe多之外，便利店都係多不勝數，唔使行幾十步就已經會見到一間喺左近。韓國嘅便利店比香港多，除咗香港都有嘅7-11，仲有GS25、CU、emart24等，呢啲舖頭有時仲會自己推出自家品牌產品，甚至同其他牌子聯名！
相信大家嚟到韓國都會至少去一次便利店，不過咁多款產品，又唔識韓文，怕中伏唔知點算好？吃貨小編有另外準備一個便利店特輯，每兩個禮拜就會去一間便利店親身為大家試食，而且所有產品會由大家嚟投票，鍾意食便利店小食嘅朋友就要去睇吓啦！
3. 去Cafe
咖啡已經成為韓國人每日唔可以缺少嘅其中一樣嘢！同便利店一樣，呢度周街都可以見到有Cafe，有時最平₩1,500就可以買到一杯咖啡~ 而且韓國人好鍾意坐喺Cafe做嘢/讀書，只要買一杯咖啡就可以坐成日，都真係幾正！
玩樂
1. 影人生四格
呢幾年韓國真係好流行影人生四格，可以留住當下嘅美好回憶啊嘛！感覺就有啲似係以前中學時代會影嘅貼紙相，而家韓國嘅人生四格鋪頭就好似便利店/Cafe一樣多，唔使特登搵都可以見到有一間喺左近。加上而家好多鋪頭進化到可以自己用remote去控制幾時影，頭飾可以任戴，甚至有啲鋪頭會提供梳/直髮夾俾大家扮完靚再去影！而且影一次通常￦4,000（約HKD 24）就會有2張！
2. 租單車
首爾交通好發達，除咗地鐵、巴士呢啲公共交通工具，而家越嚟越多人會選擇踩單車！首爾有一個無人單車租借系統叫做「Seoul Bike（따릉이)」，幾乎周圍都可以搵到佢，佢價錢超平，￦1,000（約HKD 6）就可以踩一個鐘！大家之後會唔會都想租架單車喺漢江吹吹風，用另一個角度去欣賞首爾呢？（另外某啲韓國大城市都會有自己嘅一套單車租借system，去旅行之前大家可以search吓~）
3. 唱K
去韓國又點可以唔去投幣式K房？平時喺香港想去唱K，但未必有齊韓文歌？嚟韓國唱就絕對唔使擔心呢個問題！基本上喺韓國₩1,000（約HKD 6）就可以唱到2至4首歌（根據每一間舖頭唔同），另外有啲鋪頭可以揀按鐘數俾錢，30分鐘₩4,000（約HKD 24）、1個鐘₩7,000（約HKD 42）等。
4. Shopping
喺韓國shopping有時真係平到你唔信！第一個小編想推薦大家去嘅一定係Daiso！通常價錢係₩1,000至₩5,000之間，而且佢哋成日都會同唔少卡通人物，例如迪士尼同Kakao Friends聯名。想用平嘅價錢入手正品，呢個時候就係好機會！
第二個要介紹嘅係地下街！相信唔需要小編多講，大家嚟韓國旅行其中一個行程都應該都會係去地下街shopping！淨係首爾嘅地下街已經有好幾條，啲衫有時平到₩3,000就可以買到一件！只要認真搵一定可以執到寶！
第三個要推薦大家嘅一定係去Olive Young買Mask！講起對美容嘅熱誠，韓國敢認第二，應該冇人敢認第一！韓國嘅Mask好多人用過都返唔到轉頭，因為又平又好用。如果想用更平嘅價錢入手，一定要喺3、6、9、12月去！通常呢幾個月份都會做大減價，而且大家可以退埋稅，唔買一定會後悔！
韓國超市大家可能都會最先諗到Emart/樂天，但其實Homeplus都好好行！佢最大賣點係有一個區專放₩1,000產品，好多零食都可以喺度買到！
5. 二手市場
唔知大家鍾唔鍾意復古風呢？如果鐘意嘅話，小編想推薦大家去二手市場！唔好以為呢啲二手市場只係得老人家會去，其實好多年青人都會特登嚟呢啲地方行。韓國其中一個最出名嘅二手市場係位於東廟嘅跳蚤市場，以前BIGBANG G-Dragon都有去過拍攝取景添！呢度二手商品大多數都係復古裝，有時平到₩2,000起就可以執到平嘢！
俾個Tips大家：喺晏晝5點之後去，好多舖頭都會突然降價，所以如果遲啲去買到嘅嘢都會平啲！
6. 遊車河
有時去旅行都係為咗休息，唔想Plan行程有冇諗過試吓遊車河？求其上一架車望吓沿途風景，有時可能都會發現唔少新事物！加上韓國有轉乘優惠（巴士轉巴士/巴士轉地鐵），只要喺30分鐘內拍卡就得！
小編今次分享咗一連串₩5,000以下就可以玩得開心盡興嘅活動，唔知有冇邊個吸引到大家呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
