Hello，大家好，我哋係由韓國人每日每日提供最新韓國旅行資訊嘅Creatrip。
嚟韓國每次買化妝品或護膚品，絕對唔少得行Olive Young，今日小編就想同大家分享吓2024年佢哋賣得最好嘅產品！大家可以參考吓有邊一款啱，之後加入自己嘅Shopping List度啦！
[블로그] Olive Young優惠總整理
[스팟] OLIVE YOUNG現金券
護膚品系列
爽膚水TOP1
ROUND LAB 獨島爽膚水
呢支toner一直都好熱賣，可以話係最基本嘅款！因為成分夠溫和，所以所有肌膚都可以用，如果皮膚比較敏感，或者最近開始對護膚有興趣但又唔知由邊度開始入門好，都推薦你買呢款爽膚水試用！
精華TOP1
Torriden低分子透明質酸保濕安瓶精華
今年最受韓國人歡迎嘅精華係Torriden呢支保濕精華！Torriden呢個牌子出名夠溫和唔刺激，就算係敏感肌都可以用。呢支精華連小編身邊朋友都幾乎人手一支，可以即時補水之餘唔會lup。而且其實佢長期都係Olive Young銷量排行榜頭幾名，今次攞冠軍真係實至名歸！
去韓國醫美診所護膚保養更有效
[블로그] 韓國大型連鎖醫美診所/CP值高診所推薦
面霜TOP1
AESTURA ATOBARRIER 365面霜
AESTURA係一個韓國醫學級品牌，之前呢款cream只可以喺醫美中心見到，幾年前開始入駐Olive Young之後就一直非常暢銷！Cream入面有保濕膠囊，體溫融化之後就會釋放出有效保濕成分，令肌膚更加水潤之餘可以重建肌膚屏障。
不如去體驗韓國醫學級美容療程！
[블로그] 首爾非流水線/提供專業醫生諮詢醫美診所
面膜TOP1
Torriden低分子透明質酸保濕面膜
Torriden嘅保濕精華一直都好出名，而呢款面膜就係沿用自家保濕精華製成，本身皮膚比較乾，或者冬天轉季皮膚唔聽話，都可以買嚟試（香港都有得買！）。
爽膚棉片TOP1
MEDIHEAL積雪草舒緩美白去印暗沉護膚棉片
MEDIHEAL呢款護膚棉片小編自己都有用，每塊面片兩邊材質唔同，網格紋嗰面係用嚟mat走臉嘅老廢物質，而比較平嗰面就可以用嚟當面膜敷！推薦大家放落雪櫃，朝早化妝之前敷，可以令妝容更加服貼。
卸妝產品TOP1
ma:nyo魔女工廠純淨卸妝油
講到韓國卸妝油，魔女工廠敢認第二，應該都冇其他品牌敢認第一！因為佢獲獎無數，唔單止喺Olive Young一直拎獎，其他護膚品牌網站都一直大推！
防曬TOP1
ROUND LAB 白樺樹保濕防曬
唔好以為只係夏天需要防曬，冬天其實都有好多紫外線㗎！想搵一支唔貴，但又功能非常好嘅防曬，大家可以試吓ROUND LAB 白樺樹保濕防曬，所有肌膚都適用，質地清爽，做到美白、補水同鎮靜效果，由推出到而家一直都係熱賣款之一！
男士護膚TOP1
ideal FOR MEN Perfect All In One Milk
邊個話男士唔可以貪靚！而家年代變，男士都愛護膚！ideal 呢款 All In One Milk專為男士而設，已經連續5年拎第一！Olive Young經常有買1送1優惠， 男士之後行街都可以留意吓啦！
化妝品系列
眼妝TOP1
Too Cool For School Art Class Frottage Pencil多用途眼影臥蠶筆
前幾年眼妝產品第一名都係睫毛膏，但今年就由Too Cool For School呢支臥蠶筆奪冠！佢被譽為韓國化妝師專用臥蠶筆，更加可以用做眼影、胭脂、Highlighter等等，而且粉質夠細膩，唔會一撻撻，唔怪得韓妹們都會人手一支！
彩妝TOP1
WAKEMAKE Soft Blurring眼影盤 #08 Candy Coral Blurring
zigzag
WAKEMAKE係Olive Young旗下彩妝brand，無論係眼影定唇膏/唇彩都超受韓國人歡迎！而今次佢哋嘅眼影盤就成功成為彩妝TOP1！上年第一名係呢款眼影盤嘅#04 Lavender Blurring色，今年就由#08 Candy Coral Blurring衛冕，配色夠日常，買一盒就可以化出好多款妝容，推薦warm tone朋友買嚟用！
唇妝TOP1
Romand Juicy Lasting唇彩
呢幾年韓國比起霧面唇膏，反而更加多人用呢種閃令令嘅鏡面唇彩。Romand喺韓國係一個平價品牌，就算係學生都負擔得起！而最受歡迎嘅色號係上面呢款Bare Grape，最近仲換咗新配方，鏡面效果更加出，推薦cool tone嘅朋友買嚟試！
氣墊粉底TOP1
JUNG SAEM MOOL 持久裸妝感氣墊粉底
JUNG SAEM MOOL係由韓國著名化妝師鄭瑄茉（정샘물）融合幾十年嘅工作經驗而推出嘅化妝品品牌，呢款氣墊粉底非常持久服帖，而且唔會睇落妝好厚，更加可以保持長時間清爽！
[스팟] JUNG SAEM MOOL INSPIRATION（AVENUEL分店）
底妝TOP1
Banila Co. Prime Primer 控油定妝碎粉
今年底妝第一名係Banila Co.嘅碎粉！小編自己都回購過一兩次，佢粉質算係開架化妝品當中最幼細嘅一款，上完妝掃一層就即刻可以吸走多餘油份，而且全日可以保持乾爽，冬天用都唔會乾。
修容TOP1
Fwee Lip & Cheek Blurry Pudding Pot 棉花糖唇頰兩用膏 ND03 Without
Fwee呢款唇頰兩用膏本身就好出名，搽嘴唇或者當胭脂咁用都得夠方便，但今次居然得到修容類別嘅第一名！ND03 Without色號呈灰粉色，無論係用嚟做胭脂、唇膏打底定陰影都夠自然。
想知自己啱用咩化妝品？
個人護理系列
身體護理TOP1
Illiyoon神經醯胺敏感肌潤膚乳
天氣越嚟越凍，係咪都好需要買返支Body Lotion去滋潤吓呢？呢支Lotion聲稱每30秒就賣出一枝，好多人用完佢都返唔到轉頭，用完一枝又一枝！連敏感肌都適用，係冬天必備嘅產品！
唇部護理TOP1
Torriden SOLID-IN Ceramide Lip Essence 神經醯胺純素唇部精華
Torriden可以話係今年嘅大贏家！除咗精華同面膜，Torriden嘅護唇精華亦都榮獲2025 Olive Young Awards唇部護理第一名，雖然夠保濕，但質地唔會太厚身同lup，妝前搽定敷10分鐘再抹走，之後上唇妝會更加貼！
洗頭水TOP1
LABO-H 益生菌防脫髮頭皮強化洗髮水
有冇人好似小編咁係甩毛怪，成日洗/吹完頭之後都會甩好多頭髮XD 呢款洗頭水今年經常喺Olive Young個排行榜上面，聲稱有效改善脫髮問題，令頭皮更加健康，更加有唔少韓國KOL推薦過！
頭髮護理TOP1
UNOVE 重度受損髮護髮乳EX
唔想頭髮成日都咁易打棘，其實我哋間唔中都需要做吓Treatment去護髮。呢款護髮乳以多達31種豐富蛋白質&胺基酸同5種草本萃取油製作而成，加上自然草本清新香，用佢嘅時候頭髮會更加有彈性同有光澤！
想深層護理頭髮？
[블로그] 韓國頭皮SPA/頭皮護理療程推薦
其他產品
健康食品TOP1
Orthomol Immun免疫力綜合維他命
Orthomol Immun係一個德國保健食品品牌，而呢款維他命食完可以全面增強體質，提升免疫力。小編本身都有食開，味道易入口，啱曬買返香港送俾親朋戚友啊！
香水TOP 1
FORMENT經典香水（Cotton Hug）
Forment呢個牌子越做越大，連香港官網都有！而且淨係今年就已經推出咗好多款新香水，當中最受歡迎嘅係呢款Cotton Hug，呢款香水俾人一種溫暖乾淨嘅感覺，如果另一半噴咗呢支香水應該好正~
[블로그] 韓國最受歡迎香水牌子TOP12
食品TOP1
Delight Project Bagel脆片
講起Olive Young，點少得呢款bagel脆片！之前一直都淨係得蜂蜜牛油同香蒜味，而家出埋pizza味同粟米濃湯味，款款都好惹味~
以上就係2025年Olive Young最受歡迎嘅產品，大家下次嚟韓國玩可以參考呢個list掃貨返屋企！
買定電子現金券送禮自用都一流！
[스팟] OLIVE YOUNG現金券
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！
